Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iamo joo danggi'mo mipugauk bangngi to panggaukan gaja', danggi' mimangnguraga, danggi' mianggai'-gai'ri messipa' melo. Danggi' mimasere ati sola mpau gaja' tau.

² Apa la susira kamu' topea'-pea' mane' jaji to tuli mawakke bang madoang nniso' dadik massang, iamo to kadan-Na Puang Allataala. Na ia ke mipesa' tonganni to kadan-Na Puang Allataala, la masaranianmo kamu' ammisalama'.

³ Sanga den diuki' lan Sura' Allataala kumua, "Miperasaimo matumba to kameloan-Na Puang."

⁴ Ia to Puang Isa dipasirapang batu ariri petuo. Ia joo batu naca'beanmo tolino, nasaba' nasangai te'da bua'na. Apa ia ke Puang Allataala, nasanga kaminang makeangga'. Memmesa' penawa kamu' sola Puang,

⁵ ammimenjaji toda susi batu to napake Roh Allataala mpake'deh Bola Puang Allataala. Menjaji toomo kamu' susi imang to mpangjaman mandamo Puang Allataala. Na susi imang mangkaroba, la susi toda kamu' la mpangkaroban kalemi lako Puang Allataala susi to napatujuan kamu' Roh Allataala. Na ia joo karoba napumasannang Puang Allataala nasaba' Puang Isa Almaseh.

⁶ Nasaba' den diuki' lan Sura' Allataala, nakua Puang kumua, "Mangkamo' mpilei mesa' batu ariri keangga' to kupajio kota Sion menjaji batu ariri petuo. Na ia to tongkatappa'ii, te'da naladipakasiri'."

⁷ Gaja keangga' joo batu lako kamu' to tomatappa'. Apa ia to totangmatappa' napatu to diuki' lan Sura' Allataala kumua, "Ia to batu naca'bean pande bola, menjajimo batu ariri petuo."

⁸ Na "Iamo joo batu nanii titodo tau na buda tau nalolinan." Titodoi tuu lako tau, nasaba' cia'i ngkatappa'ii to kadan-Na Puang Allataala. Susimi joo to pura napattantu Puang Allataala lako kalena.

⁹ Apa kamu'mo to bangsa napileimo Puang Allataala, ammimenjaji imangna Raja to mipangjaman. Napupenjaji kamu' bangsa to disarakki jio mai bangsa laen ammimenjaji tau mesan-Na. Napileimo kamu' la mpangpeissenan panggaukan-Na to te'da susinna. Iamo ntambai kamu' messun lan mai kamasolangan, ammimentama kamasannangan to liwa' mejangngaran.

¹⁰ Ia tonna jolona tangngiapa kamu' umma'-Na Puang Allataala, apa ia tee too menjaji umma'-Namo kamu'. Ia tonna jolona te'da miperasaii to kamamasean-Na Puang Allataala, apa miperasaimo tee too.

¹¹ Ee, tomala'bihku' to kupakamoja'! Susi kamu' tomambela ratu sompa' lan tee lino natorro susi toratu lan tangnga-tangngana totangnturu' Puang Allataala. Iamo joo meta'da tonganna' lako kamu' kumua, danggi' mituru' bangngi to kamadoangan gaja'mi to tuli hhalangngi kamu' manggauk melo.

¹² Mbai den tau to tangnturu' Puang to mpau gaja' kamu'. Iamo joo la melo to sipa'mi nakitai tau kumua melo to apa mipugauk. Na undinna naakui kumua melo to sipa'mi anna mpakala'bih Puang Allataala ke ratui rra'tah kara-karana tolino.

¹³ La mituru' parentana sininna tomangparenta lan lino, nasaba' iamo nakadoangngi Puang. Mengkaturu' kamu' lako Tomaraja, nasaba' iara kaminang makuasa.

¹⁴ Mengkaturu' too kamu' lako gubernur to naangka' Tomaraja la ssessa tomanggauk gaja', apa la mpakala'bih tomanggauk melo.

¹⁵ Nasaba' pakkaeloran-Na Puang Allataala, na ia to panggaukan melomi la ntampun timunna to totangnnissenpa Puang mpau gaja' kamu'.

¹⁶ Mangkamo kamu' nala'paran Puang Allataala jio mai kuasa dosa. Iamo joo, danggi' mipakei to kadila'paranmi mpugauk buni kagajatan. Sibalikanna la nturu' kamu' pakkaeloran-Na Puang Allataala, nasaba' umma'-Namo kamu'.

¹⁷ Kasiri'i to sininna tau, pakamoja'i to padammi tomatappa', kalaja' kasiri'i to Puang Allataala, ammikasiri'i to Tomaraja.

¹⁸ Ee, kamu' to kaunan! Mangpesa'ding kamu' lako puangmi na la mikasiri'i, te'da na lako manda tomelo penawanna na mabassa, apa lako too tomaparrang.

¹⁹ Ia ke denni kaunan napa'dikkii puangna, moi nate'da nakasalan, la naingaran kumua la nabarakka'i Puang Allataala, ke sabbara'i, sanga naissen kumua nakabudai Puang Allataala ke sabbara'ki'.

²⁰ Te'da miladipuji ke sabbara' kamu' mperasaii to pangsessa to sipato' la mitarima sanga sala kamu'. Apa ia ke sabbara' kamu' mperasaii to pa'dik ngkanna kamu' nasaba' mpugauk kamu' kameloan, la nabarakka'i kamu' Puang Allataala.

²¹ Napileimo kamu' Puang Allataala mpugaukki susi joo. Moi Almaseh mperasai pa'dik ssulle kamu', anna menjaji palelean mata lako kamu' ammituru'i.

²² Te'da lalo napugauk dosa, te'da too naden tau ssa'dingngi kumua mangnguragai.

²³ Ia tonna kada-kadaii tau, te'da too napebalii. Ia tonna pa'dikkii tau, te'da too nagarra'i kumua la napabalahhii, apa sande' lako bangngi Puang Allataala, Tomangra'tah maruruh.

²⁴ Almasehra Ia mperasai kamaparrisan jao kaju sitamben nasaba' dosata', antala'pah jio mai kuasa dosa, antaturu' too pakkaeloran-Na Puang Allataala. Napamalagahki' nasaba' kamaparrisan-Na Almaseh jao kaju sitamben.

²⁵ Ia tonna jolona susi kamu' to bembala' lewa', apa ia tee too dipapolemo kamu' lako Tomangrewa to mpuinawa kamu'.

1 Petrus

Video 1 Petrus 2

Ikuti Kami:

KONTAK | PARTISIPASI | DONASI