Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ So 'Esa moi riaka dodoto, ngomi mioga'asoko la nio'ahu moteke kokia naga gee ma sira minisidotokokau nginika, la ma Jo'oungu ma Dutu wi singina yadaene. Ma goungu ngini niamotekokau koge'ena. Ma ne'ena de ma Jou Yesus 'awi kuasa, ngomi mioga'asoko miosigou-gounguku de minisibabata la ngini 'ifoloiosi nimariwo niamoteke.

² Ngini nianakokau kokia salingou nio'ahu 'isoka gee minisidotokokau nginika. 'O do-dotoko ge'ena ma Jou Yesusino.

³ Sababu ma Jo'oungu ma Dutu wi mau konaneda: Nio'ahu moteke ka ma Jo'oungu ma Dutu wi mau de 'uwa niomakapake kaitimaronga.

⁴ De ngini moi-moi salingou nianako, salingou nia wekata 'o ngai nimamo-moi, la 'ani 'ahu 'itiai de nihoromati.

⁵ 'Uwa niamoteke 'o nyafisuu ma dorou, gee 'isoka 'o nyawa kowinako-nakowa ma Jo'oungu ma Dutu yadi-diai.

⁶ Ma ngale ge'ena ka moi ma koidadiwa niakisihaga bolo niakisiliba nia 'esa moika. Sababu 'o nyawa koge'ena yodi-diai dua ma Jo'oungu ma Dutu wakihukumu moteke manga di-diai 'isoka gee ma sirasi miosidemokau nginika.

⁷ Ma Jo'oungu ma Dutu wona'asoko ge'ena ma ngale ko 'o nyafisuu ma dorouwa padiai, ma 'ena salingou padiai gee ma Jo'oungu ma Dutu wodua-duaka.

⁸ So nako nago'ona la yaitomo 'o do-dotoko ge'ena, ge'ena 'uwa niongose 'ato yaitomo ka 'o nyawa, ma 'ena wiitomo ma Jo'oungu ma Dutu gee wokulakau mita 'awi Ngomasa 'Itebi-tebini nginika.

⁹ Ma ngale ngone ka 'o ngo-ngaku moi pomakadora, ge'ena komialefowau 'o suratioka, sababu ge'ena ma Jo'oungu ma Dutu winisidotokokau nginika.

¹⁰ De ngini nimakadorakau de 'o nyawa-nyawa gee ka 'o ngo-ngaku moi de de ngini 'o Makedonia ma daeraaka yakilolituku. Duga ngomi mioga'asoko 'Esa moi riaka dodoto, la ngini 'ifoloiosi niomakadora.

¹¹ Nimariwo niomaka'asa yaowa-owa, de 'uwa nimada-datawongo 'o nyawa 'iregu manga hali. Salingou ngini ma sirete niomanarama ma ngale nianonu 'ania 'ahu, la 'uwa niomasinganono ka 'o nyawa 'ireguka, 'isoka ma sira miongosekau nginika. Nako ngini nio'ahu koge'ena, ge'ena 'o nyawa koyongaku-ngakuwa 'o Yesusika dua nihoromati.

¹² (4:11)

¹³ 'Esa moi riaka dodoto! Ngomi miomau la ngini nianako ma ngale 'o nyawa yosonge-songenokau ge'ena dua 'ona kokia. So minisidemo la 'uwa nia singina 'isusa 'isoka gee 'o nyawa koyongaku-ngakuwa, gee koyomangano-nganonuwau 'ato dua yakisiwangoli.

¹⁴ Ngone pongaku 'o Yesus wosongenokou de kawomomiokali; ge'enau so pongaku mita 'ato 'o nyawa yongaku-ngaku gee yosonge-songenokau ge'ena dua ma Jo'oungu ma Dutu wakisimomikoli, la yo'ahu de de 'una.

¹⁵ Moteke ma Jou 'awi do-dotoko, ngomi miomau minisidemo naneda: Gee ma 'orasi ma Jou Yesus woboali 'ena ngone gee kapowango-wangosi, dua kapomatuono de 'o nyawa gee yosonge-songenokau po'ahu de 'o Yesus.

¹⁶ Dua 'o mala'ekati ma balusu 'asa 'ima'orese yakua-kuatie de ma Jo'oungu ma Dutu 'awi torompet yauwaka ma ngale 'o pareta 'ikula ma no-nako. De ma Jou Yesus 'asa 'o sorogaaka de wo'uti 'o ngawa-ngawaku, de 'o nyawa yongaku-ngaku ma Kristusika gee yosonge-songenokau 'asa 'ona 'isira yakisimomiki.

¹⁷ Ge'ena 'ipasa de ngone gee kapowango-wangosi 'asa 'inagoraka ka ma moi de de 'ona 'o ngawa-ngawade powisibusuku ma Jou. De ngone 'asa pomanoa de de 'una kaisi'ado-'adonika.

¹⁸ Ge'enau so salingou moi de moi nia singina nimasikakuata de 'o demo ne'ena.

1 Tesalonika

Video 1 Tesalonika 4

Ikuti Kami:

KONTAK | PARTISIPASI | DONASI