Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jenari nina Jesus man ajar-AjarNa kerina, "Ola aru atendu. Ernalemlah kam man Dibata janah ernalem pe kam man bangKu.

² I bas rumah BapangKu mbas ingan; janah lawes me Aku nikapken ingan man bandu. Tuhu kap enda; adi lang labo Kukataken bage man bandu.

³ Kenca Aku lawes nikapken ingan man bandu, reh denga pagi Aku ngalo-ngalo kam, gelah i ja Aku i je kam pe.

⁴ Ietehndu dalanna ku inganKu lawes e."

⁵ Emaka nungkun Tomas man Jesus, "O Tuhan, la kap ieteh kami ku ja Kam lawes; kuga ka pemeteh kami dalanna ku je?"

⁶ Erjabap Jesus man Tomas, "Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah Aku.

⁷ Adi Aku nggo itandaindu, BapangKu e pe nggo itandaindu. Genduari nari itandaindu me Ia janah nggo pe idahndu."

⁸ Emaka nina Pilipus man Jesus, "O Tuhan cidahken dage Bapa e man kami, gelah puas iakap kami."

⁹ Ngaloi Jesus, "O Pilipus, bage dekahna nggo Aku ras kam kerina, langa kin Aku itandaindu? Ise nggo ngidah Aku, nggo idahna pe Bapa e. Ngkai maka nindu, 'Cidahken Bapa e man kami?'

¹⁰ O Pilipus, la kin kam tek maka Aku ersada ras Bapa, janah Bapa ersada ras Aku? Kerina si nggo Kukataken man bandu, labo i bas Aku nari saja. Bapa si ersada ras Aku e me si ndahiken kerina si e.

¹¹ Teklah kam maka Aku ersada ras Bapa, janah Bapa ersada ras Aku. Adi la kam tek arah si Kukataken enda, arah perbahanenKu e lah gia kam tek.

¹² Kukataken man bandu maka situhuna kalak si tek man bangKu, ibahanna me bagi si nggo Kubahan. Tuhu ibahanna pe terbelinen asangken si e, sabap Aku lawes ndahi BapangKu.

¹³ Maka kai pe pagi ipindondu i bas gelarKu, Kubereken nge, gelah Bapa ipemuliaken arah Anak e.

¹⁴ Ntah kai gia ipindondu i bas gelarKu, Kubereken nge."

¹⁵ "Adi keleng atendu Aku, ikutkenlah pedah-pedahKu.

¹⁶ Kupindoken me man BapangKu gelah IsuruhNa Penampat si deban man bandu e me Kesah si naksiken kebenaren kerna Dibata, gelah ItemaniNandu rasa lalap.

¹⁷ Doni enda la ngasup ngaloken Ia sabap la Ia idah doni enda dingen la itandaina. Tapi kam itandaindu Ia sabap Ia ras kam, janah kam ringan i bas Ia.

¹⁸ Labo kam Kutadingken melumang. Reh nge Aku mulihken ndahi kam.

¹⁹ Kentisik nari, lanai bo Aku idah doni enda. Tapi kam idahndu nge Aku janah perbahan Aku nggeluh, kam pe nggeluh me.

²⁰ I bas wari e pagi, ietehndu me maka Aku ersada ras Bapa, janah kam ersada ras Aku bage pe Aku ersada ras kam.

²¹ Kalak si ngaloken dingen ngikutken pedah-pedahKu, ia me si engkelengi Aku. Kalak si engkelengi Aku ikelengi BapangKu kap ia; janah Aku pe engkelengi ia ras Kupetandaken diringKu man bana."

²² Jenari nina Judas (labo Judas Iskariot), "O Tuhan nggit Kam mpetandaken DiriNdu man kami, janah la man doni enda?"

²³ Erjabap Jesus, "Kalak si engkelengi Aku, ikutkenna kap katangKu. Alu bage ikelengi BapangKu me ia, janah Bapa ras Aku reh ndahi ia dingen ringan ras ia.

²⁴ Kalak si la engkelengi Aku, labo ikutkenna katangKu. Kata si ibegikenndu labo katangKu tapi rehna i bas Bapa si nuruh Aku e nari.

²⁵ Si enda Kukataken man bandu asum Aku ras kam denga.

²⁶ Si nampati, eme Kesah Si Badia, si isuruh Bapa pagi i bas gelarKu, IajariNandu kerna kai pe; dingen IpersingetiNandu pagi kerna kerina si nggo Kukataken man bandu.

²⁷ Malem me atendu Kutadingken; Kemalemen ateKu Kubereken man bandu. Carana Aku mere kemalemen ate e man bandu labo bali ras cara doni enda merekenca. Ola ukurndu gulut janah ola kam mbiar.

²⁸ Nggo ibegindu maka ningku, 'Lawes me Aku, tapi reh ka nge pagi Aku ndahi kam.' Adi keleng atendu Aku, meriah nge ukurndu Aku lawes ndahi Bapa, sabap BapangKu e belinen nge KuasaNa asangken Aku.

²⁹ Genduari nggo Kukataken si e man bandu ope denga jadi; gelah kenca jadi pagi si e tek kam.

³⁰ Lanai bo Aku gedang ngerana ras kam, sabap si Penguasa doni enda reh me. Si tuhuna labo lit kuasana nandangi Aku.

³¹ Tapi gelah ieteh doni enda maka keleng ateKu Bapa, e me sabapna maka Kuikutken kerina si isuruh Bapa. Ota lawes kita i bas ingan enda nari."

Yohanes

Video Yohanes 14

Ikuti Kami:

KONTAK | PARTISIPASI | DONASI