Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tolano-tolanoo susue-lalai ngala lemin! Susulak ia nde bee soona, au susula kaduang fo au fe neu emi a. Nai au susula kaduang ia dalek, au tao atetea-ahehele emi dale ma, fo ela emi hapu dudu'a-aafi matetu-mandaa ka.

² Au oke, fo ela emi mafandendelek hala-kokolak fo, makahulu na Manetualain nabi nala kokola kasa, ma mafandendelek paleta neme Lamatuak fo Manek Mana Soi-Tefa ka, fo Lamatua ka hataholi nadedenu nala, tui-bengan neu emi a.

³ Makasososa na, emi muse bubuluk te, neu fai-fai mate'e kala te, neukose hataholi fo hihii-nanau nasa melun koasa la so'da nala, ala to'da mai,

⁴ fo ala kokolak lae leo ia, "Lafa'da lae, Lamatua ka helu nae, neukose Ana mai! Na, besak ia Ana mai de, nai bee? Ita ama kai nala, mate basas so, tehu basa hata lala'ena, bei sama leo makahulu na, fo nai lelek Manetualain nakadada'dik lalai a no daebafa ka boe."

⁵ Ta'ko ala ta nau manaku lae, makahulun eli, Manetualain nakadada'dik lalai a no daebafa ka ninik ka'da hala-kokolan mesa kana fa. Manetualain nakadada'dik daebafa ka neme oe a mai, ma no oe;

⁶ ma ninik oe boe fo nde, neme faa tuak matua ina mai de daebafak makahulun eli, Manetualain tao namopon.

⁷ Tehu no Manetualain hala-kokolan ndia boe de, lalai no daebafak besak ia nananakaboboik, soaneu fai makabui na, nanahotu henik ninik ha'i nai Fai Naketu-nala'di ka sama-sama no hataholi mangalau kala.

⁸ Tehu tolano-tolanoo ngala lemin! Boso mafandele heni dede'ak esa nde ia nae, tunga Lamatua ka mata memete na soona, faik esa, sama leo teuk lifun esa a'eneu Lamatua ka. Duas matak esa.

⁹ Amak Manetualain ta nakamama'ak fe hata fo Ana helu basa ka fa, leomae hataholi nggelok laedaenga leondiak. Dede'a nasafali na, Ana ta hae lai namanasa emi fa nana, Ana ta nau mate-mopo emi esa boen. Ana nau fo ela basa hataholi lala'ena, ala tuka tei-sale dale bee no'u leme sala-singo nala mai.

¹⁰ Tehu Lamatua ka Fai mamai na, neukose ana losa, sama leo nako ka. Nai faik ndia te, neukose lalai a mopo kana, no manggulu matua ina, ana da'di nai lalai, ma basa hata manai lalai a, neukose putu la'i esa kasa, boema daebafa ka no basa oe isin lala'e na, neukose mopo la'i esa kasa.

¹¹ Hu ka nde basa sila lala'ena, nanatao nakalulutuk ninik enok matak leondia ka, soona emi maso'da tao leo beek bai? Emi muse maso'da no ndoos ma malalaok,

¹² nai lelek fo emi mahani ma emi mahiik manseli, Manetualain Fai na ana losa. Neu faik ndia te, neukose lalai a nanahotu henik, ma hu ka nde ha'i ndia haa na, de basa hata manai lalai a lala'ena, neukose noe henis.

¹³ Tehu ita tahani hata fo Manetualain helu ka, fo nde lalai ma daebafa beu ka, fo nai bee hapu ka'da ndoos a, nai ndia.

¹⁴ Hu ndia, tolanoo susue-lalai ngala lemin! Nai lelek fo emi mahani Faik ndia, emi muse sanga enok te'e-te'e, fo emi so'da ma malalaok ma sala-singo tak nai Manetualain matan, Boema makaboboi emi tututi-nanatom no Manetualai na fo, malole nahele.

¹⁵ Bole tafa'da tae, Lamatua ka ta hae lai namanasa ita ndia nde bee na, Ana fe ita fai loak soaneu ita tuka tei-sale dale, fo daenga ita hapu so'da ka. Paulus, fo ita tolanoo susue na, ana sulak fe emi susulak nae leondia boe. Manetualain fen dudu'a-aafi manatee tenok, de ana sulak susulak ndia.

¹⁶ Nai basa Paulus susula nala dalek lala'ena, ana sulak tataas esa la'eneu dede'ak sila la. Memak nai Paulus susulan sila la dalek, hapu baba'ek de'u bee, ita ta talela kasa fa. Boema hataholi fo ta lalelak hata esa boen, ma namahehele nala beita latea-lahele fa, ala popo'de-papai baba'ek sila la, sosoa-ndandaan leona. Boso dodoo doak dede'ak ndia, nana hapu baba'ek nggelok nai Susula Malalaok dale boeo, hataholi sila la, ala popo'de-papais, tao leondiak boe. Tehu hataholi sila tatao-nono'in, nde nini fes momopo-mamates ndia.

¹⁷ Tehu ba'eneu emi fo, au tolanoo susue ngala lemin! Emi bubuluk basa dede'ak sila la so. Hu ndia de, manea matalolole, fo boso nalosak ala hela lini emi leo hataholi mangalauk sila dalek meu, fo emi tu'da meme emi mamana napadedei matea-mahele ma mai.

¹⁸ Ela leo bee na, Lamatuak Yesus Kristus, ma ita Mane Mana Soi-Tefa na, Ana fe baba'e-babatin neu emi, fo ela emi boetai malela kana. Koa-kion, neme besak ia, losa dodoo na! Amin. Ha'da-holomata neme ami, Petrus

2 Petrus

Video 2 Petrus 3

Ikuti Kami:

KONTAK | PARTISIPASI | DONASI