Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi tinisiboso-bosono! Ne'enau 'ai surati nginika ma warasa ma modidi. 'Ai surati 'o ngai modidi ma dodaka ne'ena tosibaoroli nia di-dibangi 'iti-tiai.

² Ngoi toga'asoko la ngini niongano-nganono 'o demo-demo gee ma sira ma Jo'oungu ma Dutu wi nabii yositota-totara, de 'o besesongo ma Jouno, to ngone nanga Koana Wonasilaha-laha, gee nisitotarokau nginika ma ngekomo 'o su-suloko.

³ 'Isira-sira salingou ngini nianako, 'o 'orasi ma du'uruoka, 'asa yoboa 'o nyawa gee yo'ahu ka de to 'ona ma sirete manga nyafisuu yakiparetano. 'Ona 'asa nisiti-tingoono nginika,

⁴ yongose konee, "Bari ma Jou wojajiokau 'ato dua woboali! Ma 'orasi ne'ena kiaka 'una? To ngone nanga dea-dea yosongenokau, ma 'okia sonaa ka koge'enasi 'isoka gee 'o dunia 'isidadiosi!"

⁵ 'Ona ka 'ona manga singina yooluku yongaku 'ato ma sira ma Jo'oungu ma Dutu 'o diwanga de 'o tonaka wosidadi de 'awi demo. 'O tonaka ge'ena wosibaoro dau 'o 'akere ma dodade de wosidadi 'o 'akerino;

⁶ 'asa de 'o 'akere mita, ge'ena la 'o 'akere gee 'o ngu'uisi ma amokino, wosibinasa 'o dunia ma sirasi gee.

⁷ Ma 'o diwanga de 'o tonaka gee ne'ena naga, ma Jo'oungu ma Dutu mita wapaliarano de 'awi demo sigado dua wabinasa de 'o 'uku. Ma 'orasi ne'ena 'o diwanga de 'o tonaka kawapaliarasi sigado ma wange ya'adono 'o nyawa yoti-tingkai yakihukumu de yakibinasa.

⁸ Ma 'Esa moi, ne'ena moi 'uwa niamongoro, moteke ma Jou, 'o wange moi 'isoka 'o taunu caana moi, de 'o taunu caana moi 'isoka 'o wange moi.

⁹ Ma Jou koilatiwa wokula 'okia naga gee wojajiokau, ngaro munuka yongose 'ato 'ilati. Momongo 'una wosabari nginika, sababu 'una womau 'o nyawa ka moi ma 'uwa yobinasa. Womau la 'o nyawa 'iodumu yomaogoro 'o sowono yodiai de yolio 'unaka.

¹⁰ Duga ma Jou dua woboali ma 'orasi ge'ena 'o nyawa koyosikanakowa muruoka, 'isoka 'o nyawa yotosi-tosiki yoboa so ma 'orasi koposidongoowa. Ma wange ge'ena, 'o diwanga 'asa 'iisanga de 'ikuruusu, de 'o diwangoka ma kia sonaa yakoki'ukuoka, de 'o dunia de ma dodaka 'iodumu 'asa 'iisanga.

¹¹ Sababu ge'ena 'iodumu 'asa yatorou ma do-dagi koge'ena, so kokia salingou ngini nio'ahu? Ngini salingou nia 'ahu 'itebini de duga ka de ma Jo'oungu ma Dutu,

¹² ma 'orasi ngini nioda-dadanu niomau ma Jo'oungu ma Dutu 'awi wange ya'adonou. Ma 'orasi ge'ena 'o diwanga 'asa ya'uku 'ibootoka, de 'isauku so 'o diwangoka ma kia sonaa 'asa 'iwaro.

¹³ Ma ngone podadanu 'okia naga gee ma Jo'oungu ma Dutu wojajiokau, ge'ena la 'o Diwanga ma Sungi de 'o Dunia ma Sungi gee dua ge'enaka ngone po'ahu 'iti-tiai de ma Jo'oungu ma Dutu.

¹⁴ Sababu ge'ena 'Esa moi riaka dodoto tinisiboso-bosono, ma 'orasi nioda-dadanu 'o wange ge'ena, niomariwo de ma goungu nio'ahu 'itebini de nia dorou koi'iwa ma Jo'oungu ma Dutu wi bionoka. De niapaliara nia rimoi yaowa-owa de ma Jo'oungu ma Dutu.

¹⁵ Nia singinaka 'ato nanga Jou 'awi sabari ge'ena la 'o 'orasi winikula la 'idadi 'o laha niamake. 'O Paulus nanga 'esa moi gee towisiboso-bosono gu'una, wolefokau nginika koge'enali mita. 'Una wolefo ge'ena, de 'o barija gee ma Jo'oungu ma Dutuno wikulaka.

¹⁶ 'Awi surati 'iodumu ma dodaka, kaitaurika wolefo ge'ena. Ma goungu naga munuka 'isusa pasahe 'awi surati ma dodaka. De ge'enau yakakilioro 'o nyawa-nyawa gee ko 'okiawa yanako de gee manga ngo-ngaku koikuatuwa. Ma ge'ena kopoheranguwa, sababu 'o Buku 'Itebi-tebini ma bo-bula 'iregu-reguoka mita koge'enali yadiai. 'Okia naga gee 'ona yadiai ge'ena ma duanguku ka 'ona ma sirete yomasitorou.

¹⁷ Ma ngini 'Esa moi tinisiboso-bosono, nianakokau ge'ena. Sababu ge'ena, nimasitiari 'uwa sigado niakidomoteke 'o nyawa yoliba-libaka gee yoti-tingkai sigado ngini niootaka 'ania ngo-ngaku ma titioka.

¹⁸ Tanu ngini 'ifoloiosi niamao ma Yesus Kristus 'awi singina ma 'ofi, 'una ge'ena ma Jou de ma Koana Wonasilaha-laha. De tanu ngini mita kaifoloi monga wininako 'una. Powisiarene ma 'orasi ne'ena de kaisi'ado-'adonika! 'Amin. Koge'enau. Ngoi 'o Petrus, tinitabea!

2 Petrus

Video 2 Petrus 3

Ikuti Kami:

KONTAK | PARTISIPASI | DONASI