Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kalak bujur mate, janah la ise pe mperdiatekenca, la ise pe ngeranakenca. Tapi kenca ia mate lanai lit cilaka si banci engkenai ia.
2 Kalak si nggeluh alu bujur ndatken kedamen ras pengadi-ngadin i bas kematen.
3 Tapi kam, o perdosa, marilah maka kam iadili. Kam labo ulin asa guru perdewal-dewal, perlua-lua, tah diberu pencarinna erlua-lua.
4 Ise kin si itawa-tawaindu e? Man ise kin ipererendu dilahndu? Man ise kin ipebelangndu babahndu o kam kalak perguak?
5 Isembahndu dibata-dibatandu alu ngelakoken kerincuhen dagingndu iteruh batang kayu si iakapndu lit keramatna. Igelehndu anak-anakndu jadi persembahen i bas gua si erbatu-batu i tepi lau belin.
6 Ibuatndu batu si melinang i jenari, kenca bage isembahndu batu e desken dibata. Iamburkenndu anggur jadi persembahen man bana janah icibalkenndu i je buah gandumndu. Akapndu kin ngena ateKu ngidah si enda kerina?
7 Lawes kam ku das deleng mpersembahken persembahen, kenca bage ilakokenndu i je kerincuhen dagingndu.
8 Deherken pintun i bas rumahndu ipajekkenndu gana-gana si mereha akap ngenenca. Itadingkenndu Aku. Itangtangindu uisndu, kenca bage nangkih kam ku ingan medemndu si galang, radu ras kalak singena atendu si iupahindu gelah ia medem ras kam. Janah i je ipuaskenndu me kerincuhen dagingndu.
9 Erminak kam janah ipakendu minak wangi; kenca bage lawes kam ersembah man dibata-dibata Moloh. Isuruhndu persuruhen-persuruhenndu ku negeri-negeri si ndauh, janah seh ku doni kematen pe lako nungkuni kata i bas dibata-dibata si deban nari.
10 Latih akapndu ndarami dibata-dibata si deban, tapi lalap kam la leja. Iakapndu si e kerina mereken gegeh man bandu, emaka lalap kam la ngelabuh.
11 Ise kin akapndu dibata-dibata si e ndai kerina maka mbiar kam ibahanna, seh maka nggit kam erguak ras ngelupaken Aku? Erkiteken nggo ndekah Aku sinik kin maka lanai ipehagandu Aku?
12 Akapndu kin maka si ilakokenndu e payo? Tapi genduari Kubongkar ateKu kerina lagu langkahndu, janah gana-ganandu e labo ngasup nampati kam.
13 Adi nderkuh kam mindo penampat, suruhlah gana-ganandu e nampatisa! Sekali sempul saja pe, minter ia kelayap kerina. Tapi kalak si ernalem i bas Aku ringan me i bas negeri e janah isembahna Aku i bas Rumah PertotonKu."
14 Nina TUHAN, "Pelepaslah bangsangKu mulih ku Aku. Agui kasa kai si ndongkeli i bas dalanna! Bahan janah sikapkenlah pasarna!
15 Aku kap Dibata si Meganjang dingen Badia si erkuasa seh rasa lalap. Aku ringan i bas ingan si meganjang dingen badia, tapi pe Aku lit i tengah-tengah kalak meteruk rukur dingen erkadiola kerna dosa-dosana, gelah banci Kupekeke mulihi kiniteken ras pengarapenna.
16 Kubereken geluh man bangsangKu, janah la lalap Kusalahken ia. Labo lalap Aku ernembeh ate man bana.
17 Nembeh ateKu man bana erkiteken dosana ras rangapna. Emaka Kuukum ras Kutadingken ia. Tapi lalap ia mekeng janah iteruskenna ndalani dalinna.
18 Nggo Kuidah uga lagu langkahna; bage gia Kupepalem nge ia. Kutegu-tegu janah Kusampati ia, janah kalak si erceda ate Kuapuli.
19 Kubereken dame man kerina kalak, subuk man si ndauh ras si ndeher. Kupepalem me bangsangKu.
20 Tapi kalak jahat bali ras lawit si la pernah teneng; galumbangna la pernah ngadi ergalun-galun maba kubang ras si melket-melket.
21 La lit dame man kalak jahat," nina TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA