Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Timoteo, onogu sindruhu ba khõ Zo'aya. Sura andre moroi khõgu, Faulo, sinenge Keriso Yesu, bõrõ wareta Lowalangi, Sangorifi ya'ita ba fareta Keriso Yesu, tõtõnafõda. Ya Lowalangi Ama ba Keriso Yesu, So'aya ya'ita, zame'e khõu howuhowu ba sohakhõsi tõdõ ya'ugõ ba same'e fa'ohahau dõdõ.
2 (1:1)
3 Omasido na torõi ndra'ugõ ba Nefeso si mane si no uw̃a'õ sibai khõu me luo mõido ba Makedonia. Ufatenge ndra'ugõ ba wangiagõ Nefeso, bõrõ me so ba da'õ niha samazawili famahaõ si lõ atulõ, ba lõ tola lõ õbatogõ ira.
4 Amenesi ira ena'õ bõi sa'ae latõngõni hikaya si lõ boto ba fanutunõ nga'õtõ si lõ aetu'aetu. Fefu da'õ no samatumbu'õ fa'udusa manõ, ba lõ i'ohe niha ba wamati khõ Lowalangi awõ ba wanema hadia zi no Ifakhoi Lowalangi ba niha samati khõ-Nia.
5 Ohitõ dõdõ menemene andrõ ya'ia ena'õ so khõra dõdõ sohahau ba tõdõ ni'amoni'õ, ba famati si lõ tebulõ ba khõ Zo'aya, irege tola la'omasi'õ nawõra.
6 So õsa niha si no tenga si manõ sa'ae, elungu ira ba huohuo si lõ boto.
7 Omasi ira tobali samahaõ agama, ba sindruhunia sa, lõ aboto ba dõdõra wehede ni'oguna'õra ba ma ngawalõ niw̃a'õra si faduhu dõdõra.
8 No ta'ila wa huku agama andrõ sõkhi, na atulõ wangoguna'õ.
9 Moguna mutõngõni wa huku agama andrõ tefazõkhi, tenga ba niha solo'õ somasi Lowalangi, no ba niha sanawõ huku, ira niha si lõ sõkhi; ba niha si lõ aboto ba dõdõ So'aya, ba niha si lõ agama, niha sauri ba gulidanõ; ba niha samunu satuania; ba ba zamunu niha fefu,
10 ba niha sohorõhorõ, ba ba zohorõni awõnia ira matua, ba zanagõ niha; ba ba zolau faya; ba zamaduhu'õ sofaya, ba gofu haniha zolau ngawalõ zi lõ faudu ba wamahaõ sindruhu andrõ.
11 Famahaõ da'õ tesõndra bakha ba Duria Somuso Dõdõ si no tefaduhusi tõdõ khõgu ba wangombakha, ya'ia Duria Somuso Dõdõ soroi Lowalangi, ni'ebua'õ ba nisuno.
12 U'andrõ saohagõlõ khõ Yesu Keriso So'aya ya'ita, si no mame'e khõgu fa'abõlõ ba we'amõi enoni-Nia, ba si no manguma'õ tõdõ-Nia ya'o niha sinangea ba halõw̃õ da'õ.
13 Ya'odo me fõna ba no samakao, solohi ba sangosiwawõi Ya'ia. Ba hew̃a'ae si manõ, no Ihakhõsi tõdõ ndra'o Lowalangi, bõrõ me luo da'õ lõ mamati ndra'o khõ Yesu Keriso, tobali lõ aboto ba dõdõgu hadia nilaugu.
14 Ihõna khõgu na'i wa'ahakhõ dõdõ So'aya ya'ita. Ibe'e khõgu wa'abõlõ ba wamati khõ-Nia ba ba wangomasi'õ Ya'ia sindruhundruhu. Fa'abõlõ da'õ no Ibe'e khõda fefu, ya'ita si no sambua khõ Yesu Keriso.
15 No sindruhu wehede andre -- andrõ sinangea tatema ba tafati sindruhundruhu --: "No mõi ba gulidanõ Yesu Keriso ba wangorifi niha si so horõ." Ba ba gotalua niha si so horõ andrõ, ya'o zabõlõ lõ sõkhi.
16 Ba hiza, bõrõ da'õ na'i wa Ihakhõsi tõdõ ndra'o Lowalangi, ena'õ Iforoma'õ fefu wa'ebolo dõdõ-Nia Yesu Keriso khõgu, niha si no fondrege wa'ebua horõ andre. Tobali sambua dumaduma da'e ba niha fefu sedõna mamati khõ-Nia, ba wanõndra fa'auri si lõ aetu.
17 Lowalangi, Razo si no gõtõgõtõ wa'ara, sinangea nifolakhõmi ba nisuno, me no Ya'ia zi lõ tebulõ, si lõ oroma ba si ha samõsa! Yaduhu.
18 Timoteo, onogu! Halõw̃õ da'e ufaduhusi tõdõ khõu, molo'õ si no law̃a'õ ira sama'ele'õ me fõna nitandrõsaigõ khõu. Ena'õ õ'oguna'õ da'õ si tobali fangabe'eu ba wasõndrata si sõkhi.
19 Odõdõgõ si fao famati khõ Keriso ba tõdõ sohauhau. So sa õsa niha si lõ mangonangegõ li dõdõnia, irege adudu wamatira.
20 Ba gotaluania ya'ia ndra Hemenai'o ba Alesandro. Niha si darua andrõ no utou'õ ira ba danga Gafõkha, ena'õ tefahaõ ira ba wamõhõi fangositengagõ ba fango'aya Lowalangi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA