Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ane re’e komi to masusa resi yunumu to samba’a pangaya, ne’e komi mangangkeni ia resi to pobotus to taa mangaya. Gete, palaong etu masipato rapokea. Wali to tao-tao mangkeni ia resi tau to i Pue Allah Puenya.
2 Ne’e rakalingan anu to room rapoguruka komi. Etu semo kita to i Pue Allah Puenya damangabotus to lino. Wali ane komi damangabotus to lino, komi masipato mangabotus palaong to taa bae kojo batuanginya etu.
3 Pasi ne’e seja rakalingan kita damangabotus pomakau i mPue Allah yako ri saruga. Wali ane ewa see, ane ojo palaong ri lino si’i komi nukurang kojo mampakaroo.
4 Wali ane re’e kasusa ri oyo ngkomi, to tao-tao mangampilis tau to kodi kojo pangkanya yako ri oyo ngkomi to mangaya damangabotus palaong etu sakowa damangkenika to pobotus to taa mangaya.
5 Wali naka pei aku manganto’o gombo etu see komi mampokea. Wimba bara tare pasi samba’a tau ri oyo ngkomi to gana kapandenya mangabotus kasusa ri oyo mpua’i-pua’i to samba’a pangaya? Re’e pu’u tau to maya mangika palaong to etu!
6 Pei komi taa mangika ewa see. Ane re’e tau to masusa resi pua’inya to samba’a pangaya ia mansaka mangkeni palaong etu resi to pobotus, wali gete, tau to taa mangaya semo to mangabotus sira.
7 Wali kita to mangaya ane sangkani mangkeni yununta resi to pobotus, batuanginya kita sala. Kita raporapaka ewa tau to room nanangi yau, apa palaong to etu taa masipato naika ntau to i Pue Allah Puenya. Wali ewa see komi. Pei ane re’e yunu ngkita mangika palaong to sala resi kita bara mangantipu kita, to tao-tao ojo rabiaka sakowa mangkeni palaong etu resi to pobotus.
8 Pei komi semo to mangika palaong to sala pasi manipu, pasi palaong etu komi mangikaka pua’i ngkomi to samba’a pangaya.
9 Wali wimba, komi bara room nukalingan yau anu to rapotundeka resi komi seore? Etu semo, tau to sangkani mangika lengko to taa singkonong pei i Pue Allah, tau etu taa damangarata anu to matao to rawaika resi tau to Makolenya i Pue Allah. Wali ne’e mangantipu koromu. Apa tau to magoyal, tau to mampue tau-tau, tau to masala, pasi tau langkai to mampolengkoka lengko nto we’a, pasi tau to marongo paka to langkai bara paka to we’a,
10 tau to malima, tau to bamporomung, tau to banginu, tau to mampoja’a sa’e, pasi tau to manipu, samparia tau to ewa wetu taa damangarata anu to matao to rawaika resi tau to Makolenya i Pue Allah.
11 Wali seore re’e sangga’a komi to ewa wetu lengko ngkomi. Pei raya ngkomi room napakayongo i mPue Allah yako ri dosa. Pasi Ia room mangika komi mawali Ia Puenya pasi Ia room manganto’o tare dosa ngkomi. Naka pei Ia mangika palaong etu apa saba palaong to roomo naika i mPue Yesu Kerisitu pasi to roomo naika i Nosa Mapasing resi komi.
12 Wali re’e tau to manganto’o, “Ane kita to mangaya, kesaa to kita rani mangika, kita maya mangika.” Wali monso pu’u ewa rato’o etu, pei taa samparia to kita mangika to bae batuanginya. Kesaa to aku rani mangika, maya mangika, pei aku bo’ongku mangawaika pamporani ndayangku etu mangkuasang aku.
13 Pasi re’e wo’u tau to manganto’o, “Pangkoni raika daraposaka la’u raya ngkompo. Pasi kompo raika damangantima pangkoni.” Wali monso seja ewa rato’o etu, pei daratamo temponya i Pue Allah damampakapura samparia etu. Wali re’e komi to mampobuuka nempo kesaa palaong to kita mangika ri koronta si’i, taa mawei. Pei koro ngkita si’i naika i mPue Allah si’a darapake masala pasi magoyal. Koro ngkita naika i mPue darapake mangika pamporani to si Ia. Pasi Ia maroo ri raya ngkoro ngkita mangansawang kita.
14 Wali yako ri kuasa i mPue Allah, Ia nangawangu muni i Pue Yesu yako ri kapateNya, pasi Ia damangawangu muni seja kita yako ri kapatenta.
15 Wimba, komi bara room mangkalingan yau anu to rapotundeka komi seore? Etu semo to manganto’o, “Kita to mangaya, koro ngkita saga ngkoro i ngKerisitu semo.” Wali ane ewa see, wimba, bara matao kita mangampake koro ngkita to i Kerisitu Puenya si’i damangika palaong to maja’a resi lonte? Gete taa!
16 Wimba komi bara taa nunsani, tau ane mamporouka lonte, tau etu mawali samba’a koro resi lonte etu? Monso pu’u ewa wetu apa re’e ratulis ri raya ntuntu i mPue Allah mangkonong tau dua samboko, to’onya, “Tau dua etu damawali samba’aja.”
17 Pei tau to mawali samba’a pei i Pue, tau etu mawali samba’a tonii pei Ia.
18 Wali ane komi ragoda bara damagoyal bara masala, piyai yako ri palaong to maja’a etu. Apa samparia dosa to yusa to naika ngkita to lino, tare to kono ri koro. Pei i sema-sema to magoyal bara masala, dosa etu kono kojo ri koro to si ia.
19 Wali wimba komi bara room mangkalingan yau anu to rapotundeka komi seore? Etu semo to manganto’o, “Koro ngkomi mawali banua i Nosa Mapasing. Ia re’e resi komi apa nawaika i mPue Allah komi.” Wali Ia semo Pue ngkomi, si’amo komi ngkalio puenya
20 apa komi roomo inoli yau pasi nalinomo ibayar. Wali see naka masipato komi mangampake koro ngkomi pasi tonii ngkomi anu to i Pue Allah Puenya damanga’angga i Pue Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA