Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ambangungko nai’ siagang a’jariko singara’, he Yerusalem, saba’ nia’mi battu singara’ kasalamakkannu; Allata’ala ansingariko siagang kala’biranNa.
2 Nikalimbuki buttaya ri sassang, nitongkoki bansa-bansaya ri le’leng pakka’; mingka ammumbai singara’Na Batara irateannu, caya kahaderanNa a’nyatai irateannu.
3 A’balulungi bansa-bansaya battu mange ri singara’nu, nikontaki sikamma karaenga ri caya ammumbaya mae ri kau.
4 Ciniki apa kajarianga ri tammulilinu; ra’ya’ a’rappunga untu’ ammotere’ mae ri kau. Ana’-ana’ bura’nenu niaki battu bella, ana’-ana’ bainenu nikalawingi.
5 Lannasa’ mako nucini’na anjo siagang accayami rupannu; dinging-dingingi siagang lompoi pa’mai’nu. Nierangi barang-baranna sikamma bansaya mae ri kau, nitambungiko ri kakalumanynyangang battu ba’leang tamparanga.
6 Nikatulungi pa’rasangannu ri unta jaia, battua ri Midian siagang Efa. Tu battua ri Syeba angngerangi bulaeng siagang kamanynyang, na napuji-puji gau’Na Batara.
7 Bembe siagang gimbala’ battua ri Kedar nierangi mae ri kau sadiai gimbala’ laki battua ri Nebayot untu’ ibadanu. Anjo koro’banga napakasannangi atinNa Batara napaccayai Balla’Na rassia kala’birang.
8 Apa kutadeng anjo allayanga rapang rammang rapang bodobangkeng anri’baka ammotere’ ri tampa’na?
9 Iaminjo sikamma kappala’ battua a’labu angngerangi umma’Na Batara ammotere’ battu ri pa’rasangang bella. Angngerang tongi pera’ siagang bulaeng untu’ mammuji ri Karaeng Allata’alanu; mae ri Allata’alana Israel Kaminang matangkasaka, ampa’jariai umma’Na nipakalompo.
10 Nakana Batara mae ri Yerusalem, "Bansa maraeng lambangungi ammotere’ kalli’ tembo’nu, siagang lanalayaniko sikamma karaenga. Riolo Kuhukkungko lalang larroKu, mingka kamma-kamma anne ero’Ma’ angkamaseangko.
11 Allo bangngi latassungke pakke’bu’ lomponu, sollanna akkulle nierang mae ri kau kakalumanynyanganna sikamma bansa-bansaya, siagang sikamma karaenna ke’nanga nitahanga.
12 Bansaya siagang kakaraengang tenaya natundu’ ri kau, laancuruki siagang lalanynyaki.
13 Kalompoanna romang Libanon lanilalingi mae ri kau poko’ kayu berangang, camara, siagang eru untu’ ampaccayai BallakKu, siagang angga’gai tampa’ pangngonjokangKu.
14 Ana’-ana’na tau anjallakkangiako battui su’ju’, ia le’baka anghinako la’dundui, lanigallarakko ‘KotaNa Batara’, ‘Sion, Kota Allata’ala Matangkasa’na Israel’.
15 Tena nulanibokoi siagang tena nulanikabirisi’, siagang tena nulanibalang parekang a’jari sino. Kupa’jariko nikalompoang pa’maika satunggu-tungguna, tampa’ karannuang mannannungang.
16 Laniparakaiko ri bansa-bansaya siagang sikamma karaenga, rapang sitau amma’ amparakai ana’na. Nanuassemmo angkana iNakke Batara, Mappasalama’nu, angkanaya Allata’alana Israel makassaka allappassangko.
17 AngngerangA’ bulaeng sambenna tambagaya siagang pera’ sambenna bassia. AssareA’ tambaga a’jari sambenna kayua, siagang bassi a’jari sambenna batua. Pa’rasangannu laKupa’jari amangi siagang sannangi, na niparenta siagang adele’.
18 Tenamo kabara’na nikanaya katerassang nigaukang ri pa’rasangannu, nikanaya kaancuranga siagang karuntungang ri daeranu. RapangA’ tembo’ lanjagaiko, nalanupujiA’ a’jari mappasalama’nu.
19 Tena nuparallu nisingari ri allo ri wattu singaraka, siagang tena nuparallu nisingari ri bulang punna bangngi. Saba’ iNakke Batara, la’jari singara’ mannannungang mae ri kau, Kusingariko siagang kala’birangKu.
20 Lania’ untu’ ikau allo tenaya nale’ba’ labu, siagang bulang tenaya nale’ba’ assoloro’. Saba’ iNakke Batara, la’jari singara’ mannannungang mae ri kau, le’ba’mi sallang wattu kasusannu.
21 Lannabai tindakanna pandudu’nu, lanapatangi ke’nanga pa’rasanganga satunggu-tungguna. Rapangi ke’nanga lamungang Kucangkoka KalengKu, untu’ ampa’nyatai kala’birangKu.
22 Ba’lalo manna kaluarga ca’dia siagang tunaya la’jari bansa lompo siagang kassa’. INakke Batara langngalle tindakang linta’, ri wattu kaminang bajika."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA