Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wali a’i-a’i to kuporayang, sura si’i to kadua to kutulisika komi. Wali songkangku tempo aku mangantulisika komi sura to kadua si’i, sewaju ewa songkangku tempo aku nangantulis sura to uyunya seore. Etu semo, re’e to aku rani mampatiendoka komi. Kamonsonya aku mangansani komi buya rayamu mampobuuka gombo i mPue Allah. Pei aku rani wo’u mampatiendoka resi komi,

² apa aku rani komi mangendo gombo to nato’o nto pantuntu tuntu i mPue Allah tempo owi. Pasi aku rani seja komi mangendo porenta to yako resi i Pue, to Pansompo ngkita, to naporataka ntau to pomakauNya resi komi.

³ Wali uyu-uyunya aku rani mampaponsanika komi mangkonong anu to damawali ri temponya mosumo danakarata i mPue. Wali tempo etu re’e tau to bampokore damasuwu. Tau etu damangika lengko ngkatuwu to ojo mangaluluka yau pamporani ndaya nsira.

⁴ Wali sira damampokore pangaya ngkomi, manganto’o, “Taa kojo monso i Yesu dama’i. Ia roomo mamparajanjika dama’i wo’u, wali gete, imbare Ia? Ia taa mangabanang parajanjiNya etu! To tu’angi ngkita roomo namate yau, pei lino si’i tare pombalinya. Apa samparia sewaju kojo ewa tempo rapapowali tempo owi.” Wali ewa wetu gombo ntau to mampokore pangaya ngkomi.

⁵ Pei kamonsonya lino si’i tamo sewaju ewa tempo owo rapapowali, apa i Pue Allah roomo mangahuku to lino tempo owi. Pei tau to manganto’o lino si’i tare pombalinya, sira mamporayaka ewa taa mangansani palaong i mPue Allah tempo Ia mampakaja’aka yau to lino mangampake samal ue. Wali manasa resi kita tempo i Pue Allah mampapowali yangi pasi lino ojo kuasa nu gomboNya to Ia mangampake. Tempo etu Ia mangika ue ruyu panewa tana masuwu yako la’u raya nue etu. Pasi saba yako ue etu see naka mawalimo tongku pasi lemba singkonong pei ewa wimba pamporani i mPue Allah. Pei yako etu i Pue Allah mangampake wo’u ue tempo Ia mampakaja’aka yau lino. Wali saba yako huku i mPue Allah, lino monso pu’u re’emo pombalinya.

⁶ (3:5)

⁷ Wali ewa wetu seja ri tempo si’i ane mangkonong parajanji to manganto’o Ia tiroo damangahuku to lino. Apa ojo kuasa nu gombo i mPue Allah semo to manta’amaka huku to damawali ri yangi pasi ri lino si’i. Pei monso pu’u Ia damampakaja’aka yau samparia to etu. Pei tempo etu si’amo ue to Ia damangampake, apu semo. Wali ane ratamo temponya tau to bo’onya mampatimonso Ia darabotus pasi darapakaja’aka yau, tempo etu panewa yangi pasi lino si’i damosi yau. Pei tau to bampokore bo’onya mampobuuka palaong to etu.

⁸ Pei a’i-a’i to kuporayang, aku rani mampakanasaka komi sabanya naka pei i Pue Allah tawa mampakaja’aka yau lino si’i ewa to Ia roomo manganto’o etu. Wali si’i semo sabanya, apa seo resi i Pue Allah sewaju pei sansowu nto’u resi kita to lino. Pasi sansowu nto’u resi i Pue Allah sewaju ewa seo kasaenya resi kita to lino. Wali resi i Pue Allah tare pasisalanya seo pasi sansowu nto’u.

⁹ Wali re’e tau to mampobuuka i Pue Allah malengi kojo mangabanang parajanjiNya. Pei si’a ewa wetu. Ojo kita to lino to mangepe malengi apa pampobuuka ngkita taa sewaju pei pampobuuka i mPue Allah. Wali kamonsonya sabanya naka pei i Pue Allah taa mansaka mampakaja’aka yau lino, apa Ia ojo mangansabaraka kita to lino see tiroo re’e temponya tau damajea. Apa Ia taa rani sako samba’a tau darapakaja’aka yau.

¹⁰ Pei tempo i Pue maporenta ri lino, tempo etu kodi majoli darata ewa naika nto palima rata ri banua ntau ri raya mburi. Wali tempo etu semo daradonge loo to ewa loo nu apu bae kojo panewa kodi majoli yangi dapaya yau. Pasi samparia to ndate yangi damabilis yau naika nu apu to mapoi kojo. Pasi lino seja damosi yau sindara-ndara pei samparia bananginya. Wali a’i-a’i, kita mangansani matantu kojo palaong to etu damawali, ewa to roomo naparajanjika i mPue Allah.

¹¹ Wali ane samparia to re’e paka darapakaja’aka yau ewa wetu, ane ewa see, wimba lengko ngkatuwu to masipato to danaika ngkita? To tao-tao kita mangika lengko ngkatuwu to mampakasanang i Pue Allah pasi to masipato naika ntau to Ia Puenya.

¹² Wali anu kita mangika lengko to ewa wetu ri rayanya kita mangampeas temponya i Pue maporenta ri lino. Pasi anu kita mampakadota mangaluluka i Pue see tempo etu majoli rata. Wali tempo etu semo yangi damosi yau pasi samparia anu to re’e damabilis yau naika nu apu to mapoi kojo etu.

¹³ Pei kita mangampeas anu to roomo naparajanjika i mPue Allah kita. Etu semo yangi to bou pasi lino to bou to danakaroos ntau to singkonong pei i Pue Allah.

¹⁴ Wali a’i-a’i to kuporayang, komi monso pu’u mangampeas tempo to etu. Wali ri rayanya komi mangampea, pakakoroka mangika lengko to taa mampakarikasika raya ngkomi, pasi to taa maya napakasala nsa’e.

¹⁵ Pasi ne’e rakalingan sabanya naka pei i Pue ngkita bae sabaraNya, see tau maya darapalaes. Wali ewa wetu seja to nato’o i mPaulus, a’i ngkita to taporayang. Apa ewa wetu to ia nangantulisika komi seore yako ri kapande to nawaika i mPue Allah ia.

¹⁶ Apa samparia sura to ia mangantulis paka ewa wetu gombonya tempo ia mampotunde mangkonong palaong to etu. Kamonsonya re’e to natulis i mPaulus ri raya nsuranya to masuli ransani. Wali tau to bea pasi to taa maroso pangaya nsira, tau etu mangawali yau batuanginya gombo i mPaulus etu ewa naika nsira ri tuntu i mPue Allah to yusa. Wali apa saba palaong to naika nsira etu, see naka sira darapakaja’aka yau, apa sira ojo mangewa anu to monso to nato’o i mPaulus.

¹⁷ Wali a’i-a’i to kuporayang, komi manasa yami mangkonong palaong to naika ntau etu. Wali see naka jagai kojo naka ne’e komi mangaluluka yau anu to sala to nato’o ntau to maja’a etu. Apa ane komi na’akal nsira, pangaya ngkomi tamo damaroso.

¹⁸ Pei to tao-tao komi mampakakoroka mampodongeka tuntu i mPue Allah see kanjo’u-njo’u tiduga-dugang pangansani ngkomi mangkonong kanoto i Yesu Kerisitu, Pue ngkita pasi to Pansompo ngkita. Pasi kanjo’u-njo’u komi tiduga dugang masinsani pei Ia. Wali anu kita mangabarong Ia mula yako tempo si’i rataka yau ri tempo to darata! Amin. Wali ungkanyamo gombongku si’i.

2 Petrus

Video 2 Petrus 3

Ikuti Kami:

KONTAK | PARTISIPASI | DONASI