Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sababu ge'ena niamada 'o sagala dorou naga nginioka; 'uwau nioeluku, 'uwau nioma'uca-'uca, 'uwau nimakataleana de 'uwa niakisito-torou 'o nyawa 'iregu.

² Ngini salingou nioduaka ma sala niosigisene ma Jo'oungu ma Dutu 'awi demo, 'isoka 'o ngowaka ma giau kaitaurika yodasawini manga 'esa ma susu. De ge'enau ngini 'asa kaisiika monga nia ngo-ngaku 'ikuata de nisilaha.

³ Sababu 'isoka 'o Buku 'Itebi-tebinoka 'isilefoku konee, "Ngini ma sirete niamaokau ma Jou 'awi singina posironga 'isureka."

⁴ So tanu nioboa ma Jouka, 'una ge'ena 'isoka 'o teto gee papake 'o woa podiai. 'Una 'o teto 'iwango-wango gee 'o nyawa kaya'umokou sababu yongose ma faedaa koi'iwa; duga ma Jo'oungu ma Dutu wairiki sababu wamaoku posironga de ma faedaaka.

⁵ De ngini 'isoka 'o teto 'iwango-wango gee 'isidiai ma Jo'oungu ma Dutu 'awi woa. Sababu ge'ena ngini salingou niomodeke nidiai ma Jo'oungu ma Dutu 'awi woa. De ge'enau ngini niodadi 'o 'imam-'imam gee duga ka ma Jo'oungu ma Dutu winileleani, de niositedene 'o su-suba ma Jo'oungu ma Dutuka gee 'awi singina yadae-daene, ma ngekomo ma Yesus Kristus.

⁶ Sababu 'o Buku 'Itebi-tebinoka 'isilefoku ma Jo'oungu ma Dutu wongose konee, "Ngoi towiirikokau wimoi matero ka 'o teto 'o ngai moi 'iba-baraguna, gee tanoa 'o Sionoka ge'ena la 'o teto ma owa, de 'o nyawa gee yongaku-ngaku 'unaka, 'asa manga singina kowa'oguwa."

⁷ 'O teto ge'ena ma faedaa 'iamoko gee 'o nyawa yongaku-ngakuoka. Ma gee 'o nyawa koyongaku-ngakuwa, 'o teto ge'ena ma faedaa koi'iwa 'onaka, 'isoka 'o Buku 'Itebi-tebini ma bo-bulaka 'ingose, "'O teto gee 'o woa yodi-diai koyapake-pakewa, 'imadadiokau 'o woa ma ba-bangini ma guata,"

⁸ de "Ma teto ge'enau gee 'o nyawa yomasipele-peleke, ma teto ge'enau so 'o nyawa yootaka." 'Ona yomasipeleke ma ngale wiitomo sababu 'ona koyongakuwa ma Jo'oungu ma Dutu 'awi demo. So 'ona koyongaku-ngakuwa ge'ena koge'enau ma Jo'oungu ma Dutu wositantuuokau.

⁹ Ma ngini ge'ena ma Jo'oungu ma Dutu 'awi 'umati gee winiiri-irikokau, 'o 'imam-'imam gee ma Koana winile-leleani, 'awi 'umati 'itebi-tebini duga ka ma Jo'oungu ma Dutu winileleani, to ma Jo'oungu ma Dutu ma sirete wi nyawa. Ma Jo'oungu ma Dutu winiiriki de wini'asoko niosupu 'o darusoka la niowosanga 'awi darangika gee posironga 'iletongoka, ma dumutu ge'ena la ngini niositotara 'o habari ma ngale 'awi manarama 'ila-laagomo.

¹⁰ Ma sira ngini ge'ena ko to ma Jo'oungu ma Dutuwa wi 'umati, ma ne'ena ngini to ma Jo'oungu ma Dutuou 'awi 'umati. Ma sira ma Jo'oungu ma Dutu 'awi dora koniamaowa, ma ne'ena ngini niamakekau.

¹¹ 'Esa moi tinisiboso- bosono! 'O duniaka ne'ena ngini 'isoka nioboano gee niogogere 'o nyawa manga tonaoka. Sababu ge'ena ngoi toga'asoko tosigou-gounguku, la ngini 'uwa niamoteke 'o nyafisuu ma dorou gee yalawani 'ania 'ahu de ma Jo'oungu ma Dutu wi mau.

¹² 'Ania gokoie de nia gogeruku naga 'o nyawaka gee ma Jou kowinako-nakowa, salingou posironga 'isureka, la nako 'ona nisigurubungu 'ato ngini ge'ena 'o nyawa 'iti-tingkai, 'ona 'asa manga singina yadaene 'ania manarama yaowa-owa, so 'ona 'asa wisiarene ma Jo'oungu ma Dutu gee dua woboa ma ngale wahakimi 'o nyawa.

¹³ Sababu ma Jou, so tanu ngini niakisingounu 'o pamareta 'iodumika, ma Koanika gee 'o pamareta ma amoko,

¹⁴ ma sangajika gee ma koana wigorakie ma ngale wakihukumu 'o nyawa manga manarama 'ito-torou, de wakihoromati 'o nyawa manga manarama yaowa-owa.

¹⁵ Sababu ma Jo'oungu ma Dutu womau la de to ngini 'ania manarama yaowa-owa, ngini niakidiai gee yobicara yohaga-haga kokiadewau yosiboa yobicara.

¹⁶ Tanu 'uwau ngini nisiyongosi, ma konioyongosuawau ge'ena 'uwa ka nia manarama 'ito-torou niosididumu, ma 'ena nio'ahu 'isoka kokia naga 'o nyawa gee ma Jo'oungu ma Dutu wile-leleani.

¹⁷ Niakihoromati 'o nyawa 'iodumu, niakidora nia 'esa moi gee yongaku-ngaku, winisitedene ma Jo'oungu ma Dutu, de winihoromati ma Koana.

¹⁸ 'Esa moi ngini gee niodadi 'o nyawa manga ro-riwo, tanu niaki'isene nia tuangika, 'uwa duga ka gee manga singina yaowa-owaka de 'ima-ma'aika, ma gee yoti-tingkaika mita.

¹⁹ Ma Jo'oungu ma Dutu 'asa winikula 'o barakati nako la ma sababu nionganonie ma Jo'oungu ma Dutu 'awi mau, so ngini niotahani 'o sangisara ma ngale nidiai koiloawa.

²⁰ Sababu ma faedaa koi'iwa niotongosono niosangisara ma ngale nihukumu ngano nia di-diai 'itorou! Ma nako ngini niotahani 'o sangisara nidutuku sababu nia di-diai 'iti-tiai, ge'ena ma Jo'oungu ma Dutu 'asa winikula 'o co-catu.

²¹ Ma ngale ge'enau so ma Jo'oungu ma Dutu wini'asoko. Sababu ma Kristus ma sirete wosangisarakau ma ngale winiriwo ngini, de ge'enau 'una wodadi 'o kasinaa la ngini niamoteke 'isoka 'una wodi-diai.

²² 'Una koma'iwa wosowono, de komoiwa yo'isene woeluku.

²³ Gee 'una widoana, 'una kowakidoanuwa. Gee 'una wisisangisara, 'una kowakisimodo-modonguwa 'ato dua wobalasi. 'Una kawosarakani 'iodumu ge'ena ma Jo'oungu ma Dutuka, 'o Hakimi 'iloa-loa gu'una.

²⁴ Ma Kristus ma sirete wamoku to ngone nanga sowono 'iodumu 'o salipoka, la ngone posupu 'o sowono ma paretaka de po'ahu moteke ma Jo'oungu ma Dutu 'awi mau. Ma Kristusou 'awi sangisara ge'ena so ngini nisilaha.

²⁵ Ma sira ngini 'isoka 'o domba 'iisangika, ma ne'ena ngini nisigilionou ma ngale winimoteke gee winiso-sowohi de winipa-paliara.

1 Petrus

Video 1 Petrus 2

Ikuti Kami:

KONTAK | PARTISIPASI | DONASI