Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ (I.) Tarbege do, masa parmainanon di hamu; jala gari di sipelebegu, gari so masa sisongon i, pola diparjolma nioli ni amana.

² Tong dipatimbo hamu do dirimu; nda balik marsak ma nian hamu, asa pinabali sian tongatongamuna na mangulahon na songon i!

³ Ai anggo ahu, nang holang pamatangku, di tongatongamuna do ahu mangihuthon partondion: Nunga songon na di tongatongamuna ahu, manguhum na mangulahon sisongon i:

⁴ Marhitehite Goar ni Tuhan Jesus, di na pungu hamu dohot tondingku, mardongan hagogoon ni Tuhanta Jesus.

⁵ Pasahaton ibana tu sibolis, laho mangago dagingna, anggiat malua tondina di ari ni Tuhan Jesus.

⁶ (II.) Ndang denggan baritamuna. Ndang diboto hamu: Otik pe na asom i, diasomi do sude na niudi i?

⁷ Ias ma pabali hamu asom naung leleng i, asa na niudi na imbaru hamu, ai ndang na niasoman hamu. Ai nunga pola dibunu Birubiru paska humongkop hita, i ma Kristus.

⁸ Onpe, marpesta ma hita di bagasan hapolinon dohot hasintongan, unang ma marhitehite pangasomi hajahaton jala haroaon naung bari.

⁹ Nunga husurathon tu hamu: Na so jadi saor hamu dohot angka parmainan.

¹⁰ Ndang hudok sude parmainan na di portibi on ro di angka parangat dohot pandobo dohot sioloi ajiajian; aut i, ingkon ruar nama hamu sian portibi on.

¹¹ On do tahe hudok di surat i: Na so jadi saor hamu dohot halak na targoar dongan, hape parmainan do ibana, manang parangat, manang sioloi ajiajian, manang panginsahi, manang siparmabuk, manang pandobo pe; gari mangan rap dohot sisongon i, gari so jadi.

¹² Ai marhua ma ahu manguhum angka na di ruar (ni huria; nda angka na di bagasan siuhumonmuna!)

¹³ Uhumon ni Debata do angka na di ruar. Pabali hamu ma siparjahat i sian tongatongamuna!

1 Korintus

Video 1 Korintus 5

Ikuti Kami:

KONTAK | PARTISIPASI | DONASI