Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ari fahet siyag ane turuk lahebon obog toho hik esemek. Henele si uruk ane men indi piren teg lit inggik apmane larukon men ap enenggengge nangge lalep perukon men sibiling-sibiling ane urukon men imbisiyek.
2 Malik toron ket indag tarukon isinga ag eneg namin peruk hag toho hiren oho suburu poholmon fanowon ino eneg nul peruk lit naruk lamuhupmu henebe fit taruk lit weregma Allahn fanowap henebuhu.
3 Ninikni fano werehon ino hininggarehen nek harikipteg At fahet tem toho peruk lahep.
4 At helep ubule mondabi olukon hag toho yahoma aben oholoho hik isaruson ino Allahn eneg toho hiyaharisireg Olohotma yaho ferisiyon ino hiren oho hiyag ta lahup.
5 O wituk lit metka ambiyangma helep ineyon pilaptuk lahep hag toho Allah hime fanowon inowen o wituk lit helep ineyon metka ambiyangma emberuk hag toho hit kilap henebuhu. Indam imam inaben Allah fahet hubu lahaptuk latfag hag toho hit mangno roho fano wereg lit Yesus unuk uruk lit Allah hime fanowon hunubam weregma Allahn fano perukon emberuk lamuhup.
6 Wene atamon fam haharoho imbibahon tu, "Yet hemek, helep eneg toho warikikon ino o Sion fam yaho feruk lahimu helep ino ubule suwon aruhu. Ap san Ubam wenggel harukon inowen inggali hahu fug."
7 Hit Allah fam wenggel haruk lahebon arimanowen helep ari fano anggolo peruk lahep. Wenggel haruk elehon fahet haharoho imbibahon tu, "O wituk inaben helep tu siyag ulug hik isaruson ino ubule yag atisi.
8 Yag atisimu helep ino famen ap enembilan uwag fiyog toho unusuruk lit unuyug ahap fele roho kik tuhup." Allah wene holtuk eleg inap arimano Allahn tam pibahon hikit toho helep ino famen unuyug ahap fele roho kik turuk.
9 Hit arimano An nibam pumbuk amag ulug mumal heneptisimu ap suwonen Allah fahet hubu lahaptuk lit wel turuk inap imam hag toho hit welahep. Hununggul unuk fanowon fam hit suwal heneptisimu Allah umaliki atikipteg At ngi roho welahep. Hik tegma welatikipmu seleg tegma maniyek ulug Aren wol heneptisireg su ane hunubam turuk latisi ane fahet hiren ap winon hiyag isaruk lamuhup.
10 Hit atam wereg lit Allah umalikisi hag toho welatikip fug angge famen ketiya At umalikisi atikip. Indam Indi hisaruk latisi fug angge famen ketiya Indi anggolo hisaruk lit wereg.
11 Nori, hit pohon hinibam yugmu eleg angge welahebon nindi henesug lahiyon hunubam tot nele imin. Hunubabut atamon wereg lit mun angge man angge hilila peruk lahebon ariyen hinindi fanowon men seli roho welahepma henembol fil imbisiyek.
12 Allah unuk enepeleg inap sehelimu wereg lit fano ane eneg turuk lamuhup. It arimanowen hit fahet pabi ane turuk inap ulug henebug uruk halug hiren fano ane turukmu yet hisahupteg it inindi anggar aruhumu Allahn unggum kong tuhu sambil ino iren oho Allah wel turuk lamuhup.
13 Ninikni Allah unuk wenggeltuk lit ap suwon onotsi fer enesuhon enele holtuk lamuhup.
14 Ap suwon Kaisar palimu werehon amingmingangge arimanowen ap siyahon ininggik hele war enebuhupteg ap fanowon wel enebuhup ulug mon eneptisiyon arimano enele holuhup.
15 Allahn telep peruk ane iminon tu: Hiren fano ane turuk lit ap enepeleg inaben ket-ker ane uruk halug enembilik lar eneptuk lamuhup.
16 Enemu wereg lit seleg tegma welahe peruk inap hag toho welamuhup angge famen seleg tegma welahe ulug siyag ane fahet fano tehe peruk lit wel taruk inap hag toho welam fug angge Allah amingmingangge roho welamuhup.
17 Ap obog toho hi eneptuk lit honori hinindi enesug lit Allah fahet henekol toho wereg lit ap suwon Kaisar hi ruruk lamuhup.
18 Nori, hit ap enemingmingangge roho welahebonen hiniknisi enele holtuk lit henekol toho welamuhup. Hiniknisiyen fano ane urukon eneg holtuk lamuhup fug, enele piren toho uruk inap hiniknisi hag toho werehon oho enele holtuk lamuhup.
19 Ap eke ubam alem eleg angge famen unggum ubam emberuk lit inggaliyap turukmu Allah fam wenggel haruk lit fano nubam embehesa perukon ino Allahn indi reg lit wereg.
20 Siyag ane turuk lahebon fahet hunusuruk halug ap san indi hisahu? Fano ane turuk lahebon fahet hunusuruk halug Allahn indi anggolo hisaruk.
21 Kristus ino aben pinggi watfagma hit fahet war atfagma nit fahet wirimangge ulug hir oho At uyug mutug laruk lamuhuben Allahn wol heneptisi.
22 Kristus inowen siyag ane tuk fug angge Ele si uk fug angge welatfag.
23 Pet turukmu hebeloho per enepfag fug, watukmu hebeloho nga ibag fug. Ikni Allah suwon unggum pikit toho kong turuk Ahun ino eneg hiyag Itfag.
24 Niren siyag ane turuk laheyon arimano Aren umaloma ha ribareg teltuk ahen fam libagma e fam teloho watfag. Siyahon inowen nit sen nenesug lit weregma Kristus inowen pikir ane eneg turuk lit welamuhup ulug nininggik hele lol nenepfag. At mep toho watfag ane ariyen nit fano atukuk.
25 Indam wam domba longgo urukon hag toho welatikip angge famen suhuloho Hinikni ambeg waharikipmu Aren hinindi kul henebuhu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA