Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sug yen yedag Allah mehir menau dag ginohob, kaba, yen yerba areg gecgu dara mog mog augwan dau yen namcir. Hang yen yemereiyara doum, dara yen yemeicara yemarerei len gus meriresi, dara yen meigdoc emetrij icira ara ara daum, dara yen yemowunim ucucugb toua deitero.
2 Doba yen meigdoc erleij naugb yen yebin Allah en mer areg Mena Gogoufu eic dou yenohob se yen meigdoc mes dous. Aninim dag godeh mahaniheni en mers emagad dau aring mohu touwero. Doba en mers ebdebin terimda toua. Anai sug yen yebin en mer gini se yen meigdoc mes terimda, kaba, yen yeiji dag lusud mos se Krisdus toua namcir. Hang maireseb menau geb huhugb emediyebeiya dau yen touwero. Doba Allah emeic dou yen toues.
3 Yen yeicara dangga, anai yenin yecinaga dag maman Adehsud, kaba, en medoc emecgwan yen mougwa hom touwero. Doba en medoc eigouhw an yen namcirohob. Gini esogwa deisa areg Daud en erba Ugwaremer an deb sug nosa touohob, endagai: Yen yenin yecinaga dag maman Adehsud Geis Huhugb gin, kaba, en medoc eigouhw an maman namcirohob.
4 Sug maman Adehsud en medoc eigouhw an yen dag ginohob, kaba, yen yemasid yenin dau en touwero. Doba yen yedag igdahab gedig maireseb menau naugb en toua namcir. Hanoba yen yen aud en, dauntoba en eic yen naugb en ahud yen dag Allah men tuari ogdoc Mena Gogoufu men goubesa gin toua. Yen yen aud en dag gini, anai enin eng edag buc mandeij gedig lusud lerbahaba deb dag emeigouhw naugb lahud meren tu touwero. Doba Allah, kaba, en ouci en deb dag buc mandeij mera eisaugb gedig en maireseb naugb eninohob. Sug yen yedag Allah men tuari dag ginohob, kaba, yen yedag gembala gesa taij gecabeci se men tuari gini naugb yen yeic areg geic Allah medoc eigouhw dou en sungga toua terimda, aimo dau areg Mena Gogoufu arautut yen aud gin toua. Anai yen yedag Yesus Krisdus men logodeh ginohob.
5 (2:4)
6 Augwan gini esogwa deisa areg Allah enara deb se Surad Injil Meb Mohon ogdoc Yesaya sug nosa touohob, endagai: Dan douci igdahab mera eisaugb hom debohob. Hanoba dan dogo dag buc mandeij naugb indan tuari se mengarougb, moho Sion, gin toua. Dangga gareg en medoc ebdebin an en, kaba, igdebes emeba en touwero, doba en eic mos namcir.
7 Dangga hang, naugb yen gedig yen meigdoc ebdebin an enohob, kaba, buc mandeij gini mera eisaugb naugb yen toua terimda. Doba naugb len gedig merdoc emebdebin an enero, kaba, areg sud hom en erba Ugwaremer an gin deb, kaba, esogwa deisa an lenohob. anai en enara deb, endagai: Igdahab areg lusud lerbahaba deb dag emeigouhw naugb lahud meren tuero, kaba, Allah eigdoumesa en dag buc mandeij bedreg dau igdahab gus augwan namcirohob.
8 Dara Yesaya enin toua og deb eisaugb gini se Surad Injil Meb Mohon deb sug nosa touohob, endagai: Igdahab gin, kaba, lusud letohob en. Hanoba len lobsara icira en toua. Len letohob igdahab gini, anai len merdoc emebdebin an enero. Dangga hang, Allah emesedeb len deb naugb len lobsara icira en namcir toua.
9 Doba yen, kaba, Allah ouci yen dag enin men meijouhuda. Dara en eigdoumesa yen dag enin men gembala gesa taij. Dauntoba yen yeic ara ara dag yauwaharo dou en terimda. Anai en, kaba, en edag mougt mera medam naugb yenohob. Hanoba en ouci yen debinim dag enin men lusud. Dauntoba yen yens dau men geigouhw dag ganusbus gini dou lusud laugwan toua. Anai en eija yen dau lobeigbogo naugb yen yeinesa men mouf gecabeci ginohob.
10 Anai sug nosa, kaba, yen yemedag men meijouhuda gin touebma. Doba iteitogin, kaba, yen yedag enin men meijouhuda. Dara sug nosa, kaba, en medoc emeineg an yen touebma. Doba iteitogin, kaba, en medoc eineg an yen namcirohob.
11 Dangga hang, dan indagunerij, dara dan indamouwerij gedig dan indoc gororougb yen, sug yen yedag lugmahara dara irinya se cinogo dag ginohob, kaba, dan desulou yen dara goubesa. Dauntoba yen yemaimo areg yen meigdoc etrij icira se cinogo gin toua deitero. Doba yen meigdoc obsara dau augwan gin namcir. Anai yen meigdoc etrij icira gin, kaba, ebemoc dou yen naugb aiyan yen terimda.
12 Dara meijen geicara deseino leng medigo Yesus, kaba, augwan toua edag beim namcir. Dauntoba sug len lowun yen meijoho dag yen meijug mogohob, kaba, len lemeicara lemaimo dangga an yen se Lona Sug Allah En Ecicugwen toua deitero. Doba len louma debin yen se Lona Sug En Ogod Aremer deinaugb lusud, kaba, dag meijen geicara augwan edag beim namcirohob. Anai len leiya dau meijen geicara geigouhw gini augwan sug nosohob. Hanoba len leigdoumesa Allah en moho an men geicara dou maman gin, kaba, dag augwan eigouhw touohob.
