Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Ba’na ta’ osa kobater otaba ngalengsang," ca’na dhabuna Isa ka red-moredda. "Paparcaja ka Allah, ban paparcaja keya ka Sengko’.

² E kalenggiyanna Tang Rama bannya’ kennengngan. Sengko’ dha’ essa’a nyadhiya’agiya kennengngan kaangguy ba’na. Sengko’ ta’ kera ngoca’ kantha jareya ka ba’na mon pajat enja’.

³ Saellana entar nyadhiya’agi kennengngan kaangguy ba’na, Sengko’ abaliya ngoneyana ba’na, sopaja ba’na badha’a e kennengngan se ekennengnge Sengko’.

⁴ Ba’na tao jalan ka kennengngan se eentarana Sengko’."

⁵ Tomas laju mator ka Isa, "Guste, abdidalem sadaja ta’ oneng meyosa ka ka’dhimma Junandalem; kadi ponapa se onenga ka jalanna?"

⁶ Dhabuna Isa, "Sengko’ reya jalan mon terro kennala ka Allah ban terro olleya kaodhi’an. Tadha’ oreng se bisa entar ka Rama mon ta’ lebat Sengko’.

⁷ Ja’ sakenga ba’na kennal ka Sengko’, tanto ba’na kennal ka Rama keya. Sateya ba’na la kennal ka Salerana, ban la nangale’e Salerana."

⁸ Daddi Filipus mator ka Isa, "Guste, ngereng duduwagi Rama ka abdidalem sadaja, me’ olle abdidalem sadaja senneng."

⁹ Tape Isa adhabu, "La ce’ abidda Sengko’ apolong ban ba’na, tape ba’na gi’ ta’ kennal ka Sengko’, Filipus? Oreng se la nangale’e Sengko’, la nangale’e Rama. Baramma ba’na me’ ngoca’, ‘Ngereng duduwagi Rama ka abdidalem sadaja?’

¹⁰ Filipus! Apa ba’na ta’ parcaja, ja’ Sengko’ reya badha e dhalem Rama, ban Rama badha e dhalem Sengko’? Se ekoca’agi Sengko’ reya banne dhari Sengko’ dibi’. Rama se salanjangnga badha e dhalem Sengko’ se alampa’agi jareya kabbi.

¹¹ Ba’na kodu parcaja ka Sengko’ ja’ Sengko’ badha e dhalem Rama ban Rama badha e dhalem Sengko’. Mon enja’, paleng sakone’na ba’na kodu parcaja polana pa-apa se la elakone Sengko’.

¹² Bi’ Sengko’ ba’na ebala’ana sabendherra: Oreng se parcaja ka Sengko’ bakal ngalakonana apa se la elakone Sengko’, la’-mala’ bakal ngalakonana se araja’an, sabab Sengko’ entara ka Rama.

¹³ Ban apa’a bai se epenta ba’na kalaban Tang nyama, bi’ Sengko’ elakonana, sopaja Rama eagungngagi lebat Pottra.

¹⁴ Apa’a bai se epenta ba’na kalaban Tang nyama, bi’ Sengko’ elakonana."

¹⁵ "Mon ba’na taresna ka Sengko’, ba’na tanto ajalannagi pa-apa se eparenta’agi bi’ Sengko’.

¹⁶ Sengko’ nyo’ona ka Rama, ban Rama bakal marengana laenna ka ba’na, iya areya Se Nolong, se asarengngana ba’na salanjangnga.

¹⁷ Jareya Errohna Allah se anyata’agiya pa-apa se bendher parkara Allah. Dunnya ta’ bisa narema Errohna Allah jareya polana ta’ nangale’e ban ta’ kennal. Tape ba’na la kennal ka Salerana, sabab Errohna Allah jareya apolong ban ba’na ban bakal daddiya settong ban ba’na.

¹⁸ Bi’ Sengko’ ba’na ta’ edina’agiya kadibi’an. Sengko’ abaliya ka ba’na.

¹⁹ Kare sakejja’ aggi’, ban dunnya reya bakal ta’ nangaleyana Sengko’. Tape ba’na bakal nangaleyana Sengko’. Ban sarrena Sengko’ odhi’, ba’na bakal odhi’a keya.

²⁰ Mon are jareya la napa’, ba’na bakal taowa ja’ Sengko’ badha e dhalem Rama, ba’na badha e dhalem Sengko’ ban Sengko’ badha e dhalem ba’na.

²¹ Oreng se narema Tang ta-parenta ban ajalannagi ta-parenta jareya, oreng jareya taresna ka Sengko’. Oreng se taresna ka Sengko’ bakal ekataresnae Tang Rama. Bariya keya Sengko’ bakal taresna’a ka oreng jareya, ban Sengko’ anyata’agiya Tang aba’ ka oreng jareya."

²² Yudas (banne Yudas Iskariyot) atanya ka Isa, "Guste, aponapa Junandalem me’ anyata’agiya Salerana ka abdidalem sadaja, namong ta’ kasokan anyata’agi Salerana ka dunnya?"

²³ Dhabuna Isa, "Oreng se taresna ka Sengko’, bakal atoro’ ka Tang pangajaran. Oreng jareya tanto ekataresnae bi’ Tang Rama. Rama ban Sengko’ bakal entara ka oreng jareya ban apolonga bi’ oreng jareya.

²⁴ Oreng se ta’ taresna ka Sengko’ ta’ atoro’ ka Tang pangajaran. Pangajaran se la ekaedhing ba’na rowa banne dhari Sengko’, tape dhari Rama se ngotos Sengko’.

²⁵ Kabbi jareya bi’ Sengko’ ekabala ka ba’na pongpong Sengko’ gi’ apolong ban ba’na.

²⁶ Tape Errohna Allah, Se Panolong se bakal eotosa Rama kalaban Tang nyama, jareya se ngajarana ba’na parkara apa’a bai ban maenga’ ka ba’na pa-apa se la ekabala bi’ Sengko’ ka ba’na.

²⁷ Ba’na edina’ana kataremtemman bi’ Sengko’. Tang kataremtemman dibi’ se bi’ Sengko’ ebagiya ka ba’na. Se ebagiya bi’ Sengko’ reya ta’ padha ban baberri’na dunnya ka ba’na. Ja’ ngalengsang, ja’ tako’.

²⁸ Ba’na la ngedhing Sengko’ ngoca’, ‘Sengko’ mangkada, tape Sengko’ abaliya ka ba’na.’ Mon ba’na taresna ka Sengko’, tanto ba’na perak Sengko’ entara ka Rama, sabab Rama araja’an dhari Sengko’.

²⁹ Ba’na ebalai parkara jareya bi’ Sengko’ sateya, sabellunna jareya kabbi kalakon, sopaja mon kalakon dhaggi’, ba’na parcaja.

³⁰ Sengko’ ta’ acaca’a nya’-bannya’ pole ka ba’na, sabab la baktona pangobasana dunnya dhateng. Tape pangobasana dunnya jareya ta’ kobasa ka Sengko’.

³¹ Tape jareya kabbi kodu kalakon sopaja dunnya reya tao ja’ Sengko’ taresna ka Rama ban ngalakone pa-apa se epakonnagi Rama ka Sengko’. Ella, mara sateya ja’ mangkada dhari dhinna’."

Yohanes

Video Yohanes 14

Ikuti Kami:

KONTAK | PARTISIPASI | DONASI