Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nebei aerene reyae a hokoukokale mai kena bekobe mokorembombe bele, roko benenne mai bokore reyae ei sului.
2 Rabuhine ban reyae mare kena beko yae mokorembombena, nde naei yae raei kena roungaisehinde? Mayae kena bekore mokombokamale yo yaere na hului raei kena rowensehimbe.
3 Reyae mai bokore erele hee mai baka ranne huluinye raei kena rowensehimbe yo yae raei kena bekobe mokonsebombe bele, bena homo nebei ma yae moloukokale. Raei kena elae hubanale raei kena rowensehinde mare mokorembombe mai kena rowenensimbe.
4 Nebei homore raei kena beko bele buhae angkala-angkala kowale nane merau ijoko ibo bele balewaisele yae moloukokale. Mayae kena bekore hubannele naeise nda a haraungebokale wamale ban, nebeibe mayae nanemene isaeyembombe raei kena buhae emekai bele mare haemalene.
5 Mai jemaatna u mekai bekore mokoukoke ro rare kena beko ebi mokoufeboke, nebeibe mare nanemene kena beko kaban mokombokembe. Nebei ro naeise reyae a helende elei.
6 Nebei u mekai ma rore mai nolona ro miyae helen mae a elae ukaungene mo, ehee bukulu na yun ran kaembaei ranne ninae wokaungele.
7 Mayae nda hee nebei kiyaele u mekai beko mokoubokere u benera nundenengkombe nane merau nebei ro kena beko hele yembondene wali horombonde belene, na kena u hara roronnembe.
8 Nebei aerene reyae moi huramale benen nebei kiyaere kena buhae haeunge u mekai ma yae nare kelennele.
9 Mayae na hele raeinya a yoni-yoni wamale huluinye hakaube mokaube naeise, umalire hubarensimbere reyae nebei homobe moloukokale.
10 Mayae nekaube holona yo hiwa nebei ro beko mokoubokere u benera nundennekombena, mai foi aerene reyae nebei role beko u benera nundensekonde. Walobo yun mon rowende aere mokommebonde naei me kelee u keleene nekemale belene, Wali Ondofolole ro be ro yoinye reyae nebei u mekai bekore u benera nundenaisekonde (u mekai beko na hele mokoubokena). Nebei a usaei wamale rabuhine ban walobo yun mae ro miyaere beko mokoumi me u yoni-yoni eyae aeisaei yaendebokene.
11 (2:10)
12 Wali Ondofolole na a foi faeu foise hufemilere Troas yore ekale hee, nebeinye kalia mokorele naeise Tuhan nibi kaeu-kaeu fele wekeungele.
13 Nebeibe reyae isaisa alalo kowale, rabuhine ban aei aka baeke Titus nebei yone ehubayeikoinye. Nebeinye Troas yora erele naei a nebeinya ro miyaere ukamaelera kulun ukale Makedonia kanire ewale.
14 ((Paulus nekewole heena yokeijore meleumihake fela yun na felayo bele rore kaenainyele naeise, nebei yona ro miyae nolore homone aloiboyate oyorowate. Nebeinye oyorowate hee yae o ha fololo bele ongkou wae eisayeyaimi hanewate.)) Reyae Allahre helen foi wanale rabuhine ban Wali Ondofolole walora eyae Allahle yokeijore melammile nane merau Wali Ondofolole a foi faeu foi nebei ongkou fololo faeungekoke beele wanen a hire a hire huweyate.
15 ((Nibi enene ro miyae fololo bele ongkoufe huneisiyate, isaeyaeiboke naei yona fela yun na yokeijore meleumihake.)) Allahle ro be ro yoinye maere Allah ukeume Wali Ondofolo yae walobo yunde meleungehake are ro miyaere huwammile yo nebei fololo bele ongkou wanen. Wali Ondofolore hila rabo haleyainyene wali hena bona u mekai hubanainyele yo bele hila rabo ehaleinye Allah bele wahaeikoke u mekai yae nekate yo bele u nolo u kainye ongkou fololo bele foisiyeunge wanen Wali Ondofololena a foi faeu foi huwemamile.
16 Ro miyae Allah bele wahaeikoke nekate yore, eyae no man fololo wanen, nebeibe wali hena bonare enainyehubande yore, eyae kembo fololo foi wanen. Ro miyae hiwa nda wanen u bene nekaimi, “Nebei kalia nde yae na hului emmokongkondere?”
17 Nebei Allah yae maere ukeume Wali Ondofololena a foi faeu foise ro miyae helen mae nai hei-sei rambun wanen mae mokainye ma yae meyae ehuwei, nebeibe Allahle ro be ro yoinye meyae Naei abu ako wanen mae maei u bene yolo-yolo yae mekai haranneboke huwayembe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA