Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Napi araq lẽq antare side pade lamun bepelekare kance semetonne, bani lumbar tipaq hakim saq ndẽq kenal Allah, dait ndẽq lumbar ojok dengan-dengan saq tehususang bagi Allah jari nyelesẽang pelekare nike?

² Napi side pade ndẽq nenaoq bahwe dengan-dengan saq tehususang bagi Allah gen ngadilin dunie niki? Jari, lamun mule side pade gen ngadilin dunie niki, napi side pade ndẽq sanggup nyelesẽang pelekare-pelekare saq ndẽq araq artine?

³ Napi side pade ndẽq nenaoq bahwe ite gen ngadilin malaẽkat-malaẽkat? Jari, lebih-lebih pelekare-pelekare kehidupan sebilang jelo?

⁴ Make, lamun araq pelekare-pelekare maraq nike, napi side pade ngelaporang tipaq dengan-dengan saq tetu-tetu ndẽq bedowẽ kedudukan lẽq dalem jemaah?

⁵ Merilaq gati! Pasti lẽq antare side araq sopoq dengan saq cukup bijaksane jari nyelesẽang masalah lẽq antare semeton-semeton seiman!

⁶ Napi araq semeton saq sopoq boyaq keadilan tipaq semeton saq lain, dait malahan lẽq dengan-dengan saq ndẽq seiman?

⁷ Araq masalah lẽq antare side pade doang sampun jari kekalahan umaq side. Bagusan side pade teperlakuang ndẽq adil, atao terugiang!

⁸ Laguq malahan side mẽsaq perlakuang dengan lain secare ndẽq adil. Side mẽsaq ẽndah saq ngerugiang dengan lain. Dait malahan nike side pade laksaneang tipaq semeton-semeton seiman!

⁹ Napi side pade nenaoq bahwe dengan-dengan saq ndẽq turut pekayunan Allah, ndẽq gen mauq bagian lẽq dalem Kerajaan Allah? Ndaq sesat! Dengan-dengan saq gawẽq perbuatan saq cabul, dengan-dengan saq nyembah berhale, saq bezinah, saq gawẽq cabul kance sepade jenisne,

¹⁰ saq memaling, saq serakah, saq girang bowos, saq girang pitnah dengan lain, dait saq meres dengan lain -- selapuq dengan saq maraq nike, ndẽqne gen mauq bagian lẽq dalem Kerajaan Allah.

¹¹ Pire dengan lẽq antare side laẽq bedowẽ kelakuan maraq nike. Laguq mangkin side pade tenyatayang bersi lẽman dose. Side pade sampun jari dowẽn Allah saq husus. Side pade sampun tejariang kenaq lẽq arepan Allah sehingge hubungan side pade kance Allah jari solah malik, nike lantaran pesẽngan Junjungan Saq Mulie Deside Isa Almasih dait lantaran Roh Allahte.

¹² Araq saq bebase bahwe sebilang dengan kanggo ngelaksaneang selapuq hal. Laguq umaq tiang ndẽq selapuqne araq manpaatne. Jari, timaq tiang kanggo ngelaksaneang napi juaq, laguq tiang ndẽq mẽlẽ ngalurang diriq tiang tekuasein siq napi juaq.

¹³ Araq ẽndah saq bebase bahwe keloran nike umaq tian, dait tian tesedieang umaq keloran. Laguq deduaqne gen temusnahang siq Allah. Awak manusie ndẽqne kanggo tekadu jari gawẽq perbuatan saq cabul, laguq cume jari ngelayanin Tuhan. Dait Tuhan gen meliharaq awak nike.

¹⁴ Allah sampun ngidupang Junjungan Saq Mulie Deside Isa Almasih lẽman ninggal, maraq nike ẽndah Allah gen ngidupang ite siq kuase-Ne.

¹⁵ Napi semeton senamian ndẽq nenaoq bahwe awakde nike anggote rage Almasih. Jari, napi kanggo tiang bait sopoq anggote rage Almasih, terus jariang ie anggote awak dengan saq jari pelacur? Ndẽqne kanggo gati!

¹⁶ Atao sang side pade ndẽqman nenaoq bahwe dengan saq bareng tindoq kance pelacur, jari sopoq kance pelacur nike! Sẽngaq lẽq dalem Kitab Suci tetulis, "Deduaqne jari sopoq."

¹⁷ Laguq dengan saq pesopoq diriqne kance Tuhan, Roh Tuhan kance roh dengan nike jari sopoq.

¹⁸ Jaoqang diriqde lẽman perbuatan-perbuatan saq cabul. Sẽngaq selapuq dose lain saq tepiaq siq dengan, telaksane lẽq luah awak dengan nike. Laguq dengan saq gawẽq perbuatan cabul, artine gawẽq dose tipaq awakne mẽsaq.

¹⁹ Napi side pade ndẽq nenaoq bahwe awakde nike taoq Roh Allah. Roh nike ndot lẽq dalem side pade. Dait Allah mẽsaq saq ngicanin side Roh nike. Diriqde ndẽqne dowẽnde mẽsaq. Nike dowẽn Allah.

²⁰ Side pade sampun tebeli dait tebayah lunas siq Allah. Keranaq nike, mulieang Allah kadu awakde.

1 Korintus

Video 1 Korintus 6

Ikuti Kami:

KONTAK | PARTISIPASI | DONASI