Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Dona'ai mokuyang ing ginamu," guman i Yesus ko'i monia. "Popirisayadon ko'i Allah, bo popirisaya ko'i-Nakoí doman.
2 Kom Baḷoi Amaí-Ku nobayong tampat pogutunan. Aku'oi mayak intua sim moposadia kon tampat ko'i monimu. Aku'oi in diaíbií moguman kon natua aka kuma diaí natua in aidan-Ku.
3 Naonda in Aku'oi mayakdon moposadia in tampat ko'i monimu, Aku'oi buibií mamangoi monontomu ko'i monimu, simbaí kon onda in Aku'oi, kon tua doman i mo'ikow.
4 Kon onda im bayaían-Ku, kota'auan monimu in daḷannya."
5 Bo ki Tomas noguman ko'i Yesus, "Tuhan, diaí kota'auan nami mongo kon onda im bayaían i Tuhan, yo naondabií kota'auan nami in daḷannya?"
6 Ki Yesus notubag, "Aku'oibií na'a in daḷan kom monota'au ko'i Allah bo moko'ulií kong kobiagan. Diaíbií tobatuímai intau mokoyaput ko'i Amaí, aka diaí mongin i-Nakoí.
7 Aka kuma bo kinota'auandon monimu in Aku'oi, yo pastibií kong kinota'auan bidon monimu ing ki Amaí-Ku. Tana'a kinota'auandon monimu in Sia bo inontong domandon monimu in Sia."
8 Daí ki Pilipus noguman ko'i Yesus, "Tuhan, popo-ontongdon ko'inami ing ki Amaí, simbaí mopuasdon ing kami."
9 Ta'e ki Yesus noguman ko'inia, "No'onggotdon Aku'oi noyotakinmai monimu, bo diaípa doman kinota'auan-Mu in Aku'oi Pilipus? Intau inta ain noko'ontong ko'i-Nakoí, yo sia tua in noko'ontong domandon ko'i Amaí. Yo nongonu sin ikow i mogumanpabií, 'Po'ontongdon ki Amaí ko'inami?'
10 Pilipus! Diaí degaí ikow mopirisaya, kon Aku'oi notobatuí i Amaí, bo ki Amaí notobatuí takin-Ku? Onu im pinoguman-Ku ko'inimu na'a de'emanbií singog-Ku tontanií. Ki Amaíbií inta notobatuí takin-Ku, Siabií in nogaid kom bayongan tua.
11 Pirisayabií in singog-Ku tana'a, kon Aku'oi in notobatuíbií takin i Amaí bo ki Amaí notobatuí takin-Ku. Andeka paling kurang, pirisayadon lantaran onu inta ain inaidan-Ku.
12 Poguman-Kudon ko'i monimu: Intau inta mopirisaya ko'i-Nakoí, mogaidbií kon onu inta ain inaidan-Ku, sedang bo mo'iliubií kon tua in aidannya, sin Aku'oi im mayak ko'i Amaí.
13 Bo onukabií im po'igumon monimu podoyon kon tangoi-Ku, aidan-Kubií intua ko'i monimu, simbaí ki Amaí pomuliaan pongin i Adií.
14 Onukabií im po'igumon monimu podoyon kon tangoi-Ku, aidan-Kubií."
15 "Aka mo'ikow motabi ko'i-Nakoí, yo mo'ikow in dumuduibií kom parentah-Ku mita.
16 Po'igumon-Kubií ko'i Amaí, bo ogoian-Nyabií mo'ikow mototuḷung ibanea, inta umuran mogutun moyotakin monimu.
17 Sia tua in Roho i Allah inta mopo'ontong ing kabanaran soaáḷ ki Allah. Dunia na'a dia mokotarima ko'i-Nia, sim mosia diaí noko'ontong ande diaí nonota'au ko'i-Nia. Ta'e mo'ikow in nonota'aubií ko'i-Nia, sin Sia nogutun noyotakin monimu bo notobatuí takin monimu.
18 Mo'ikow diaíbií taḷaían-Ku tontanií naí uno-unon. Aku'oi i mamangoibií bui ko'i monimu.
19 Diaídon mo'onggot bo diaídon ontongon in dunia na'a in Aku'oi. Ta'e mo'ikow i moko'ontongbií ko'i-Nakoí. Bo lantaran Aku'oi nobiag, daí mo'ikow im mobiagbií doman.
20 Aka wakutunyadon, daí kota'auan bidon monimu kon Aku'oi in notobatuíbií takin i Amaí, mo'ikow notobatuí takin-Ku, bo Aku'oi notobatuí takin monimu.
21 Intau inta notarima kom parentah-Ku mita bo nopoaíid, sia tuata inta motabi ko'i-Nakoí. Bo Aku'oi im motabibií doman kon intau tatua bo mokipogontongbií ko'inia."
22 Ki Yudas ( de'emanbií ki Yudas Iskariot) noliboí ko'i Yesus, "Tuhan, nongonu sing ki Tuhan mokipogontongbií ko'inami de'emanbií kon dunia?"
23 Ki Yesus notubag: "Intau inta motabi ko'i-Nakoí, dumuduibií kon totunduí-Ku. Bo ki Amaí-Ku motabibií ko'inia. Ki Amaí bo Aku'oi i mamangoibií ko'inia bo mogutun moyotakinnya.
24 Bo intau inta diaí motabi ko'i-Nakoí, doiíbií dumudui kon totunduí-Ku. Totunduí inta dinongog monimu tua, de'emanbií nongkon i-Nakoí, ta'e nongkon i Amaíbií inta nopotabaí ko'i-Nakoí.
25 Bayongan tua poguman-Kudon ko'i monimu solama Aku'oi koyota-yotakinpa monimu.
26 Ta'e Roho i Allah, Mototuḷung inta bain potabaí i Amaí podoyon kon tangoi-Ku. Siadon tua i motunduí ko'i monimu kom bayongan rupa-rupa bo moponorop bui ko'i monimu kom bayongan inta aim pinota'au-Ku ko'i monimu.
27 Kobiagan mo'onow bo motompia taḷaían-Ku ko'i monimu. Dodamean-Kubií tontanií in ogoi-Ku ko'i nimu. Onu in ogoi-Ku tua de'emanbií naí inta inogoi in dunia na'a ko'i monimu. Dika molia-liaw ing gina bo dika mo'ondok.
28 Dinongog bidon monimu Aku'oi noguman, 'Aku'oi i mayakbií, ta'e buibií in Aku'oi mamangoi ko'inimu.' Aka mo'ikow motabi ko'i-Nakoí, yo mosanangbií totok ing gina monimu Aku'oi mayak ko'i Amaí, sing ki Amaíbií im moḷobe-ḷoben nongkon i-Nakoí.
29 Tana'a muna-Kudon pota'au ko'i monimu wakutu intua diaípa mobalií, simbaí mopirisaya i mo'ikow aka soaáḷ tatua mobaliídon.
30 Diaídon moaíntoí in o'umanon-Ku ko'i monimu, si wakutunyadon mongongawasa in dunia na'a mamangoi. Ta'e diaíbií kokawasa'annya in Aku'oi.
31 Tongaí tua mita musti mobalií baí kota'auan in dunia na'a kon Aku'oi i motabibií ko'i Amaí bo mogaid doman kom bayongan inta pinarentah i Amaí ko'i-Nakoí. Yo, koligai mayakdon kita nongkon na'a."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA