Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Em sabapna maka nggo kuputusken la aku sahun reh ndahi kam gelah ula arah kerehenku e ka nambahi ate menek.

² Sabap adi menek atendu kubahan, ise nari nge erbahanca ukurku meriah? Tentu kam ka nge ngenca, si nggo kubahan menek atendu e.

³ Erdandanken si eme maka pernah mbarenda kubahan surat man bandu, gelah kune aku reh ndahi kam, la menek ateku ibahan kalak si kin arusna erbahan kuakap meriah. Sabap tek aku maka adi meriah ukurku, kam pe kerina meriah nge ukurndu.

⁴ Surat e kubahan alu ate ceda dingen pusuh sedak, rikut pe iluhku mambur erdire-dire. Kuturiken enda labo ateku gelah menek atendu, tapi gelah ietehndu maka tuhu-tuhu keleng kal ateku man bandu.

⁵ Adi lit kalak si erbahanca turah ate menek, si tuhuna kal labo ateku si ibahanna menek e, tapi kerina nge kam ibahanna ermenek ate, aminna deba la gia mekeleksa. Si enda kukataken gelah ula mberatca ukumen si ibereken man bana.

⁶ Teremen i bas kam nggo mereken ukumen si bage man bana. Nggo me bias si e saja pe.

⁷ Dage genduari arus ialemindu salahna ras ngapuli ia gelah ula ia gedap ibahan menek ate si bage sangatna.

⁸ Kupindoken man bandu gelah icidahkenndu maka tuhu-tuhu kam erkeleng ate man bana.

⁹ Surat e kubahan mbarenda man bandu, sabap ateku nguji kam ntah kin kam patuh man bangku i bas kerinana.

¹⁰ Adi ialemindu kalak si ersalah, aku pe kualemi nge ia. Sabap adi aku ngalemi salah kalak -- adi lit kin si perlu ialemi -- si e kulakoken i lebe-lebe Kristus guna kam kap.

¹¹ Si enda kulakoken gelah ula lit kesempaten man iblis guna ngkuasai kita, sabap sieteh nge kai sura-surana.

¹² Asum aku seh i Troas guna meritaken Berita Si Mehuli kerna Kristus, kudapeti maka Tuhan nggo nalangi pintun man bangku guna erdahin i je.

¹³ Tapi la teneng ukurku sabap la aku jumpa ras seninangku Titus. Emaka kenca aku erkata man kalak si i je, kuterusken perdalanenku ku Makedoni.

¹⁴ Tapi bujur ningku man Dibata sabap IbereNa kami ikut selaku tawanen i bas arak-araken kemenangen Kristus. Janah ipake Dibata kami guna pembarken pemeteh kerna Kristus ku japa pe bali ras bau kumenen si merim.

¹⁵ Sabap kami bali ras kumenen si merim si ipersembahken Kristus man Dibata, si mbar i tengah-tengah kalak si nuju ku keselamaten, bage pe i tengah-tengah kalak si nuju ku kebenen.

¹⁶ Nandangi kalak si nuju ku kebenen, kami enda bali ras bau si nandaken kematen; tapi nandangi kalak si nuju ku keselamaten, kami enda bali ras bau si merim si nandaken kegeluhen si tuhu-tuhu. Dage ise ngasup ndahiken dahin si bagenda?

¹⁷ Silang-langna kami labo bali ras nterem kalak si deban, si njajaken Kata Dibata guna keuntungenna jine. Tapi tujun kami murni kap. Emaka selaku kami kalak persuruhen Dibata, janah wakil Kristus, ibelasken kami kata ketuhu-tuhun selaku kalak si nggeluh i adep-adepen Dibata.

2 Korintus

Video 2 Korintus 2

Ikuti Kami:

KONTAK | PARTISIPASI | DONASI