Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki nagaukang ke’nanga anjo passua’-suarranga, a’lampami sikontu ra’yaka mange ri sikontu kota Yehuda, nampa naancuru’ patung-patunna barhalaya, naruntung sikontu patung-patung le’baka nibangung untu’ Dewi Asyera, siagang naputta tampa’-tampa’ pakkoro’bangnganga siagang tampa’-tampa’ panynyombanga mae ri barhalaya. Kamma tomminjo nagaukang ke’nanga ri tampa’-tampa’ maraenga ri Yehuda siagang ri daera-daera Benyamin, Efraim, siagang Manasye. Le’baki anjo massing ammotere’ ngasemmi ke’nanga mange ri massing kamponna.
2 Napattantumi ammotere’ regu-reguna sikamma imanga siagang tu Lewia situru’ pambageang tugasa’na ke’nanga. Anjo tugasa’-tugasa’na massing ke’nanga iamintu: assare koro’bang nitunu siagang koro’bang pappasiama’, allayani upacara panynyombang ri Balla’Na Batara, kammayatompa mammuji siagang appala’ sukkuru’ mae ri Batara lalang ri a’rupa-rupaya tampa’ ri Balla’Na Batara.
3 Battu ri olo’-olo’ piara kalenna karaenga, assaremi karaenga sumbangang niparalluanga untu’ koro’bang bari’basa’ karuenga siagang koro’bang nipassareanga ri allo Pammari-marianga, ri Allo Lompo Bulang Berua, siagang ri allo-allo lompo maraengannaya, kammayami le’baka nipattantu lalang ri hukkung-hukkunNa Batara.
4 Pantaranganna anjo nasuroi karaenga pandudu’ Yerusalem angngerang passare le’baka nipattantu untu’ sikamma imanga siagang tu Lewia, sollanna akkulle ke’nanga amparhatikang tojeng-tojengi siagang ampassareangi sikontu wattunna untu’ allayani ri Balla’Na Batara sangkamma niaka tattulisi’ lalang ri hukkung-hukkunNa Batara.
5 Le’baki nipa’la’bang nipabattu anjo parentaya, massing angngerammi tu Israel mange ri Balla’Na Batara passarena ke’nanga iamintu massing wassele’ bungasa’ nagappaya ke’nanga, kammayami anggoro’, tarigu, minynya’ zaitun, je’ne’ bani, siagang wassele’ lamung-lamung maraengannaya. Angngerang tommi ke’nanga passare bage sampulona battu ri pa’barang-baranganna ke’nanga.
6 Sikontu tau niaka ammantang ri kota-kota Yehuda angngerangi passare battu ri bage sampulona olo’-olo’ sapina siagang gimbala’na ke’nanga, kammayatompa siapa are jaina passare maraengannaya, nampa napassareang kabusu’ anjo mae ri Karaeng Allata’alana ke’nanga.
7 Appakkaramulami battu anjo passare kammaya ri bulang tallu, siagang pila’ katambang sa’genna bulang tuju.
8 Nacini’na Karaeng Hizkia siagang pagawe-pagawena anjo sumbangang kammaya jaina, napakala’biri’mi Batara siagang napalecemi ra’ya’ Israel, umma’Na.
9 Ri wattunna sipa’bicara karaenga siagang sikamma imanga kammayatompa tu Lewia, ri passala’na anjo passarea,
10 nakanamo Imang Lompoa iamintu Azarya jari-jarina Zadok, "Baku’na naerang ra’yaka anjo passarena ngaseng mange ri Balla’Na Batara, tenamo nakakurangang ikambe ri kanre-kanreang; ba’lalo kala’biammi ikambe, sa’genna tuli jaina parsadiaang kanre-kanreanna ikambe. Yangasenna anjo akkullei natarima ikambe lanri Nabarakkakinna Batara Umma’Na."
11 Lanri parentana karaenga, appasadiami ke’nanga gudang-gudang ri sa’ri Balla’Na Batara,
12 nampa naboli’ anjo sikontu passarea siagang passare bage sampuloa battu ri pa’barang-baranganna ra’yaka lalang ri anjo gudang-gudanga. Nia’ sitau tu Lewi niarenga Konanya nisare tugasa’ untu’ pangawasa’, siagang andi’na niarenga Simei a’jari pambantuna.
13 Nia’ sampulo tu Lewi maraengang napimping ke’nanga untu’ anggaukangi tugasa’na, iamintu: Yehiel, Azazya, Nahat, Asael, Yerimot, Yozabad, Eliel, Yismakhya, Mahat, siagang Benanya. Nipattantu ngasemmi anjo jama-jamang kammaya situru’ pitunju’ napassareanga Karaeng Hizkia siagang Imang Lompo Azarya.
14 Kore ana’na Yimna, tu Lewi, a’jari kapala pangawala’ ri Pakke’bu’ Lompo Timboro’na Balla’Na Batara, nisarei tugasa’ untu’ antarimai passare-passare nipassareanga mae ri Batara, nampa nabage-bage.
15 Ri kota-kota maraeng napammantangia imang-imanga, nibantui Kore ri tu Lewi maraengannaya, iamintu: Eden, Minyamin, Yesua, Semaya, Amarya, siagang Sekhanya. Anjo kanre-kanreanga nipasangkamma-kammai bagena mae ri paranna suku Lewi, baji’ natau toa kammayatompa tau rungka situru’ massing tugasa’na ke’nanga.
16 Sikontu tu bura’ne umuru’ 30 taung narateanganna, a’le’basaka anggappa tugasa’ allo-allo ri Balla’Na Batara, massing nisare tongi tawana situru’ tugasa’na siagang situru’ reguna.
17 Nicata’ kabusu’mi arenna sikamma imanga situru’ passilokoang bijanna, siagang tu Lewi umuru’ 20 taung narateanganna nicataki situru’ tugasa’na siagang reguna.
18 Nicata’ kabusuki arenna ke’nanga siagang ana’na na bainenna, sikamma tau niaka naballaki lalang ri ruma tanggana, nasaba’ musti tuli sadiai ke’nanga untu’ kere-kerewattu anggaukangi tugasa’-tugasa’ matangkasa’na ke’nanga mae ri Batara.
19 Ri alla’na anjo imang-imang niaka ammantang ri kota-kota le’baka nipattantu untu’ a’jari pammantanganna jari-jarina Harun, yareka ri parang-parang niaka ri tammulilina anjo kotaya, nia’ nijo’jo’ untu’ tugasa’ ampa’bage-bageangi kanre-kanreanga mae ri sikontu bura’ne niaka lalang ri kaluarga imanga, siagang mae ri sikamma tau niaka nicata’ arenna lalang ri suku Lewi.
20 Ri sikontu Yehuda, napajappai Karaeng Hizkia kaadelanga, lambusuki ri panggaukanna, siagang napakasannangi pa’mai’Na Karaeng Allata’alana.
21 A’jari jama-jamanna, lanri sikontu apa nagaukanga untu’ Balla’Na Batara yareka untu’ anturuki hukkung-hukkunNa Batara, attojeng-tojengi pa’mai’na anggaukangi siagang attojeng-tojengi pa’mai’na mangngamaseang ri Karaeng Allata’alana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA