Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Si tuhuna nggo kubegi berita maka i tengah-tengahndu lit kalak perlua-lua. Janah perlua-lua si bage kalak si langa nandai Dibata pe ciga atena, eme: lit kalak si nggeluh erlua-lua ras ndehara bapana.

² Amin bage pe meganjang ka ukurndu! Kin min arus ceda atendu, janah si perlua-lua e arusna ipedarat i bas persadanndu nari.

³ Secara badan aku ndauh i bas kam nari, tapi ukurku lit i tengah-tengahndu. Nggo kuukum kalak si perlua-lua e, tempa-tempa aku tuhu-tuhu lit i tengah-tengahndu.

⁴ Kam kerina pulung i bas gelar Tuhanta Jesus, janah aku lit i tengah-tengahndu i bas ukur alu kuasa Tuhanta Jesus,

⁵ guna ngendesken si perlua-lua e man Iblis, gelah daging ras kerincuhenna ikernepken, guna nelamatken tendina i bas wari kerehen Tuhan.

⁶ Labo mehuli meganjang ukurndu! Ma ietehndu kin maka lit kuan-kuan ngataken, "Ragi si sitik isiarina cimpa e kerina?"

⁷ Arus dage iambekkenndu ragi si ndekah, eme dosa, gelah kam jadi cimpa si mbaru, si la itama ragi, bali ras roti Paskah Jahudi. Janah si tuhuna Paskahta nggo sikap, sabap biri-biri Paskahta nggo igeleh, eme Kristus jine.

⁸ Dage sirayakenlah pestanta, labo alu roti si lit i je ragi si ndekah -- ragi dosa dingen kejahaten -- tapi alu roti si la itama ragi, alu biak si bersih dingen benar.

⁹ I bas suratku si mbarenda nggo kukataken man bandu gelah ula kam erteman ras kalak perlua-lua.

¹⁰ Maksudku labo perlua-lua si la nandai Tuhan, ntah kalak rangap, ntah tukang kompas, ntah si nembah berhala, sabap adi isirangindu atendu kalak si bage, ndarat kam i bas doni enda nari.

¹¹ Dage si kumaksudken, ula kam erteman ras kalak si ngaku ia Kristen tapi ia perlua-lua, ntah rangap, ntah nembah berhala, ntah pengisak-ngisak, ntah pemabuk, ntah tukang kompas. Kalak si bage, man pe ula kam ras.

¹² Labo urusenku ngadili kalak si labo Kristen. Dibatalah pagi ngadili ia. Ma kin kam nge arusna ngadili anggota perpulungenndu? Bagi lit tersurat i bas Pustaka Si Badia, "Pedaratlah kalak si jahat i bas perpulungenndu nari."

¹³ (1Kor 5:12)

1 Korintus

Video 1 Korintus 5

Ikuti Kami:

KONTAK | PARTISIPASI | DONASI