Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike, tetẽh lẽman diriqde selapuq saq jahat; selapuq tipu muslihat dait segale macem kemunapikan, talon atẽ, dait pitnah.

² Side harus jari maraq bebẽaq saq baruq tebijeang saq tetep bedak siq susu saq murni dait saq rohani. Siq care nike side pade gen jari sayan belẽq dait nerimaq keselametan.

³ Side tetu-tetu sampun ngeraseang mẽsaq bahwe Tuhan nike solah.

⁴ Keranaq nike, silaq parek tipaq Tuhan, batu saq idup. Nike batu saq tetetẽh siq manusie, laguq saq tepilẽq dait beraji lẽq arepan Allah.

⁵ Side pade batu-batu saq idup. Keranaq nike side pade tekadu ẽndah jari penganjeng gedẽng rohani, dait side pade jari imam-imam suci, saq ngaturang kurban rohani saq nyenengang Allah langan Deside Isa Almasih.

⁶ Sẽngaq lẽq dalem Kitab Suci tetulis maraq niki, "Setetune Tiang noloq lẽq Sion sopoq batu saq utame, saq tepilẽq dait beraji; dait dengan saq percaye lẽq Ie ndẽq gen teperilaq."

⁷ Batu nike beraji lẽq side pade saq percaye. Laguq lẽq dengan-dengan saq ndẽq percaye, berlaku ayat-ayat Kitab Suci niki, "Batu saq ndẽq tekadu siq tukang-tukang bangunan nike, sampun jari batu saq paling utame,"

⁸ dait, "Batu nike saq gen miaq dengan kedampes, batu saq miaq dengan geriq." Ie pade kedampes lantaran ie pade ndẽq taat lẽq Manik Allah. Maraq nike sampun tetentuang siq Allah mengenai ie pade.

⁹ Laguq side pade bangse saq tepilẽq, imam-imam saq ngelayanin raje, bangse saq suci, umat dowẽn Allah mẽsaq. Allah milẽq side pade dait ngemanikang side pade sugul lẽman taoq saq peteng jari tame ojok cahaye-Ne saq menah tandur, siq maksut adẽq side pade nyampẽang berite mengenai karye-karye-Ne saq luar biase.

¹⁰ Laẽq side pade ndẽqne umat Allah, laguq mangkin side pade sampun jari umat Allah. Laẽq side pade ndẽq teperiak siq Allah, laguq mangkin side pade nerimaq belas kasihan-Ne.

¹¹ Semeton senamian saq tiang kasihin! Side pade jari dengan pendateng dait musapir lẽq dunie niki. Keranaq nike tiang nasẽhatin side pade adẽq ndaq turut kemẽlẽq tabiat manusie saq beperang ngelawan jiwe.

¹² Side pade harus bedowẽ kelakuan saq solah lẽq tengaq-tengaq dengan saq ndẽq kenal Allah, sehingge lamun ie pade pitnah side pade teparan jari dengan jahat, ie pade bau serioq lẽman perbuatan side saq solah, sehingge ie pade gen mulieang Allah lẽq jelo kerauhan Tuhan.

¹³ Lantaran Tuhan, side pade harus taat tipaq sebilang manusie saq jari penguase; tipaq raje saq jari penguase paling utame,

¹⁴ atao tipaq pejabat pemrẽntah saq tepilẽq siq raje jari ngukum dengan saq gawẽq jahat dait hormatin dengan saq ngelaksaneang hal saq solah.

¹⁵ Sẽngaq Allah kayun adẽq siq perbuatan-perbuatan side saq solah side pade tungkem biwih dengan saq bodo.

¹⁶ Side pade harus idup maraq dengan merdẽke, laguq ndaq kadu kemerdẽkeande nike jari ngilipang kejahatan, laguq pade idup sebagẽ hambe Allah.

¹⁷ Pade hormatin selapuq dengan, kasihin semeton-semetonde, takut tipaq Allah, dait hormatin raje.

¹⁸ Semeton senamian saq jari hambe, pade tunduk lẽq majikande sehormat-hormatne; ndẽqne cume tipaq ie pade saq tulus angenne dait gerasaq, laguq ẽndah tipaq ie pade saq kejem.

¹⁹ Sẽngaq, nike rahmat Allah, lamun side pade lantaran sadar lẽq pekayunan Allah, sabar menderite lantaran perlakuan saq ndẽq adil.

²⁰ Sẽngaq napi pantes tepuji lamun side pade menderite hukuman saq seharusne side pade terimaq lantaran kesalaqan? Laguq lamun side pade menderite lantaran ngelaksaneang saq kenaq, nike aranne rahmat.

²¹ Nike lantaranne Allah manikang side pade. Sẽngaq Almasih mẽsaq sampun menderite demi side pade, dait siq care nike Ie ngicanin side pade sopoq teladan saq harus side pade turut.

²² Ie nẽnten uwah piaq dose, dait tipu muslihat nẽnten uwah sugul lẽman cangkem-Ne.

²³ Sewaktu Ie tesumpaq senaq, Ie nẽnten bebales nyumpaq senaq. Sewaktu Ie menderite, Ie nẽnten ngancem; Ie cume nyerahang pelekare-Ne lẽq Allah, saq ngadilin secare adil.

²⁴ Almasih mẽsaq saq nanggung dose-dosente lẽq dalem rage-Ne lẽq atas kayuq salib, adẽq ite saq sampun bẽbas lẽman kuase dose, idup bagi kebenaran. Leket-leket saq araq lẽq Almasih nike saq nyelahang side pade.

²⁵ Laẽq side pade maraq dombe saq sesat, laguq mangkin side pade sampun tulak tipaq Pengarat dait Pemeliharaq jiwende.

1 Petrus

Video 1 Petrus 2

Ikuti Kami:

KONTAK | PARTISIPASI | DONASI