Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna Isa, "Sengko’ reya bungkana anggur se saongguna, ban Tang Rama tokang kebbunna.

² Sakabbiyanna Tang ranca’ se ta’ abuwa bi’ Rama eketthok, dineng ca’-ranca’ se abuwa ekorange dhaunna sarta eberse’e me’ olle buwana atamba lebba’.

³ Ba’na la berse polana Tang pangajaran se etarema ba’na dhari Sengko’.

⁴ Mara ba’na papaggun badha e dhalem Sengko’, ban Sengko’ pagguna badha e dhalem ba’na. Ranca’ dibi’ ta’ kera abuwa kajabana mon cekka’ ka bungkana. Bariya keya ba’na pera’ bisa abuwa mon ba’na paggun cekka’ ka Sengko’.

⁵ Sengko’ reya bungkana anggur, ban ba’na ca’-ranca’na. Oreng se paggun badha e dhalem Sengko’ ban Sengko’ badha e dhalem aba’na bakal bannya’a buwana; sabab mon tadha’ Sengko’ ba’na ta’ kera bisa apa-rapa.

⁶ Oreng se ta’ paggun badha e dhalem Sengko’, bakal ebuwanga akantha ranca’, laju kerreng. Ca’-ranca’ se kantha jareya bakal epakompola ban ebuwanga ka dhalem apoy, laju eobbar.

⁷ Mon ba’na paggun badha e dhalem Sengko’ ban Tang pangajaran badha e atena ba’na, nyo’on ka Rama apa’a bai se ekaterro ba’na; parnyo’onanna ba’na tanto ekabbuli.

⁸ Mon ba’na lebba’ buwana, Tang Rama eagungngagi; mon kantha jareya ba’na daddi Tang mored ongguwan.

⁹ Akantha Rama se taresna ka Sengko’, bariya keya Sengko’ taresna ka ba’na. Ba’na kodu teptep odhi’ menangka oreng se ekataresnae Sengko’.

¹⁰ Mon ba’na ajalannagi Tang ta-parenta, ba’na paggun esto ka Tang kataresna’an, akantha Sengko’ teptep esto ka kataresna’anna Rama polana ajalannagi kon-papakonna.

¹¹ Kabbi reya bi’ Sengko’ ekabala ka ba’na sopaja Tang kagumbira’an badha e dhalem atena ba’na, ban kagumbira’anna ba’na daddi samporna.

¹² Areya’ Tang parenta: ba’na pasaleng taresna, akantha Sengko’ se taresna ka ba’na.

¹³ Oreng se paleng taresna ka bat-sobadda iya areya oreng se ehlas mate kaangguy bat-sobadda jareya.

¹⁴ Ba’na reya Tang bat-sobat mon ba’na ngalakone apa se eparenta’agi Sengko’ ka ba’na.

¹⁵ Bi’ Sengko’ ba’na ta’ esebbuda dunor pole, sabab dunor reya ta’ tao apa se teppa’na elakone lorana. Bi’ Sengko’ ba’na esebbuda Tang sobat sabab pa-apa se ekaedhing Sengko’ dhari Rama, bi’ Sengko’ la ekabala ka ba’na kabbi.

¹⁶ Banne ba’na se mele Sengko’, tape Sengko’ se mele ba’na, ban nyoro ba’na entar man-dha’emman sopaja ba’na abuwa lebba’, iya areya buwa se ta’ bisa mate. Daddi bi’ Rama ba’na bakal eparengngana apa’a bai se epenta ba’na kalaban Tang nyama.

¹⁷ Areya’ Tang parenta ka ba’na: ba’na kodu pasaleng taresna."

¹⁸ "Mon ba’na ekabaji’i dunnya, kaenga’e ja’ Sengko’ la ekabaji’i kaadha’ bi’ dunnya.

¹⁹ Ja’ sakenga ba’na reya andhi’na dunnya, tanto ba’na ekaase’e bi’ dunnya menangka andhi’na. Tape ba’na epele Sengko’ dhari dunnya reya, daddi ba’na banne andhi’na dunnya reya. Jareya sababba ba’na ekabaji’i bi’ dunnya reya.

²⁰ Kaenga’e apa se la ekoca’agi Sengko’ ka ba’na, ‘Abdi ta’ kera alebbiyan dhari lorana.’ Mon Sengko’ ekaneyaja, tanto ba’na ekaneyaja keya. Mon reng-oreng e dunnya reya atoro’ ka Tang pangajaran, pangajaranna ba’na tanto etoro’ keya.

²¹ Ba’na kabbi bakal epakantha’a jareya bi’ reng-oreng dunnya reya polana ba’na Tang mored, sabab reng-oreng dunnya jareya ta’ tao ka se ngotos Sengko’.

²² Reng-oreng jareya ta’ kera dusa ja’ sakenga Sengko’ ta’ dhateng ban bi’ Sengko’ ta’ ebalai parkara jareya kabbi. Tape sateya reng-oreng dunnya reya ta’ andhi’ alasan pole kaangguy dusa.

²³ Oreng se baji’ ka Sengko’ baji’ ka Tang Rama.

²⁴ Ja’ sakenga e adha’na reng-oreng dunnya reya Sengko’ ta’ tao ngalakone pa-apa se gi’ ta’ tao elakone oreng laen, reng-oreng dunnya jareya ta’ dusa. Tape sateya reng-oreng dunnya reya la nangale’e apa se elakone Sengko’, ban reng-oreng jareya baji’ ka Sengko’ ban ka Rama.

²⁵ Tape pajat kodu kantha jareya sopaja kalakon se esebbuttagi e dhalem Ketab Hokomma reng-oreng jareya, iya areya: ‘Sengko’ ekabaji’i reng-oreng dunnya reya ta’ kalaban badha margana.’

²⁶ Sengko’ ngotosa ka ba’na Panolong se dhari Rama asalla. Iya areya Erroh se anyata’agiya pa-apa se bendher parkara Allah. Mon la rabu, Erroh jareya bakal aparenga kasakseyan parkara Sengko’.

²⁷ Ban ba’na kodu aberri’ kasakseyan keya parkara Sengko’, sabab ba’na la abareng ban Sengko’ dhari dha’-adha’na.

Yohanes

Video Yohanes 15

Ikuti Kami:

KONTAK | PARTISIPASI | DONASI