Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nako naga nginioka yomakatasala de manga 'esa moi ka 'o ngo-ngaku moi, 'uwa yakikalaki 'o hakimika gee kowingaku-ngakuwa ma Jo'oungu ma Dutu. Ma 'ona salingou yoga'asoko ma Jo'oungu ma Dutu 'awi 'umati yakisikatiai.

² Ngini ma rai nianakokau 'ato ma Jo'oungu ma Dutu 'awi 'umati 'asa yahakimi 'o nyawa 'o duniaka ne'ena! Ngini ma rai nia'akunu niosikadiai 'o parakara ma di-dingoono.

³ Ngini nianakokau 'ato ngone 'asa pahakimi 'o sagala mala'ekati! 'Ifoloiosi 'o parakara ma di-dingoono gee 'o wange 'isinoi-noimi.

⁴ So nako la koge'ena 'idadi, 'uwa niaki'asa 'o hakimika gee kowingaku-ngakuwa ma Jo'oungu ma Dutu.

⁵ Ngoi kone'ena tongose la ngini nimaeke. Ma rai nginioka naga moioni yobarijakau yakisikatiai manga 'esa moi ka 'o ngo-ngaku moi gee yomakata-tasala.

⁶ Ma 'ipulutu so 'o nyawa yongaku-ngaku 'o Yesusika yotagi yakikalaki manga 'esa moi ka 'o ngo-ngaku moi gee koyongaku-ngakukawa.

⁷ Ngaro 'uwa sigado nimakakalaki 'o nyawaka gee koyongaku-ngakuwa, la ka ngini de ngini nimakatasala, ma ge'ena ma ngale niokalakau. 'Ifoloi yaowa ngini nidiai koiloawa bolo nisirugi!

⁸ Ma nginiou ma sirete 'ifoloi niodiai koi'adiluwa, nginiou ma sirete mita niakisirugi 'o nyawa 'iregu. De ge'ena niadiai gee kiaka naga ka 'o ngo-ngaku moi de de ngini!

⁹ Ngini nianakokau 'ato 'o nyawa gee koyamote-motekuwa ma Jo'oungu ma Dutu 'awi mau, 'asa koyodadiwa to 'una 'awi 'umati! 'Uwa niomaha-mahaka nisihaga! 'O nyawa gee yomakapake kaitimaronga, yasuba-suba 'o barahala, yoso-songou, gee yomakapake ka 'o nauru de 'o nauru,

¹⁰ yotosi-tosiki, yomadengo-dengoka, yaki'eto-'eto, gee yoduaka yakisito-torou 'o nyawa 'ireguka, de yosihaga-haga 'o nyawa 'ireguka. Yoodumu gee koge'ena yodi-diai 'asa koyodadiwa ma Jo'oungu ma Dutu wi 'umati.

¹¹ Ma sira yamuruo naga nginioka koge'ena yodi-diai. Ma ne'ena to ngini nia sowono koi'iwau. Ngini niodadiokau duga ka to ma Jo'oungu ma Dutu 'awi nyawa. Ngini nimarimoiokauoli de ma Jo'oungu ma Dutu, sababu ngini niongakuokau ma Yesus Kristusika de sababu 'o Ngomasa 'Itebi-tebinino ma kuasa.

¹² Naga 'o nyawa yongose 'ato, "'O nyawa 'iodumu kaidadi padiai 'okia naga bato," ma moteke ngoi 'okia naga gee kaidadi padiai ge'ena koiodumuwa de ma faedaaka. So ngaro 'o sagala moi-moi kaidadi tadiai, ma moteke ngoi, ngoi tooluku 'ena 'ipareta.

¹³ Naga mita yongose 'ato, "'O 'inomo ge'ena 'o pokoro ma bula, de 'o pokoro ge'ena ma ngale 'o 'inomo ma ngii." Ma ge'ena modidi 'asa ma Jo'oungu ma Dutu waisanga. 'O nyawa ma roese koidadiwa yosipake ma ngale yomakapake kaitimaronga, ma duga ka ma Jou wisileleani. De ma Jou 'asa wapaliara 'o roese ge'ena.

¹⁴ Ma Jo'oungu ma Dutu wisiwangokali ma Jou Yesus, koge'enali mita ma Jo'oungu ma Dutu 'asa wonasiwangoli ngone de 'awi kuasa.

¹⁵ 'Esa moi riaka dodoto, ngini nianakokau 'ato ngini ge'ena matero ka ma Kristus 'awi roese ma kia sonaa. So koidadiwa ngini moioni nimakapake de 'o ngeweka ma dorou sababu ge'ena koyadaenuwa.

¹⁶ De ma raiokau ngini nianakokau 'ato 'o nyawa gee yomasiganu-ganu de 'o ngeweka ma dorou, 'ona ge'ena ka moi de de 'ona! Sababu naga 'o Buku 'Itebi-tebinoka 'isitulisuku, "Yamididi go'ona 'idadi ka moi."

¹⁷ Ma 'o nyawa gee yomarimoi de ma Jou, 'ona ge'ena ka 'o singina moi de ma Jou.

¹⁸ Ka ma eta ma koya'akunuwa nimakapake kaitimaronga. Sababu 'o sowono 'iregu 'iodumu gee 'o nyawa yodi-diai ge'ena 'idadi ko manga roese ma siretekawa. Ma 'o nyawa gee yomasika'idu kaitimaronga, ge'ena ma ngale yodiai 'o sowono to 'ona manga roese ma sireteka.

¹⁹ Ngini nianakokau 'ato 'ania roese ge'ena 'o Ngomasa 'Itebi-tebini ma ngii. 'O Ngomasa ge'ena 'imanoa nginioka, de ma Jo'oungu ma Dutuou ma sirete wokula 'o Ngomasa ge'ena nginika. 'Ania roese ge'ena ko to nginiwa nia rongamoi. Ge'ena to ma Jo'oungu ma Dutu.

²⁰ Ma Jo'oungu ma Dutu nanga so-sowono watuusokau ma ngekomo ma Kristus wosongene, ge'ena ma ngale wini'ijakau, de nia 'ija watotomoka. Sababu ge'ena niapake niosidi-diai nia roese ge'ena la wisitedene ma Jo'oungu ma Dutu.

1 Korintus

Video 1 Korintus 6

Ikuti Kami:

KONTAK | PARTISIPASI | DONASI