13 Dangga toua, sug mougt mera medam en arougb yen an ara ara, kaba, yen yemohoiya en mer touwero. Doba yen yaimo en mer toua terimda. Anai en moho eb taiba yen yaugwanohob. Dara sug en esa men gedeijan naugb len lesedougwo yen, kaba, yen yemohoiya len merir touwero. Doba yen yobsara dou len naugb areg len larougb yen an gin toua namcir. Anai en esa len aud yen naugb len leic gogom dou leng meru mog. Hanoba len leigdoumesa leng leicara edag beim len meroho toua. Dangga hang, yen yemedreg gareg en edag mougt naugb yen en mer an areg en arougb yen an touwero. Doba sug yen yedag maman Adehsud men lusudohob, kaba, yen yaimo len merir toua terimda. Dauntoba yen yemowun maman Adehsud en moho gin deseino len touwero.
14 (2:13)
15 Anai Allah en ouwan dau sug yen yeicara dag gin, kaba, dag leng meru edgom gin, kaba, len lemesmesman dara lemenara ceg ceg yen touwero. Doba meijen geicara geigouhw gini, kaba, eic dag ouf dougwo len merirs an yen namcir.
16 Anai yen yemedag Musa men gomnomna men sogougb deitero. Doba Krisdus eigdoc yen dau ginohob. Dangga hang, sug yen yedag lusud misenohob, kaba, meijen geicara aimo dag gin toua terimda. Doba yen yemeic lusud misen gini naugb yen yemaiyeiyo yen dougwo meijen geicara gecgu touwero. Doba yen yowun yenin meigdoc mes arjaga dag Allah men sogougb deit naugb yen yaimo areg en arougb yen an gin dous.
17 Dara yen yemowun sud hom en moho touwero. Doba yen yeigdoumesa lusud laugwan len meroho. Dara yen meigdoc mog mog an yen meijaguner dara yen meigdamouwer se Krisdus len touwero. Doba yen meigdoc gororougb len laugwan. Hanoba yen yahau dau Allah. Dara yen yeigdoumesa meijen mougt mera medam se cinogo gini en moho eb taiba toua terimda.
18 Dara yeng Krisden gedig yen yedag sogougb, kaba, yen yemeic meijus deseino meijen mougtir touwero. Doba yen yeigdoumesa len meroho eb taiba namcir. Hanoba yen yowun yenin meigdoc arjaga naugb yen yaimo len an areg len larougb yen an gini toua terimda. Dara yen yemeicara dag gin dou meijen mougtir gedig len merdoc arjaga dara len ledag isgwerec an yen dousero. Doba yen yeicara dag gin toua dou meijen mougtir gedig len lesenagan yen namcir toua.
19 Anai sug yen yauwam an areg Allah en ouwan, hanoba yen yemobsara dau ucina mog erij icira leng lesenagan meren geicara gin touwero, doba yen yes agadgeij namcir, kaba, Allah eic geigouhw dou yen toua terimda.
20 Anai sug yen yeicara gecgu, hanoba yen yes agadgeij sug len leic mog erij dou yen icira gin, kaba, gini emeigouhw dagiro? Doba sug yen yaimo areg meijen mougtir larougb yen an augwan asesohob, hanoba yen yes agadgeij sug len leic mog erij dou yen augwougb dous, kaba, Allah eic geigouhw dou yen icira gin toua terimda.
21 Anai sug en eija yen aud en sug nosa, kaba, en esedeb yen naugb sug yen yaimo ucina mog erij dag gin, aninim dag Krisdus enin toua aimo ucina mog erij naugb meijen sesar sug nosohob. Dangga hang, en eic gansins dou yen. Dauntoba sug yen yecinaga, kaba, yen yemobsara dau ucina mog erij areg yen yaimo augwougb gin touwero. Doba yen yesogwa deisa en mohotimei mohw se men ucina gini toua terimda.
22 Anai en, kaba, en emebesesar mougwa hom. Dara lusud louman, doba gereiyara dara gerba mohoisa hom emagunya dau en mers dou len touwero.
23 Dangga toua, sug lusud lenara gecgu dou en, kaba, en emenara gecgu ucucugb dou len. Dara sug len leic mog erij dou enohob, kaba, en emenara mog mog dag en eic mog erij ucugb dou len touwero. Doba en ogugwo aremer graga augwan se Allah enin mesira dous. Anai en ecinaga dau sug Allah ogod aremer aga lusud, kaba, dag en emobsara aud sud hom touwero. Doba en aimo augwan dara gedag beim an len dous.
24 Dara Krisdus enin eng ohw en mougt edug naugb oho sesar men gogom augwan se men medgomori taiba sogo salib dau mamanohob. Dauntoba maman mamireseb emeb se sesar deitero. Doba maman mamom dau gini naugb maman maimo areg asesa Allah enin medoc mes gin dous. Anai ogdoc Krisdus en mos ohubecbec gin, kaba, edeinyum naugb sug Allah eic yen meigdoc mes geingmos agauwesa dou yen ucugwohob.
25 Anai sug nosa, kaba, yen yedag domba gedig len laijahasero namcirohob. Doba iteitogin, kaba, Allah ahwan yen aud Krisdus gin ucugwohob naugb yen yaimo en terimda. Anai en eng meijen gembala gedig en agauwesa yen. Hanoba en esedougwo yen meijina dara geigouhw toua namcir.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA