Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga dan indagunerij, dara dan indamouwerij, sug surad gini deinyor ouwedoc, kaba, emen emesulou yen. Hanoba emen emarougb yen dara goubesa namcir, dauntoba yen yemarges dau areg emen emens dou yen sug emen emugwengga desij yen sug nosa gin touwero. Doba yen yeicara yaimo augwan gini ucucugb terimda. Anai gini dau areg Allah esedeb naugb yenohob. Dangga hang, sug yen yesogwa deisa areg emen emesai dou yen gini terimda, kaba, eic dag yen yeic Allah medoc eigouhw dou en toua. Emen emesulou yen an dag gini, anai emen emeperwei maman Adehsud en mohw naugb ginohob. Dara emen emecinaga dag yen yaimo augwan gin touohob. Doba emen emouwan, kaba, yen yemarges debero, doba yen yeicara yaimo augwan gini beiseisaugb namcir.
2 Anai areg maman Adehsud Yesus en eigdoumesa emen emoho naugb sug emen emesai dou lusud, kaba, emen emens dau augwan gini dou yen sug nosa. Hang yen yemecinaga dag misen touohob.
3 Dangga hang, astesda dau yen, kaba, yen yemaiga hancob naugb yen meisira emebsa yen meisir mersouwer augwougblo. Anai gareg en eicara dag gin, kaba, aninim dag en aiga hancob naugb en eiyoho dau enohob. Dara yen meigdoc emetrij icira ligida gus aibibra aninim dag leng lohw meridgo dou Allah touwero. Doba astesda dau yen, kaba, yen yaimo ucina gecabeci dara areg eic Allah dara lusud merdoc geigouhw dou len an yen meisouwer dous. Anai Allah en emouwan naugb yen yemaimo ligida gus. Dara yen yemohw yen meijaga dou len gus aibibra touwero. Doba sug Allah ouci yen debinim naugb enohob, kaba, en ouwan naugb meijen geicara augwan edag beim an len gus terimda. Hang yen yemaimo areg graga augwan mougwa hom touwero. Doba yen yowun yenin meigdoc mes dau gin namcir. Anai emen emesulou yen dara emen dougwo yen dara goubesa sug nosohob dag gareg en eicara dag gini, kaba, Allah esedeb gogom medam deinaugb en namcir.
4 (4:3)
5 (4:3)
6 (4:3)
7 Dangga eigouhw naugb maman mamaimo areg gecgu touwero. Anai sug Allah eija maman aud en sug nosa, kaba, en emeija maman naugb sug maman maimo areg maman mamdoc etrij icira touwero. Doba en eija maman naugb maman maimo areg asesa enin medoc mes gin dous. Anai en ouci maman debinim naugb enohob.
8 Hang gareg dau yen en otogoto emen emir an gin, kaba, en emotogoto emen emusud misen emen emirero. Doba gini dag en otogoto Allah gedig en esa Mena Gogoufu gecabeci se yen meigdoc mes en mer ginohob.
9 Doba eisaugb aremer medoc gororougwim, kaba, dan demog dau gin dou yen ucucugwero. Anai Allah enin eng ens meijouhw dau augwan gin dou yen.
10 Hang yen yemaimo dangga an yen meijaguner dara yen meigdamouwer se yeng Makedonia meijen hancob augwan ingga touohob. Sug yen yaimo dag ginohob, kaba, emen emesulou yen dara goubesa namcir. Dauntoba yen yemarges deb touwero, doba yen yeicara dag gini beiseisaugb terimda.
11 Dara yen yemodo yen meijaga se len gus meren aremer touwero. Doba yen yowun yenin meigdoc mes naugb yen yeigtou dau gin namcir. Dara yen yemeisan gurog dau meijen areg yeic touwero. Doba yen yeic meijuwemougb esesa naugb yen meisira eicara an yenin terimda, aimo dau areg emen emarougb yen an sug nosohob.
12 Anai sug yen yeicara dag gin, kaba, leng medigo Yesus len lemowun yen meijoho an ara ara touwero. Doba len leigdoumesa yen meijoho an meijen geicara augwan gini terimda. Hanoba eic dag yen yemesa mougwisa len gus an ara ara touwero. Doba meijen ara ara edeinyum naugb yen touohob.
13 Dan indamouwerij, dara dan indagunerij, emen ememouwan naugb yen meiju emedgom dougwo maman mamsir leng Krisden gedig len ledatou debin len merug se cinogo mes touwero. Doba emen emouwan naugb yen yecinaga meijouhw augwan gini dag misen namcir. Dauntoba yen meigdoc emerij an leng lomom gini, aninim dag leng medigo Yesusero, doba yen meigdoc ebtou namcir. Anai len gin, kaba, len lemod merna debsa Allah dag en eigdoumesa len dau gomom ucugb deitero. Dangga hang, sug sud hom dau len en omomohob, kaba, len merdoc erij an en terimda.
14 Doba maman, kaba, maman macinaga dau sug Krisdus en omom sug nosa, kaba, dag en emomom namcirero, doba en eisa dau gomom ucugwohob. Sug maman macinaga gin dag misenohob, kaba, maman maod mamina debsa Allah dag gareng dau maman en medoc ebdebin an Krisdus. Hanoba en atou debin en mog se cinogo mes, kaba, en emomom terimda touwero. Doba Allah emeigdoumesa en, hanoba, ahwan en dig bogo naugb eni eigtou desij Krisdus sungga toua. Anai en edag hom dara enohob.
15 Dangga edebeij Lona Sug Maman Adehsud En Ecicugwen, kaba, maman gedig maman mamiresebaba, kaba, maman mameino leng latou debin len merug se cinogo mes gini len merin touwero.
16 Doba se Lona ingga, kaba, Allah en arougb men malaikad moho agas hom, en eino naugb en eiyaga mer medam. Hanoba en ohu Allah men higbei mougb nosahabi, maman Adehsud enin emouwaden dau bogo naugb en eigtou se bogo meniha naugb maman toua. Sug en eigtou sunggohob, kaba, Allah ebir leng merdoc ebdebin an Krisdus sug nosohob len laugwan leisa nosa.
17 Dau, kaba, en eigdoumesa maman gedig maman mamireseb se Lona ingga, aninim dara len naugb maman maugwan magasa dara maman Adehsud se umer taiba toua. Hang se Lona ingga, kaba, maman mamargesim toua deitero. Doba maman maigtou desij en beb huhugb namcir.
18 Dangga hang, yen yemeic yen meigdoc momogo ucan maman mamsir leng Krisden gedig len latou debin len merug gin touwero. Doba areg dan den dou yen gin, kaba, yen yecic naugb yaic gototo doum, dauntoba yen meigdoc aiyansem namcir. Anai areg dan den dou yen gin, kaba, dan demeic dau danin indoc mesero. Doba maman Adehsud enin eng ens meijouhw dau augwan gin dou dan. Hang dan demog dou yen toua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA