Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O bangsa Israel, kesusuren Juda, begikenlah! Kam ersumpah i bas gelar TUHAN. Ikatakenndu maka Dibata nu Israel kap si isembahndu; tapi la kap i bas pusuhndu nari kai si ibelaskenndu;
2 Amin bage gia, megah ka akapndu ngatakenca, maka kam me penduduk kota si badia, janah kam ernalem kempak Dibata nu Israel saja, TUHAN si Mada Kuasa, e kap GelarNa.
3 Nina TUHAN kempak Israel "Nai nggo Kukataken kai si nandangi jadi; jenari rempet Kujadiken si ndai.
4 Kuteh maka pusuhndu mekeng bagi waja, urat kudukndu piher bagi tembaga.
5 Emaka kejadin-kejadin enda nai nari nggo Kunubuatken, ope denga jadi nggo leben Kuberitaken, maka ula ikatakenndu berhala ras gana-ganandu si mahanca jadi bandu.
6 Genduari nggo me jadi kerina si kuturiken nai bandu; emaka arus iakuindu, nubuatKu payo tuhu. Genduari Kunubuatken ka perkara-perkara si mbaru, eme kejadin-kejadin si langa Kupetangkas bandu.
7 Enda denga nge Kubahan si e jadi, perkara-perkara si bage la pernah jadi nai-nai nari. Adi lit kin bage, tentu nindu ngerana, 'Si e nggo me kueteh kerina.'
8 Kueteh nge maka kam la terteki, kam terberita kalak si pet nogani, em sabapna maka si enda la pernah ibegindu, sengkebabah kata pe la pernah seh ku cupingndu.
9 Gelah ipuji kalak gelarKu, Kusabari kal ukurKu. RawangKu Kutahan, maka ula keri kam Kukernepken.
10 I bas api kiniseran, kam Kuuji, bali ras pirak, iane i bas api. Tapi kepeken si la erguna kepe kam.
11 Si e Kulakoken guna Aku; sabap gelarKu la ateKu jadi mbau. Man ise pe la Kubere kemulianKu."
12 Nina TUHAN, "Begikenlah, o Israel, bangsa si nggo Kudilo. Aku kap Dibata, si pemena ras si perpudina.
13 TanKu kap simahan palas doni enda, tanKu, si kemuhen ngkimbangken langit enda. Tupung Kudilo langit ras doni enda, minter ia sikap ngadap kerina.
14 Pulunglah kam kerina, jenari begiken; la lit sada pe dibata-dibata si ernubuatken maka Babil iserang kalak si nggo Kupilih; ilakokenna me kasa kai si Kusuruh.
15 Aku me si ngerana ras si ndilo ia, Kubabai ia, janah Kupeseh sura-surana.
16 Mari deheri Aku, jenari begiken. Bena-benana nari pe Aku nggo ngerana terang-terangen. Asum jadi si Kukataken e, Aku pe lit i je." (Tuhan si Erdolat nggo mereken GegehNa man bangku janah nuruh aku.)
17 Dibata si Badia nu Israel, TUHAN si ngkelini kam ngataken bandu, "Aku kap TUHAN Dibatandu; Aku ngajari kam guna kiniulinndu, janah naruhken kam ku bas dalan si man dalanenndu.
18 Bicara patuh kam man perentahKu, tentu maler man bandu kemalemen ate desken lau; janah kemenangen ku kam nepet, desken galumbang si ergalun ku tepi lawit.
19 Kesusurenndu pe bagi kersik teremna, janah Kujaga maka la masap ia."
20 Ndaratlah i Babil nari, lompatkenlah; beritakenlah alu surak meriah. Momoken ku belang-belang doni kerina, "TUHAN nggo ngkelini Israel, suruh-SuruhenNa!"
21 Asum itaruhken TUHAN nai BangsaNa arah gurun pasir si melas, la sempat ia terketes perbahan muas. Sabap ipedarat TUHAN lau man bana i bas lingling nari, IbekakenNa batu, jenari erburak lau i bas nari.
22 "La lit dame man kalak jahat," nina TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA