Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca Wari Raya e nggo dung, kerina kalak Israel lawes ku tiap kota i Juda. Jenari ipecahkenna tugu-tugu batu, ibulakkenna gana-gana si ipajekken guna Dewi Asera, janah iradaskenna batar-batar dingen ingan ersembah kalak perbegu. Bage ka pe perbahenenna man kerina kota-kota Juda si deban ras daerah-daerah Benyamin, Eperaim, ras Manase. Kenca bage mulih ia kerina.
2 Itetapken Raja Hiskia mulihi pembagin tugas imam-imam ras kalak Lewi, janah tep-tep kalak ndatken tugas khusus. Tugas-tugas e, eme: mpersembahken persembahen tutungen ras persembahen perdamen, ikut muat bagin i bas kebaktin i bas Rumah Pertoton, dingen mereken pujin ras ngataken bujur i bas ingan-ingan si tertentu i bas Rumah Pertoton.
3 Raja mereken asuh-asuhenna jine guna persembahen tutungen tiap erpagi-pagi ras karaben, bage pe guna persembahen-persembahen wari Sabat, Wari Raya Bulan Mbaru dingen i bas wari-wari raya si deban bagi si itentuken i bas Undang-undang TUHAN.
4 Tambah si e, ikataken raja man kalak si ringan i Jerusalem geleh iberekenna persembahen-persembahen si jadi bagin imam-imam ras kalak Lewi, gelah alu bage banci iendeskenna dirina ngidangi TUHAN rikutken si tersurat i bas Undang-undang TUHAN.
5 Kenca perentah enda ndai imomoken, emaka kalak Israel maba pemerena man imam-imam eme: gandum si mejilena, anggur, minak saitun, tengguli ras ulih juma si deban. Bage pe man kalak Lewi iberekenna sepersepuluh i bas kerina si lit i bas ia.
6 Kerina kalak si ringan i kota-kota Juda maba sepersepuluh i bas lembu ras biri-birina bage pe melala ibabana pemere si ipersembahkenna man TUHAN Dibatana.
7 Pemere e mulai rehen i bas bulan si peteluken janah lalap reh empat bulan dekahna.
8 Tupung Raja Hiskia ras pegawaina ngidah uga buena si nggo ibereken rayatna ipujina TUHAN dingen ipujina BangsaNa Israel.
9 Asum raja ercakap-cakap ras imam-imam bage pe ras kalak Lewi kerna pemere-pemere enda,
10 nina Asaria, Imam si Mbelin kesusuren Sadok man raja, "Kenca nggo mulai rayat maba pemerena ku Rumah Pertoton nggo bias nakan kami janah melala denga ibana. Si enda kerina jadi erkiteken TUHAN nggo masu-masu BangsaNa."
11 Sue ras perentah raja, ibahan kalak enda gudang i sekelewet Rumah Pertoton e,
12 dingen itamakenna kerina pemere ras persepuluhen e i je guna isimpan. Itugaskenna Konanaia kalak Lewi, ngawasisa janah agina Simei jadi pembantuna.
13 Sepuluh kalak Lewi itetapken erdahin nampati kalak enda. Si sepuluh kalak e, eme: Jehiel, Asasia, Nahat, Asahel, Jerimot, Josabad, Eliel, Ismakia, Mahat, ras Benaya. Kerina enda ilakoken rikutken perentah Raja Hiskia ras Imam si Mbelin Asaria.
14 Kore anak Imna sekalak Lewi eme kepala pengawal i Pintu Gerbang Timur Rumah Pertoton, ertanggung jawab ngaloken pemere-pemere dingen persembahen persepuluhen man TUHAN jenari magikenca.
15 I bas kota-kota si deban, ingan imam-imam tading, Kore isampati kalak Lewi si deban, eme: Eden, Miniamin, Jesua, Semaya, Amaria, ras Sekania. Pangan e ibagina alu rata man senina-seninana kalak Lewi rikutken tugasna
16 la rikutken terpuk-terpukna. Kerina dilaki umur telu puluh tahun ku das si ertugas tep-tep wari i bas Rumah Pertoton e sue ras pendahinna, sekalak-sekalak ndat sada bagin.
17 Imam-imam isuratken rikutken terpuk-terpukna, janah kalak Lewi umur dua puluh tahun ku das isuratken rikutken tugas-tugasna ras terpukna.
18 Kerina ia isuratken radu ras ndeharana, anak-anakna dingen kalak si deban si jadi tanggungenna, erkiteken ia nggo isikapken ngelakoken tugasna si khusus man TUHAN katawari pe.
19 I bas imam-imam si ringan i bas kota-kota si nggo itetapken guna kesusuren Harun ntah pe i bas mbalmbal i sekelewet kota-kota e, itetapken kalak si ertanggung jawab magiken pangan man kerina dilaki i bas keluarga imam-imam, ras man kerina kalak si isuratken i bas terpuk kalak Lewi.
20 I bas belang-belang negeri Juda, Raja Hiskia ngelakoken kai si bujur dingen kai si ngena ate TUHAN Dibatana.
21 Sangap ia i bas kerina pendahinna erkiteken kerina si ibahanna guna Rumah Pertoton ntah pe i bas ia ngikutken Undang-undang, ilakokenna e alu bulat ukur dingen alu ate keleng man Dibatana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA