Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lanri kammana, pela’mi sikontu apa ja’dalaka battu ri kalennu; tea’ mako a’balle-ballei pole, siagang tea’ mako assara-sarai. Teako pakimburui, siagang teako hinai parannu tau.

² Paralluko a’jari sanrapang ana’ lolo beru lassuka, tuli turerea ero’ angnginung je’ne’ susu rohani tenaya bengkoro’na, sollannu akkulle a’bakka’ siagang nipasalama’.

³ Nia’ tattulisi’ lalang ri Kittaka angkanaya, "Le’ba’mi massing nukasia’ ri kalennu, antekamma baji’na Batara."

⁴ Lanri kammana, battu mako mae ri Batara. Iami sanrapang batu mattallasaka, iamintu batu nipelaka ri rupataua lanri nakana tena matu-matunna; mingka nipilei ri Allata’ala a’jari batu lompoa anggaranna.

⁵ Ikau sanrapang ngasengko batu-batu mattallasaka. Lanri kammana paralluko ampassareangi kalennu untu’ nipake ambangung Balla’ rohaniNa Allata’ala. Lalang kammana anjo a’jari mako imang-imang mae ri Allata’ala lalang ri katallassannu; siagang tete ri Isa Almasi angngerang mako koro’bang rohani mae ri Allata’ala, iamintu koro’bang nitarima bajika ri atinNa Allata’ala.

⁶ Nasaba’ nia’ tattulisi’ lalang ri Kittaka angkanaya, "Le’ba’mi Kupile batu lompoa anggaranna, Kupadongkoka a’jari batu majarre’ ri kota Sion; na inai tappa’ ri Ia talamala’bayai pa’mai’na."

⁷ Anjo batua sanna’ lompona anggaranna untu’ ikau tau tappaka. Mingka tau tenaya natappa’, kammami anne nakanaya Kittaka mae ri ke’nanga, "Anjo batu tenaya napakei tukang-tukang bangunanga, ma’nassa iami batu majarre’."

⁸ Siagang "Iami anjo batua napattatto’roi taua, batu ampatu’gurukai ke’nanga." Tatto’roi ke’nanga lanri tatappakai mae ri kananNa Allata’ala. Kammami anjo le’baka Napattantuangi Allata’ala untu’ ke’nanga.

⁹ Mingka ikaumi bansa le’baka nipile, imang-imang allayania karaeng, bansa matangkasaka, untu’ KalenNa Allata’ala, siagang umma’ KalenNa Allata’ala. Napileko siagang Nakiokko Allata’ala assulu’ battu lalang ri sassanga untu’ antama’ ri singara’ kalompoanNa, sollanna nupa’la’bang biritta ri sesena sikontu panggaukang malompoNa.

¹⁰ Riolo teaiko umma’Na Allata’ala, mingka kamma-kamma anne umma’Na mako Allata’ala. Riolo tanikamaseangako ri Allata’ala; mingka kamma-kamma anne nutarimami pangngamaseanNa.

¹¹ Sikamma sari’battangku, sannaka kukarimangnginna! Ikau teaiko tuma’buttana anne linoa; ikau tau battu-battu jako. Lanri kammana, kupala’ tojeng-tojengi mae ri kau sollanna tena nanuturuki hawa napasu rupataua, tuli ambundukiai nyawaya.

¹² Musti sannaki nubajikinna panggaukannu ri tangnga-tangngana tau tenaya naassengi Batara. Sollanna punna napitinako ke’nanga angkana tau ja’dalakko, mingka musti napakkontutojengi panggaukang-panggaukang baji’nu; sa’genna lanapuji sallang ke’nanga Allata’ala, ri allo kabattuanNa.

¹³ Lanri Batara, paralluko mappilangngeri mae ri tau anna’galaka koasa: baji’ namae ri karaeng a’jari Kapala pamarentahang,

¹⁴ kammayatompa mae ri guburnur nisarea koasa ri anjo Kapala pamarentahang untu’ anghukkungi tau a’gau’ ja’dalaka siagang untu’ ampakalompoi tau a’gau’ bajika.

¹⁵ Nasaba’ Nakellai Allata’ala sollanna lanri nugaukanna panggaukang bajika nakkullemo nujempang bawana sikamma tau a’bicara salaya.

¹⁶ Paralluko a’jari tau bebasa’ lalang katallassannu; mingka teako pakei anjo kabebasannu untu’ antongkoki kaja’dallanga, passangalinna a’jari mako ata-atanNa Allata’ala lalang ri katallassannu.

¹⁷ Anggara’ baji’ ngasengi taua, siagang kamaseangi sari’battang parannu tu Karisteng. Mallakko mae ri Allata’ala, siagang pakalompoi Kapala pamarentahanga.

¹⁸ Sikamma sari’battangku a’jari palayanga, paralluko mappilangngeri baji’-baji’ mae ri pinggawanu; tena namae ri ia baji’ pa’maika siagang sombereka bawang, mingka mae ri ia pole sekkeka.

¹⁹ LaNabarakkakiko Allata’ala, punna sa’barakko angkasiaki panggaukang tenaya naadele’ mae ri kau, lanri nuassenna ero’Na Allata’ala.

²⁰ Nasaba’ apa kala’bianna punna sa’barakko angkasiaki hukkungang siratang memang todonga nutarima lanri kasalannu? Mingka punna sa’barakko antarimai kasessang antujuako lanri nugaukanna katojenganga, laNabarakkaki mako Allata’ala.

²¹ Untu’ iami anjo naNakiokko Allata’ala. Nasaba’ KalenNa Almasi le’ba’ tommi angkasiaki kasessanga untu’ ikau; na lalang kammana anjo Nasare mako conto sollanna nuturuki bateNa.

²² Tena nale’ba’ a’gau’ dosa, siagang tale’bakai nia’ tau allangngereki a’balle-balle.

²³ Ri wattunna nipali’boi, tena Na’balasa’ appali’bo. Ri wattunna sessa, tena Na’garatta’; poro Nabuangammi anjo parkaraya mae ri Allata’ala, Haking adeleka, sikamma kara-kara antujuai.

²⁴ KalenNa Almasi ampisangi sikontu dosa-dosata irate ri kayu sallika, sollanta akkulle bebasa’ battu ri kakoasanna dosaya, siagang nakiattallasa’ situru’ ero’Na Allata’ala. Loko’-loko’Nami Almasi ampamolleko ri garrinnu.

²⁵ Riolo sanrapangko gimbala’ tappelaka, mingka kamma-kamma anne le’ba’ mako nierang ammotere’ untu’ amminawang ri Pakalawakinnu siagang Pammarakainna nyawanu.

1 Petrus

Video 1 Petrus 2

Ikuti Kami:

KONTAK | PARTISIPASI | DONASI