Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nakua omo Puang Isa, "Aku'mo garonto' anggoro' melo, na Ambe'-Ku' pangbara'bahna.

² Ia to tangke-Ku' to te'da namembua, nasembangngi Ambe'. Na ia to den buanna naalai pira' to daunna, nabajaii anna la'bi buda buanna.

³ Nabajaimo kamu' pangngajah-Ku' to mangka kuajaran kamu'.

⁴ La da'tan kamu' memmesa' sola Aku', kumemmesa' sola kamu'! Susi to tangke anggoro' te'da nakullei membua, ke te'dai nale'ke' jio garonto'na, susi todamo kamu' te'da mikullei membua, ke te'dai mimemmesa' sola Aku'.

⁵ Aku'mo garonto' anggoro', na kamu'mo to tangkena. Ia to tomemmesa' sola Aku', na Aku' memmesa' sola ia, iamo la membua buda. Nasaba' ia ke te'da mimemmesa' sola Aku', te'da lalo mikullei mpugauk apa.

⁶ Ia to tote'da namemmesa' sola Aku', la dica'bean lako salean, namerrangko susi rangko anggoro' to disembangngi. Ia joo rangko dirempun nadisumpun.

⁷ Ia ke da'tan kamu' memmesa' sola Aku', miingaran tooi to pangngajaran-Ku', moi apa mipeta'da lako Ambe', la naben kamu'.

⁸ Na ia ke membua budamo kamu', iamo dinii mpakala'bih Ambe'-Ku'. Pajan toomi kumua kamu'mo to ntongan-tongannii nturu'na'.

⁹ Susi Ambe' mpakamoja'na', susi toda Aku' mpakamoja' kamu'. Jaji la da'tan kamu' memmesa' sola Aku', angkuda'tan mpakamoja' kamu'.

¹⁰ Ia ke mituru'i to pakkaeloran-Ku', la da'tanna' mpakamoja' kamu', susi Ambe' da'tan mpakamoja'na', sanga nturu'na' pakkaeloran-Na.

¹¹ Kupauan ngasanmo kamu' tee, ammisamasannang-sannangna susi Aku'.

¹² Iamo tee parenta-Ku' to kumua, la sipakamoja' kamu' padammi rupa tau, susi Aku' mpakamoja' kamu'.

¹³ Nate'damo ia pangpakamoja' la'bi matonggo, na ia to pangpakamoja'na mesa' tau tompangben sunga'na naputuoi soba'na.

¹⁴ Kusangamo kamu' soba'-Ku', ke mipugaukki to kuparentan kamu'.

¹⁵ Te'damo kusanga kamu' kaunan, nasaba' ia to kaunan te'da ia naissenni to apa la napugauk puangna. Apa ia to kamu' kusangamo kamu' soba'-Ku', sanga sininna to apa mangka kusa'ding jio mai Ambe'-Ku', mangka ngasanmo kamu' kupauan.

¹⁶ Tangngia kamu' mpileina', apa Aku'ri mpilei kamu', angkusua kamu' male ammimembua buda, to bua te'da nalamasolang. Na ia to apa mipeta'da lako Ambe' mpau sangang-Ku', la naben kamu'.

¹⁷ Iamo tee parenta-Ku' lako kamu' kumua, sipakamoja' kamu'."

¹⁸ Mangngajahhimi Puang Isa nakua, "Ia ke nakaba'ci kamu' totangmatappa', ingaranni kumua la'bi jolona' nakaba'ci na kamu'.

¹⁹ Ia ke la taunna kamu' totangmatappa', tantu nakabudai kamu'. Apa tangngiamo kamu' taunna, sanga mangkamo kamu' kupilei lan mai tangnga-tangngana totangmatappa', iamo nakaba'ci kamu'.

²⁰ Ingaranni to apa mangkamo kupauan kamu', 'Ia to mesa' kaunan te'da nala'bi matande na puangna.' Jaji ia ke mangkamo' nasessa, moi kamu' la nasessa too. Na ia ke naturu'i to pangngajaran-Ku', la naturu' tooi to pangngajaranmi.

²¹ Na la nasessa kamu', sanga mituru'na' na te'da too naissenni to Ambe' to ssuana'.

²² Ia ke la te'dai kuratu nnajahhi tau, te'da nalamadosa. Apa ia tee too, te'damo nawa'ding mpessakkanni dosana.

²³ Ia to tongkaba'cina', ia toomo ngkaba'ci Ambe'-Ku'.

²⁴ Ia ke la te'dai kupugauk tanda mejangngaran lan tangnga-tangngana tobuda, to te'da napugaukki tau laen, te'da nalamadosa. Apa moi nakitamo to apa kupugauk, nakaba'cina', na moi Ambe'-Ku' nakaba'ci todami.

²⁵ Apa nang la susimi ia joo anna jaji to diuki' lan sura'na Nabi Musa kumua, 'Nakaba'cina', moiraka nate'da kupugauk dosa.'

²⁶ La kusua lako kalemi to tomangpakatana pole jio mai Ambe'. Iamo to Roh Allataala to la mpamanassai to pangngajaran tongan. Ia ke ratui, Ia mpangpeissenanna'.

²⁷ Moi kamu' la mipangpeissenan toona', sanga sola bangmiki' jio mai pamulanna.

Yohanes

Video Yohanes 15

Ikuti Kami:

KONTAK | PARTISIPASI | DONASI