Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sampesuvu-sampesuvu nipotoveku, hitumo suraku karanduana ka komiu. Riara suraku karanduana hitu muni yaku nompasimbuku mompopatora ka komiu pepatuduki nakana ala pekirimiu batena magasa.

² Patujuku, ala ratoramiu tesa-tesa niboto nu *nabi-nabi nu Alatala nggaulu, bo ala ratoramiu muni parenta-parenta lako nte Tuputa Yesus, Topepakasalama. ParentaNa nipasimbayu nu suro-suroNa anu nakava nte komiu.

³ Anu nopoko kana ratoramiu, ri tempo napara kaupu nu dunia kana meumba tona nikuasai dota rarara mboto anu nadaa. Ira mompongeika komiu

⁴ bo manguli, "I Yesus nojanji makava mpanjili ri dunia. Tapi ledo ria nakava. Tantu ledo majadi, sabana lako ri tempo kamate ntotuata nggaulu sampe sii-sii, dunia hitu ledo nabali-bali. Pura-pura bate-batena nasimbayu lako ri lamba pamulana tempo dunia nipajadi sampe sii-sii."

⁵ Tona notesa ivesia, nitunggaira nombakalingasi anu najadi bara ipia, haitumo, Alatala nompajadi langi nggaulu ante tesaNa, bo ante tesaNa muni tana nipajadiNa lako ri uve bo kabatana neumba lako ri tatanga nu uve.

⁶ Bo nikalingasira muni Alatala nompakaropu isi dunia nggaulu ante uve, haitumo ante uve oge anu nanggabuntu nompakalodo isi dunia.

⁷ Sii-sii ledo nikitata anu nabali tapi langi bo tana anu naria sii-sii nijagai ante kuasa tesa nu Alatala sampe rapakaropu ante apu bara maipia. Sii-sii dunia da nijagai sampe Eo Potangara bara maipia tempo pura-pura tona anu ledo nangoseaka dota nu Alatala rahuku.

⁸ Tapi, sampesuvu-sampesuvu nipotoveku, nee rakalingasimiu tesa hitu: Ri panggita nTupu, sanjobu mpae nasimbayu mpo saeo, bo saeo nasimbayu mpo sanjobu mpae.

⁹ Nadea tona nanguli i Pue nokalera nompakadupa pojanjiNa makava mpanjili ri dunia. Tapi Ia ledo nokalera. Ia dopa nakava sabana Ia nosabara nte komiu, Ia madota ala ledo maria saitoa tona rahuku sampe ri kasae-saena. DotaNa, ala pura-pura tona manggava loga majea lako ri dosara.

¹⁰ Tapi i Pue Yesus mpuu-mpuu makava mpanjili! KakavaNa ledo rasani-sani ntona, nasimbayu mpo kakava ntopangangga. Ri eo haitu langi malipo sanggani ante moni namangga mpuu mpo suu nu apu oge. Bo pura-pura anu naria ri langi maropu rakande nu apu, bo dunia ante pura-pura isina malipo sanggani.

¹¹ Jadi sampesuvu-sampesuvu, ane pura-pura anu naria kana maropu ivesia, berimbamo kita? Natantumo kita masipato mangoseaka dota nu Alatala bo matuvu ante pokainggu magasa.

¹² Apa kita hii nantongoraka Eo Potangara nipakatantu nu Alatala. Jadi kita kana mompasimbuku matuvu magasa ala Eo haitu masalisa makava. Ri Eo haitu langi maropu rakande nu apu bo pura-pura anu naria ri langi magonu ante kapanena.

¹³ Tapi kita mompopea anu nijanji nu Alatala, haitumo langi nabaru bo tana nabaru, raponturo ntona nanoa.

¹⁴ Sampesuvu-sampesuvu nipotoveku, komiu nompopea kajadia-kajadia haitu, jadi pasimbukumo ala pokainggumiu mabelo bo ledo maria anu rasalai atau mepakaeya ri panggita nu Alatala. Bo pasimbukumo matuvu mosinggabelo ante Ia.

¹⁵ Toramo, posabara nTupu nombadekei loga ka manusia rapakasalama. Ivesia muni nitulisi nu sampesuvuta i Paulus nipotoveta. Surana haitu nitulisina nangoseaka noto nidekei nu Alatala ka ia.

¹⁶ Ri pura-pura surana, pepatudukina nasimbayu nte anu nitulisiku ri bavona. Naria muni sanu tesana nakaja sakide rapaha. Tesana haitu nabiasa nitenggoaka ntona ledo natau bo tona ledo naroso pomparasayara. Ivesia muni nitenggoakara isi ntanina lako ri Buku Gasa. Tapi ira kana rahuku nu Alatala sabana pokainggura haitu.

¹⁷ Jadi sampesuvu-sampesuvu nipotoveku, nisanimiu mamimo kana maria tona mombatenggoaka tesa nu Alatala. Haitu sampe komiu kana mainga ala komiu ledo rakeni nu guru-guru mpodava mangoseaka pepatuduki nasala sampe domo maroso pomparasayamiu.

¹⁸ Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus

2 Petrus

Video 2 Petrus 3

Ikuti Kami:

KONTAK | PARTISIPASI | DONASI