Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kedungenna, o senina-senina, kam nggo iajari kami kuga arus nggeluh gelah sentudu ras peraten Dibata. Tuhu bagenda nge kegeluhenndu gelgel nari. Janah genduari ipindoken kami kal man bandu i bas gelar Tuhan Jesus dalankenlah lebih asa si e!
2 Sabap ietehndu nge pedah si ipeseh kami man bandu alu kuasa Tuhan Jesus.
3 Sura-sura Dibata nandangi kam eme gelah kam iserapken jadi SikerajangenNa nggeluh la erlua-lua.
4 Kerina dilaki i tengah-tengahndu arus ietehna min kuga muat ndeharana alu cara badia dingen terpuji,
5 labo erpalasken sura-sura kula saja, bagi kalak si deban si la nandai Dibata.
6 I bas si enda, ula min ise pe erbahan salah nandangi senina si sada kiniteken ntah pe meneken ia. Nggo ikataken kami man bandu mbaru enda. Nggo ikataken kami man bandu alu terang-terangen maka kalak si ndalanken kesalahen-kesalahen si bage iukum Tuhan nge pagi.
7 Kita ipilih Dibata labo gelah nggeluh erlua-lua. Dibata ersura-sura gelah kita nggeluh badia.
8 Emaka kalak si nulak pengajaren enda labo manusia si itulakna, tapi Dibata si mereken Kesah Si Badia man bandu nge si itulakna.
9 Labo perlu isuratken kami man bandu kerna keleng ate nandangi teman-temanndu si sada kiniteken. Dibata nggo ngajari kam kuga kam arus sikeleng-kelengen.
10 Janah kerna si enda nggo idalankenndu nandangi kerina senina-senina si nggo tek man Jesus Kristus i belang-belang Makedoni. Emaka ipindo kami man bandu, o senina-senina dalankenlah lebih asa si e!
11 Usahakenlah nggeluh alu tenang, ula campuri perkara kalak si deban, janah erdahinlah guna keperlunndu, bagi si nggo ikataken kami nai man bandu.
12 Alu bage, mehamat me man bandu kalak si la tek man Jesus Kristus, janah la kam perlu ernalem man kalak si deban kerna keperlunndu.
13 O senina-senina, ate kami maka ietehndu min kuga si tuhuna kerna kalak si nggo mate, gelah ula ceda atendu bagi kalak si la erpengarapen.
14 Tek kita maka Jesus nggo mate janah nggo nggeluh mulihi. Bage pe tek kita maka kalak si nggo mate si tek man Jesus ibaba Dibata pagi ku Jesus gelah ersada ras Ia.
15 Pengajaren Tuhan si ituriken kami man bandu e me: Kita si nggeluh denga asum reh pagi Tuhan mulihken labo pagi silebei kalak si nggo mate.
16 Lit pagi sora erlebuh, sora malekat si mbelin ras sora terompet Dibata janah nusur me Tuhan i Surga nari. Kalak si nggo mate si tek man Kristus me pagin si pemenana ipegeluh mulihi.
17 Kenca bage maka kita si nggeluh denga paksa si e IpepulungNa ras kalak ndai i datas embun guna njumpai Tuhan i awang-awang. Kenca bage tetap kita ras Tuhan.
18 Emaka si apul-apulenlah kam alu kata enda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA