Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu ge'ena ngoi 'ai singinaka dua kotaikawau nginika nako la taika de ka nia singina tasusa.

² Sababu nako nia singina tasusakau, ge'ena komoiwau 'ai singina yosikuata, ngano tomanganono ka ngini duga gee nia singina tasusakau 'idadi 'ai singina niosikuata.

³ Ge'enau so ngoi tinidusuratiokau nginika. Ngoi tooluku toboa nginika de 'ai singina niasusa, 'ena momongo nginiou salingou 'ai singina niosisanangi. Sababu ngoi tanako, nako ngoi 'ai singina 'imorene, ge'ena ngini 'Esa moi nioodumu niomorene mita.

⁴ Ngoi tolefo 'o surati gee tosidingo-dingoto nginika, 'ena 'ai singina 'isusa ma de 'itubuso, de 'ai kongoro kaipoau. To ngoi 'ai dumutu ge'ena ko nia singinawa tosisusa, ma 'ena tomau niasahe 'ato ngoi posironga tinisibosonoka.

⁵ Nako naga nginioka moi yodadi sababu 'ai singina 'isusa, ge'ena dau ma dodaka nginiosi 'o lo-lomu moi 'ifoloi 'ania singina 'isusa. Ma ngoi tooluku tosimimiti ge'ena.

⁶ 'O nyawa koge'ena yodi-diai ge'ena nia gudai nginioka naga niakitawanono yaowakau.

⁷ Ma 'orasi ne'ena ngini salingou 'uwau niosi-singina 'awi sowono, de 'awi singina niosikuata la 'una 'uwa kaifoloi 'awi singina 'isusa sigado 'i'ogu.

⁸ Sababu ge'ena ngoi toga'asoko, la ngini niosidumutoli 'unaka 'ato ma gou-goungu ngini winidora 'una.

⁹ Ngoi totulisi 'o surati nginika ne'ena ma dumutu la tanako kokia ngini, niamoteke bolo ko'uwa 'okia naa gee tinibesesongokau ge'ena.

¹⁰ Nako ngini winisipidili 'o nyawa gu'una 'awi so-sowono, ge'ena ngoi mita 'asa towisipidili 'awi so-sowono. Sababu 'okia naga bato 'awi sowono ge'ena ngoi 'asa towisipidili. Nako naga de ma 'ena salingou towisipidili, ge'ena ngoi tawisipidili ma Kristus wi bionoka ma ngale to ngini 'o lo-lomu moi 'ania laha.

¹¹ Ngoi tadiai koge'ena la 'o Tokata ma Koana 'uwa 'o 'orasi yamake ma ngale 'inapareta, sababu ngone panako to 'ena ma singina ma mau-mau.

¹² Ma 'orasi ngoi tototarika 'o Troasoka 'ai dumutu tositotara 'o Habari ma Owa ma ngale ma Kristus, ma Jou wapelengakau 'ai ngekomo ma ngale tomanarama ge'enaka.

¹³ Ma ngoi 'ai singina koisanangiwa sababu komimakamakewa de nanga 'esa moi 'o Titus ge'enaka doka. So ma rai tomasilo-loa ge'enaka dau ma nyawa-nyawaka gee, deika totagi 'o Makedoniaka.

¹⁴ Ma po'amalaha ma Jo'oungu ma Dutuka! 'Una kaitaurika misi'asa ngomi matero kamiomoteke miotagi 'o ngekomoko miomore-morene sababu ma Kristus 'ifoloi wokuata, ngano gee ngomi mio'ahu de de 'una. Ma Jo'oungu ma Dutu mipake ngomi la ma Kristus 'awi habari 'isidagi 'isoka 'o kianikia ma bounu yaowa-owa 'itagi kiaka naga bato.

¹⁵ Sababu ngomi ne'ena 'isoka 'o manyanyi ma bounu 'isure-sure, gee ma Kristus watuuku ma ngale ma Jo'oungu ma Dutu widutuuku. Gee 'o nyawa yootakou 'o bahayaku, 'ona ge'ena yamaoku ngomi ne'ena 'isoka 'o songene ma bounu gee kopatahanuwa. Ma 'o nyawa gee naga yosikaika 'o lahaka, 'ona yamaoku ngomi ne'ena 'isoka 'o kianikia ma bounu yaowa-owa gee 'inasi'ahu-'ahu. Komoiwa ya'akunu yatotomo 'o manarama ne'ena.

¹⁶ (2:15)

¹⁷ Ngomi 'isoka 'o nyawa yoku-kudaiwa, 'ona ge'ena 'o habari ma Jo'oungu ma Dutuno yadiai ka manga dolabutuou. Ma ngomi 'amia dumutu 'itebini. Ngomi miomarimoi de ma Kristus de ma Jo'oungu ma Dutu wosulokokau miositotara 'o habari ge'ena. De 'unau ma sirete wamake 'amia manarama.

2 Korintus

Video 2 Korintus 2

Ikuti Kami:

KONTAK | PARTISIPASI | DONASI