Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pilangngeri, he turunganna Yakub, turunganna Yehuda ammakea areng Israel, nukana numangakui Allata’alana Israel, siagang assumpako lalang arenNa Batara. Mingka tena nannarrusu’ kana-kanannu antama’ ri atinnu.
2 Mingka manna nakamma, lompoi pa’mai’nu ammangakui angkana ikau pandudu’nako kota matangkasaka; angkanaya ikau tanjengko mae ri Allata’alana Israel niarenga Batara Kaminang Makoasaya.
3 Nakana Batara, "Pilangngeri, he Israel! Apa kajarianga riolo, sallomi le’ba’na Kupau riolo; apa Kupaua, ti’ring Kugaukangi siagang Kupa’nyatai.
4 Kuassengi angkanaya ikau sanna’ terasa’na pa’mai’nu, terasaki ulunnu siagang kapala batuko.
5 Jari battu riolo iji naKutappu memang; ri tenanapa nakajariang, le’ba’ memammi Kupau; sollanna tena nanungkana, angkanaya anjo panggaukanna patung-patung barhalanu.
6 Sikontu apa Kutappua, nulangngereka battu ri Nakke, kajariammi; musti numangakui angkanaya kammatojengi kanangKu. Kamma-kamma anne KupauangKo siapa are passala’ beru, rahasia-rahasia tenayapa nuassengi.
7 Kamma-kammapi anne naKupa’jari, teai riolo; tale’bakapi nulangngere’ anjo passalaka, sollanna takkulleako angkana, angkanaya sikontuna nuasseng ngasengi.
8 Kuassengi angkanaya takkulleako nipatappa’, battu rioloji numasahoro’ angkana tunungai doraka. Lanri kammana minjo na tanuassenga, tena manna sibuku kana battu mae ri tolinnu.
9 Kuparrangngi larroKu sollanna nipa’la’bang arengKu. Kutahangi untu’ ikau, sollanna tena nipanrakiko.
10 Kuso’riko lalang ri pepe’ kasessanga, rapang pera’ nipakati’noka lalang ri pepeka.
11 Kugaukangi anjo kammaya untu’ KalengKu, saba’ taKupa’biangai arengKu nira’massi; tena Kubagei kala’birangKu manna pole ri nai."
12 Nakana Batara, "Pilangngeri he Israel, umma’ Kukioka, iNakke tuli Allata’alanu. INakkemi uru-urua, siagang iNakke tommi kala’busanga.
13 LimangKu ampadongkoki dasara’na buttaya siagang ampaka’rangi passimbanga. Punna Kukioki arenna, lintaki battu ke’nanga.
14 A’rappungang ngaseng mako siagang pilangngeri! Ri sikamma rewata-rewataya tena le’ba’ antappu rioloi angkanaya lanibunduki Babel ri tunipileKu; lanagaukangi apa Kukaerokia.
15 INakkemi ampaui siagang angkioki, anrurungangi, sa’genna a’jari apa nagaukanga.
16 Battu mako a’reppese’ mae ri Nakke siagang pilangngeri, battu riolo iji Ku’bicaramo silambusu’na; na sikamma kanangKu tuli Kupa’rupai." Kamma-kamma anne Nasuroa’ Karaeng Allata’ala siagang Nasarea’ koasa KalenNa.
17 Nakana Allata’ala matangkasa’na Israel, Mappasalama’nu, "INakke Karaeng Allata’alanu, angngajarakako apa a’matu-matua ri kalennu, anrurungangako ri agang mustia nuolo.
18 Ebara’ angkana nuparhatikangi sikamma parentaKu, lasalewangangko rapang binanga tenaya nale’ba’ kalotoro’, laupakko rapang bombang ri tamparang tenaya nale’ba’ ammari-mari.
19 Turungannu lajai rapang lisere’ kassika; Kutanggongi angkanaya talanipanrakiai ke’nanga."
20 A’lampako siagang lariko battu ri Babel, pa’la’bangi anne kabaraka ri kere-keremae. Kabarrangi siagang pakkio’ rannu, angkana: "Le’ba’mi Napasalama’ Batara atanNa, Israel!
21 Wattunna Narurungang ke’nanga allalo ri parang kalotoroka, tena nasessa ke’nanga napakamma turere. Napuei Batara moncong batua nampa appasolong je’ne’ battu ri batuai Napassulukang je’ne’ ke’nanga.
22 Tena kasalamakkang mae ri tau ja’dalaka," Kammaminjo kananNa Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA