Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kekekenlah, o Jerusalem, ersinalsallah, terangndu nggo reh sabap kemulian TUHAN nggo ersinalsal i babondu.
2 Doni itutupi kegelapen, bage pe kerina bangsa la erpilihen. Tapi i babondu ersinalsal terang TUHAN, i babondu teridah kemulian TUHAN.
3 Bangsa-bangsa reh ku terangndu, raja-raja pe reh ndahi terang warindu si mbaru.
4 Tatap ku sekelewetndu, perdiateken kai si jadi; bangsandu kerina pulung atena reh ku kam mulihi. Anak-anakndu si dilaki reh i negeri si ndauh nari, anak-anakndu si diberu pe iangkipi.
5 Ngidah si e, ayondu siang perban riahna ukurndu, pusuhndu debet-debet, perban gedangna atendu. Kebayaken bangsa-bangsa itaruhken man bandu, rehen i kepar lawit nari maler man bandu.
6 Arak-araken unta melala reh ku kam, subuk i Midian bage pe i Epa nari. I Syeba nari reh kalak maba emas ras kumenen, iberitakenna berita si mehuli kerna perbahanen TUHAN.
7 Biri-biri i Kedar ras Nebayot nari ibaba ku kam, itutung i babo batar-batar jadi persembahen man TUHAN. Erkiteken si e meriah ukur TUHAN janah Rumah PertotonNa tambah ermulia.
8 Kai kin ah ndia si bali ras embun perkabangna, desken nderapati kabang mulih ku karangna?
9 Eme kapal-kapal si reh i negeri si ndauh nari, maba bangsa Dibata mulih ku kutana. Pirak ras emas ikut ibabana, gelah gelar TUHAN ipehaga. Ia me kap Dibata Israel si Badia, si mahan bangsa-bangsa mehaga BangsaNa.
10 Nina TUHAN man Jerusalem, "Bangsa si deban pagi majekken tembokndu raja-rajana pagi si ngidangi kam. Mbarenda Kuukum kam perban nembehna ateKu, tapi genduari kucidahken bandu lias ras perkuah ateKu.
11 Suari ras berngi talang pintu gerbangndu, maka raja-raja banci erbaris maba ertana man bandu.
12 Tapi bangsa-bangsa ntah kerajan si la nggit erdahin man gunandu, ikernepken seh keri tuhu-tuhu.
13 Kayu eru, kayu ingul, ras kayu cemara, kayu si mejilena i bas kerangen Libanon. Ibaba lako milasi kam, o Jerusalem, maka Rumah PertotonKu mejile, kotangKu ermulia.
14 Kerina anak kalak si ndedeh kam mbarenda, reh erjimpuh ku lebe-lebendu. Janah kerina kalak si nai megombang man bandu, nembah ku tapak-tapak nahendu. Igelarina me kam 'Kota TUHAN', 'Sion, Kota Dibata si Badia nu Israel'.
15 Kam lanai ilupaken, lanai ate kalak segat, lanai itadingken, janah lanai ipediat melungen. Kubahan kam jadi kota mbelin ras mejile, ingan keriahen rasa lalap seh rasa lalap.
16 Bangsa-bangsa ras raja-raja ngepkep kam, bali ras nande ngepkep anakna. Ietehndu maka TUHAN nggo ngkelini kam, Dibata si mbisa nu Israel nggo mulahi kam.
17 Kubaba man bandu emas gancih tembaga, janah pirak gancih besi. Kubereken man bandu tembaga gancih kayu, janah besi gancih batu. Si erkuasa lanai ndedeh kam, negerindu iperentah alu kebujuren ras dame.
18 Berita kerna perbahanen merawa lanai lit terbegi, negerindu lanai iradasken, lanai ikernepken. Desken tembok Kukawali dingen Kuampang-ampangi kam, emaka ipujindu Aku, perban nggo Kukelini kam.
19 Matawari lanai nerangi kam sanga suari, tah pe terang bulan sanga berngi. Aku, TUHAN, Aku kap terangndu seh rasa lalap; sabap sinalsal kemulianKu ersinalsal i babondu.
20 Wari-wari atendu ceda nggo keri, sabap Aku, TUHAN, Aku kap terangndu seh rasa lalap, ngelebihi bulan ras matawari si la sundut seh rasa lalap.
21 Kerina kalak si ngiani kam bujur perbahanna, janah negeri e rasa lalap ia empuna. Aku si nepa ia, Aku si nuankenca, gelah arah ia tangkas kemulianKu man kerinana.
22 Subuk keluarga si kitik ras si musilna, jadi pagi bagi bangsa si mbelin dingen erkuasa. Aku, TUHAN, mahanca pedas jadina si enda, adi nggo payo paksana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA