Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rat ni Paulus, rasul Keristus Yésus maya' ukum Allah Lun Nengulun netau idi Yésus Keristus luk mangun ku rapet tau —
2 Kuan Timotius, luk mangun ku anakku matu-matu bang anu: Do' katu idi éi' idi awang ratnan Allah Taman, temurun kuanmu, idi ratnan Keristus Yésus, Tuhan tau.
3 Kareb ui uned amé' Makedonia, ui pangeh nemutuh namu tudo déi' Epesus, pad iko miak mada' tuda'-tuda' lemulun aleg mada' sebuleng bada' luk baken.
4 Ngacuk nedeh ugka' pebala luk mo'-mo', idi bala luk ratnan inul luk na kekiped, luk ngacing kedaluh idi na ngacing pian Allah luk uen ngegala' ngaceku manu.
5 Ilung balaku, ieh ineh pad ngacing awa luk remuat rat bang niat luk meligan, teruayen niat luk do', idi anu luk matu.
6 Inan tuda'-tuda' lemulun luk numai ratnan amung-amung ini, idi luk lumi inan bala luk mo'-mo'.
7 Ideh sikal mangun ku guru Ukum Allah, iamo' ideh na kali' ilung anun-anun luk beléndeh idi luk uendeh ngamo.
8 Tau kali' idi Ukum ineh do', kudeng lemulun maya' neneh dengan luk petulu.
9 Ngerawé do'-do'! Ukum ineh baken kuan lemulun luk matu, iamo' kuan lemulun luk ngelaba ukum, luk na sikal maya' bala, luk na sembayang inan Allah, luk mesala', luk maya' ulun tana' ini, luk ngaté tamantinan idi luk ngaté nelun baken,
10 kuan lemulun luk pasét, idi deléi luk nganau' luk melutak arangdeh sebuleng, kuandeh luk naban lemulun, luk mebalih, luk pebulung ku luk mebalih, idi luk nganau' anun-anun pana' luk na petulu dengan bada' luk matu.
11 Bada' ineh lapen ratnan Bala luk Do' luk biré kuanku pad ui mada' ineh, ieh ineh Bala luk Do' ratnan Allah luk rayeh idi buren.
12 Idi ui ngubur Keristus Yésus, Tuhan tau luk pangeh nengetueh negku, ngaceku Ieh pangeh merapet negku, pad Ieh nengeletep negku kuan kekamen ini,
13 sagan pana' atun ui nenguyo Neneh, idi nengedereh idi nengedat Neneh. Iamo' Allah méi' negku ngaceku ui na manu, idi na kali' anun-anun luk pangeh inau'ku.
14 Idi Tuhan nengutang katuNeh luk mela kuanku, idi nemaré kuanku anu idi awa bang Keristus Yésus.
15 Bala ini matu idi petulu tu-tu miak lapen lemulun: ieh ineh Keristus Yésus pangeh nacing bang tana' ini sikal ngulun lun mesala'; idi rat arangdeh ineh ui luk meluun rayeh sala'.
16 Iamo' ini punneh Allah méi' negku, pelé bang negku luk meluun rayeh sala' ineh, Keristus Yésus miak ngegala' ulai niatNeh, idi ui miak mangun ku ayu luk nudin kuan amung-amung lemulun luk miak manu Neneh teh, macing inan ulun luk meruked.
17 Idi amung-amung dita' idi rayeh kuan Raca' luk meruked, luk na miak maté, idi luk na miak siren, ieh ineh Allaah luk Sebuleng, ruked-ruked peh! Amin.
18 Ini ukum luk ui maré kuanmu, O anakku Timotius, maya' amung-amung bala luk biré Tuhan atun ratnan iko. Do' iko makai bala ineh mangun ku repapehmu, kareb iko pebunu' bang bunu' luk matu,
19 idi do' iko lutep bang anu idi teruayen niat luk do'. Inan tuda'-tuda' lemulun luk na ngerawé teruayen niatdeh, idi anudeh nekusag.
20 Arangdeh ineh Himenius idi Iskandar, luk pangeh biréku kuan Sétan, pad ideh miak badén aleg nguyo Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA