Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pertame-tame, sanget siq tiang tunas adẽq petunasan, do'e serte ucapan syukur tesampẽang tipaq Allah umaq selapuq dengan;

² umaq raje-raje dait umaq selapuq dengan saq bekuase. Tunas adẽq ite bau idup tenang dait tentrem dalem selapuq kesolẽhan dait kehormatan.

³ Nike saq solah dait saq nyenengang Allah, Juruselamette.

⁴ Allah kayun adẽq selapuq dengan teselametang dait mauq penenaoq mengenai kebenaran.

⁵ Sẽngaq, cume araq sopoq Allah, dait cume sopoq perantare antare Allah kance manusie, nike manusie Deside Isa Almasih.

⁶ Ie sopoq manusie saq sampun nyerahang diriq-Ne jari nebus selapuq dengan: Kesaksian nike tenyatayang lẽq waktu saq tepat.

⁷ Dait lantaran nike tiang sampun tetentuang jari dengan saq nyampẽang berite dait jari rasul serte guru umaq dengan-dengan saq ndẽq Yahudi lẽq dalem iman dait kebenaran. Napi saq tiang sampẽang niki setetune kenaq, tiang ndẽq beduste.

⁸ Tiang mẽlẽ adẽq lẽq sebilang taoq, dengan mame bedo'e dait nengadahang kedue imene saq suci, ndẽq tebarengin rase gedek atao betungkasan.

⁹ Maraq nike ẽndah dengan-dengan nine, harus ngerias diriqne secare sederhane dait kadu kelambi saq pantes. Ndaq ngengadu potongan bulu saq macem-macem ruene, atao periasan-periasan emas atao mutiare, atao kelambi saq mahel-mahel.

¹⁰ Sebalikne, dengan-dengan nine harus ngerias diriqne siq perbuatan-perbuatan saq solah, pade maraq saq telaksaneang siq dengan nine saq beribadah.

¹¹ Dengan nine harus tedoq dait patuh sewaktu nerimaq pengajahan.

¹² Tiang ndẽq ngijinang lamun dengan nine ngajah atao mrẽntah dengan mame; ie pade harus tedoq.

¹³ Sẽngaq saq penembẽq tecipteang nike Adam dait sesampun nike baruq Hawa.

¹⁴ Dait ndẽqne Adam saq tetipu, laguq Hawa, sehingge ngelanggar prẽntah Allah.

¹⁵ Timaqne maraq nike, dengan nine gen teselametang lantaran nganak, asal ie tekun lẽq dalem iman, kasih dait kesucian dait idup sederhane.

1 Timotius

Video 1 Timotius 2

Ikuti Kami:

KONTAK | PARTISIPASI | DONASI