Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Timotius, ngona ge'ena matero ka 'ai ngowaka ma dutu sababu ngone po'ahu de ma Jou! Ngoi 'o Paulus, ma Kristus Yesus 'awi su-suloko, tolefo 'o surati ne'ena. Ngoi todadi 'o su-suloko ge'ena moteke ma Jo'oungu ma Dutu to ngone nanga Ro-riwo Wonasilaha-laha gu'una de ma Jou Yesus Kristus to ngone nanga singina nganono 'igoraka. Toga'asoko la 'o barakati, de 'o simara'ai, de 'o singina ma sanangi 'o 'Aba ma Jo'oungu ma Dutuno de ma Kristus Yesusino, to ngone nanga Jou, naga de de ngona.

² (1:1)

³ Ngoi tomau la ngona nomanoa 'o Efesusoka 'isoka gee tosidemokau ma 'orasi ngoi totagi 'o Makedoniaka. Sababu 'o Efesusoka yamuruo naga yosidagi 'o do-dotoko 'isowo-sowono, so ngona salingou nakisuloko la yomaogoro.

⁴ De nakisidemo la 'uwau yogadunika 'o jarita ma faedaa koi'iwa-'iwa de 'o 'asali yosijarita koitoa-toakuawau. Gee ma duanguku duga kayomaributu moi de moi, de koitagiwa 'okia naga gee ma Jo'oungu ma Dutu womau wadiai, gee 'idadi panako duga ka de nanga ngo-ngaku 'unaka.

⁵ 'Ai demo-demo ne'ena ma dumutu la 'o nyawa 'idadi yamake 'o singina 'iti-tiai de 'itebi-tebini, de ma gou-goungu yongaku ma Jouka. De ge'enau 'ona 'idadi yomakadora de 'o nyawa 'ireguka.

⁶ Naga munuka koyamotekuawau koge'ena de yoliba naga 'o kaributuoka bolo 'o demo-demoka gee ma faedaa koi'iwa-'iwa.

⁷ 'Ona yomau yodotoko ma Jo'oungu ma Dutu 'awi besesongo 'ena momongo 'ona ma sirete koyasahewa 'o demo-demo gee yosibi-bicara bolo 'okia naga gee yosigou-gounguku yositota-totara.

⁸ Ngone panako 'o 'agama ma besesongo ge'ena yaowa, nako la pamoteke to 'ena ma dumutu.

⁹ De salingou pongano-nganono 'ato 'o besesongo 'isigutiku ge'ena ma dumutu ko 'o nyawa manga 'ahu 'iti-tiaikawa, ma 'ena gee 'o besesongo yapare-parenika, yoti-tingkaika, kayoitimaronga-rongaka, yosowo-sowonika, gee kowingaku-ngakuwa ma Jo'oungu ma Dutuka, kowimote-motekuwa ma Jo'oungu ma Dutuka, yoto-to'oma manga dea de manga 'esaka, de gee yoto-to'oma 'o nyawa 'iregu-reguka;

¹⁰ mita, gee yakika-ka'angarika, de gee yomakapake ka 'o nauru de 'o nauru, gee yotosi-tosiki, 'o nyawa yoelu-eluku, 'o ngeluku yosisa-sakisii, de nago'onaka bato gee yodiai 'okia sonaa 'imakati-tilikutu de 'o do-dotoko 'iti-tiai.

¹¹ 'O do-dotoko ge'ena naga 'o Habari ma Owaka gee 'isito-togumu ngoino tosikawasa, ge'ena la 'o Habari ma Owa ma Jo'oungu ma Dutuno gee woka-karamati de yadaene powisiie.

¹² Ngoi to'amalaha ma Kristus Yesusika to ngone nanga Jou. 'Una woikulakau 'o guata ma ngale towileleani, de 'una wamaoku ngoi yadaene ta'ao 'o manarama ge'ena,

¹³ ngaro ma sira towisigurubungu, towihalebiru, de towisiti-tingoono. Ma ma Jo'oungu ma Dutu woisimara'ai sababu ma 'orasi ge'ena ngoi kotongakuwasi so kotanakowa 'okia tadiai.

¹⁴ De nanga Jou 'awi singina posironga de 'isureka ngoino. 'Una woiriwo so ngoi towingakuokau 'unaka de takidora 'o nyawaka. Ge'enau wonakula ngone poodumino gee pomarimoiokau de ma Kristus Yesus.

¹⁵ Ma gou-goungu 'itiai 'o demo ne'ena, sababu ge'ena yadaene niadawongo de nia singina ma gou-goungu, ge'ena la: "Ma Kristus Yesus woboa 'o duniano ne'ena ma ngale wakisilaha 'o nyawa 'isowo-sowono." De ngoiou ne'ena 'o nyawa 'isowo-sowono ma dorou.

¹⁶ Ma sababu ge'enau ma Jo'oungu ma Dutu woisimara'ai, la ma Kristus Yesus 'idadi wosidumutu 'awi sabari gee ma batingi koi'iwa-'iwa ngoino 'o nyawa 'isowono 'ifo-foloi. De ne'ena 'imadadi 'o kasinaa moi 'o nyawa 'iodumika gee dua yongaku 'unaka de yamake 'o 'ahu ma dutu 'ika-kakali.

¹⁷ Ma Jo'oungu ma Dutu, 'una 'o Koana moi 'awi pareta koitogu-togumuwa. Tanu 'o nyawa 'iodumu wihoromati de wisiarene kaisi'ado-'adonika. 'Una kopowimake-makewa, woka-kakali, de ka 'una duga ma Jo'oungu ma Dutu! 'Amin. Koge'enau.

¹⁸ Timotius, ngona matero ka 'ai ngowaka. 'O manarama ne'ena tosito-togumu ngonaka, moteke ma Jo'oungu ma Dutu 'awi besesongo gee 'isidemosirakau ma sirasi, de 'o jamati ma balu-balusu yositotarokau 'o jamatioka ma ngale ngona. 'O besesongo ge'ena salingou 'imadadi 'ani dae gee kiaka naga nomariwo nosigou-gounguku 'ani manaramoka.

¹⁹ Nomariwo de nomasiga-gao 'o do-dotoko 'iti-tiaika de 'ani singina 'iti-tiai de 'itebi-tebini. Naga munuka koyakalesanguwa gee manga singinaka doka yamaoku 'itiai bolo ko'uwa, so manga ngo-ngaku 'itorouokau.

²⁰ Ge'ena dau ma dodaka ge'ena la 'o Himeneus de 'o Aleksander. 'Ona yamididi takihukumokau takisisarakani 'o Tokata ma Koanika, la 'ona yomadotoko yomaogoro ma Jo'oungu ma Dutu wisiti-tingoono.

1 Timotius

Video 1 Timotius 1

Ikuti Kami:

KONTAK | PARTISIPASI | DONASI