Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku ineh do' nala' amung-amung luk dat, amung-amung balih, siayu, temaruh, idi buri' luk dat.
2 Do' muyuh mepad kudeng anak luk baruh-baruh tinganak, idi do' muyuh melili ku rata luk ratnan roh, luk na pinuer, idi denganneh ineh muyuh miak mungar macing inan ulun.
3 Maya' kudeng luk inayud, "Muyuh pangeh nekali' idi Tuhan ineh mekatu."
4 Do' muyuh amé' matun Tuhan, ieh ineh Batu luk Mulun, sagan pana' tila' lemulun, iamo' pa kiung Allah pinili' idi meraga.
5 Do' muyuh amé' Neneh, mepad kudeng batu luk mulun, uen mudut mangun ku aceh ruma' luk ratnan Roh, idi mangun ku imam-imam luk meligan, idi maré luk ratnan Roh idi luk petulu dengan pian Allah, ngaceku ratnan Yésus Keristus.
6 Ngaceku pangeh inayud bang Surat Allah, "Ui miak nganau' aceh Batu luk meraga ku Batu Lidung bang bawang Sion; idi lemulun luk manu Neneh na miak migu'."
7 Batu ineh inan ulek luk rayeh kuan muyuh luk manu, iamo' kuan lemulun luk na manu: "Batu luk pangeh tila' lun luk mudut ruma' ineh, pangeh mangun ku Batu Lidung."
8 Idi teh, pangeh inayud, "Ieh ineh aceh Batu luk inan lun metebaceng, idi aceh Batu luk nganau' nedeh mebpeh." Ideh metebaceng ngaceku na maya' bala Allah. Kudeng ineh teh luk pian Allah kuandeh.
9 Iamo' muyuh ini aceh pupu luk pinili', idi imam-imam Raca', aceh inul luk meligan, luk pupu Allah sebuleng, pad muyuh miak mada' amung-amung do' Tuhan luk pangeh nenawar nemuyuh remuat ratnan dacem semuet bang acangNeh luk inan mawa.
10 Atun muyuh baken pupu Allah, iamo' nekini muyuh mangun ku pupu Allah. Atun muyuh na kali' éi' Allah, iamo' nekini muyuh pangeh nengalap éi'Neh.
11 O luk inanku mawa, ui mutuh nemuyuh mepad kudeng lun sakai idi lemulun luk tudo segageh bang tana' ini! Do' muyuh ngado burur muyuh ratnan amung-amung lili tana' ini luk pebunu' dengan ulun muyuh.
12 Do' kekamen muyuh arang lun pupu baken mesiri sirendeh, pad kareb ideh ngadu' nemuyuh, idi neten nemuyuh lemulun luk dat, na miak na ideh ngiti kekamen muyuh luk do', idi ngerayeh Allah kareb Aco Tuhan macing.
13 Ngaceku ratnan Tuhan, do' muyuh mebeneh pa liang amung-amung ukum luk inau' lutep kuan lemulun, do' kuan raca' ngaceku ieh luk pa luun,
14 do' kuan amung-amung lun luk ngimet, ngaceku ideh luk icuk raca' maré ua' kuan amung-amung lemulun luk nganau' luk dat, idi maré ubur kuan lemulun luk nganau' luk do'.
15 Ngaceku kudeng ini luk pian Allah: Ieh pian nemuyuh niep tang lemulun luk mebacé ku kekamen muyuh luk do'.
16 Do' muyuh mulun mepad kudeng lemulun luk pinuit dengan na makai puit ineh mangun ku luk ngakeb luk dat, iamo' mepad kudeng demulun Allah.
17 Maré dita' kuan amung-amung lemulun idi mawa kuan amung-amung kinanak. Matot inan Allah, idi maré dita' kuan raca'.
18 Do' muyuh demulun mebeneh ratnan tuan muyuh dengan amung-amung tot, baken kuan lemulun luk do' idi mawa mo', iamo' kuan lemulun luk megateh pana'.
19 Allah miak ngeperuan nemuyuh, ngaceku kekamen luk kudeng ineh, kudeng muyuh tuman ku dereh luk na petulu ineh, ngaceku muyuh kali' luk pianNeh.
20 Miakké muyuh buren, kudeng muyuh medereh ngaceku nganau' sala'? Iamo' kudeng muyuh nganau' luk do' idi medereh ku ineh dengan mulai niat, ini luk petulu pa kiung Allah.
21 Ngaceku muyuh pangeh tinawar kuan luk kudeng ini, ngaceku Keristus pangeh nemabeh dereh teh ngaceku muyuh, idi Ieh nenecan dalan kuan muyuh pad muyuh miak maya lawéNeh.
22 Ieh na nenganau' sala'. Seburur lemulun pana' na neninger balih remuat rat bang tangNeh.
23 Kareb Ieh pidat na Ieh nengua' dengan dat, idi kareb Ieh pidereh na Ieh nengatot nedeh, iamo' Ieh nemaré bururNeh kuan Allah luk ngukum dengan matu.
24 Keristus nemabeh amung-amung sala' tau bang bururNeh luun kayuh tepalang, pad tau pinaté kuan sala', idi mulun kuan luk matu. Idi ratnan uratNeh muyuh pangeh dino'.
25 Atun muyuh neraruh mepad kudeng dumba, iamo' nekini muyuh pangeh lemubed inan Lun Matar, ieh ineh Luk Ngimet ulun muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA