Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mara jaga Yerusalim, ban patera’, sabab tera’na kasalameddanna ba’na la napa’; Allah nyonare ba’na bi’ kamolja’anna.

² Bume petteng saanterona, sa-bangsa katotoban calemot tadha’ tera’na; tape tera’na PANGERAN moncar e attasanna ba’na, sonarra kahadiranna nyata e attassa ba’na.

³ Sa-bangsa dhateng anyo-ronyo ka tera’na ba’na, to-rato kapencot bi’ sonar se nera’e ba’na.

⁴ Abas, badha apa e sabingkerra ba’na; ra’yat akompol moleya ka ba’na. Na’-ana’ lalake’anna ba’na dhateng dhari jauna, na’-ana’ babine’anna eemban.

⁵ Nangale’e jareya ba’na heran, mowana binar; ba’na arassa ngennes ban raja ate. Dhi’-andhi’na sa-bangsa egiba ka ba’na, arta dhari kennengngan se alengka tase’ ngalowa ka ba’na.

⁶ Nagarana ba’na ekaromo’ onta sabannya’na, onta se asalla dhari Midian ban Efa. Dhari Syeba oreng dhateng ngeba emmas ban mennyan, sambi amolja’agi pa-apa se elampa’agi PANGERAN.

⁷ Embi’ ban dumba Kedar egiba ka ba’na, dumba lake’ dhari Nebayot la esadhiya’agi kaangguy kabakteyanna ba’na. Kurban jareya masenneng panggaliyanna PANGERAN, Padalemmanna se agung epabagus parana.

⁸ Apa rowa se ngabang akantha ondhem, akantha dara se ngabber moleya ka kandhangnga?

⁹ Jareya pal-kapal se dhateng alabbu dhari jauna, ngeba mole ommadda Allah. Pal-kapal jareya ngeba emmas ban salaka kaangguy amolja’agi GUSTE Allahna ba’na; kaagem Allahna Isra’il Se Mahasocce, se andaddiyagi ommadda ehormat oreng.

¹⁰ PANGERAN adhabu ka Yerusalim, "Geddhungnga ba’na bakal epaddegga pole bi’ oreng manca, ban to-rato bakal aladinana ba’na. Lamba’ Sengko’ ngokom ba’na polana Sengko’ peggel, tape sateya Sengko’ neser ka ba’na.

¹¹ Seyang malem labang sakethengnga ba’na bakal terrosa abukka’, sopaja dhi’-andhi’na sa-bangsa bisa egiba ka ba’na, ban to-ratona daddi tawananna ba’na.

¹² Bangsa ban karaja’an se ta’ endha’ ngabdi ka ba’na, bakal ancora tadha’ karena.

¹³ Se daddi kagumbira’anna alas Libanon bakal eangko’a ka ba’na, kaju barangan, eru ban comara, sopaja mabagusa Tang Padalemman, ban malebur panedda’anna Tang soko.

¹⁴ Na’-kana’ se nendhes ba’na bakal dhatengnga asojud e adha’na ba’na, se tao ya-nyeya ba’na bakal nyemba’a e sokona ba’na. Ba’na bakal enyama’ana ‘Kotthana PANGERAN’ ‘Siyon, Kotthana Allahna Isra’il Se Socce.’

¹⁵ Ba’na ta’ kera eonduri otaba ekabaji’i, ban ta’ edina sampe’ seppe. Bi’ Sengko’ ba’na egabaya kennengngan se ekenneng edirragi salanjangnga, kennengnganna kagumbira’an se tadha’ marena.

¹⁶ Ba’na bakal epeyara’a bi’ to-rato ban sa-bangsa, akantha ebu se meyara ana’na. Daddi ba’na pas tao ja’ Sengko’ PANGERAN, Panyalamedda ba’na, ban tao ja’ Allahna Isra’il se kowat se mabebas ba’na.

¹⁷ Sengko’ ngeba emmas menangka gantena paronggu, ban ngeba salaka menangka gantena besse. Sengko’ aberri’ paronggu menangka gantena keju, ban aberri’ besse menangka gantena bato. Nagarana ba’na bi’ Sengko’ epaamana ban epataremtemma, ban eparenta kalaban adil.

¹⁸ Ta’ kera badha pole kabar parkara kakerrasan e nagarana ba’na, ban parkara dhaerana ba’na se ancor otaba ngalotor. Sengko’ padha ban geddhung se ajaga’a ban ngaobana ba’na, ban ba’na bakal ngagungngagiya Sengko’ menangka panyalamedda ba’na.

¹⁹ Ba’na ta’ parlo ekenneng sonarra are e bakto seyang, ban ta’ parlo etera’e sonarra bulan e baja malem. Sabab Sengko’, PANGERAN, se langgeng nera’e ba’na, Sengko’ nera’e ba’na ban Tang kaagungan.

²⁰ Bakal badha’a are se ta’ tao compet kaangguy ba’na, ban bakal badha’a bulan se tera’ salanjangnga. Sabab Sengko’, PANGERAN, nera’e ba’na salanggengnga. masa kasossa’anna ba’na bakal mareya.

²¹ Pandhudhu’na ba’na bakal odhi’a noro’ jalan se teppa’, ban bakal andhi’a nagara kaangguy salanjangnga. Reng-oreng jareya akantha cangkogan se etamen Sengko’ dibi’, kaangguy anyata’agi Tang kaagungan.

²² La’-mala’ kalowarga se kene’ ban nespa bakal daddiya bangsa se raja ban kowat. Sengko’, PANGERAN, bakal duli ngokoma, mon la teppa’ baktona."

Yesaya

Video Yesaya 60

Ikuti Kami:

KONTAK | PARTISIPASI | DONASI