Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mara edhingngagi, reng-oreng toronanna Yakub, reng-oreng Yehuda se ngangguy nyama Isra’il, ca’na ba’na ba’na ngakone Allahna Isra’il, ban asompa kalaban asmana PANGERAN. Tape cacana ba’na jareya ta’ kalowar dhari atena.
2 Sanajjan kantha jareya ba’na gi’ ngedirragi ja’ ba’na reya oreng dhari kottha socce; ban ja’ ba’na nyandhar ka Allahna Isra’il se esebbut PANGERAN Se Mahakobasa.
3 PANGERAN adhabu, "Edhingngagi, Isra’il! Sabarang se kadaddiyan e jaman se kapongkor la abit ekabala sabellunna bi’ Sengko’; apa se bi’ Sengko’ la ekoca’agi daksakala, bi’ Sengko’ ejalannagi, ban la nyata kalakon kabbi.
4 Sengko’ tao ja’ ba’na ce’ angkona, cengkal ban ta’ endha’ toro’ oca’.
5 Daddi dhari lamba’ Sengko’ la ngoca’agi; sabellunna kadaddiyan bi’ Sengko’ la ekabala kabbi, sopaja ba’na ta’ sampe’a ngoca’ ja’ jareya kabbi lalakonna ca-arca brahalana ba’na.
6 Tang nobuwat se ekaedhing ba’na la kalakon kabbi; ba’na kodu ngakone ja’ Tang oca’ jareya bendher kabbi. Sateya Sengko’ mala’ana sabarang parkara se anyar, ya-roseya se gi’ ta’ ekataowe ba’na.
7 Buru sateya jareya bi’ Sengko’ epakalakon, banne gi’ lamba’na; ba’na ta’ tao ngedhing parkara jareya, sopaja ba’na ta’ bisa’a ngoca’, ja’ ba’na tao sakabbinna parkara jareya.
8 Sengko’ tao ba’na ta’ ekenneng parcaja, dhari lamba’ ba’na la kalonta darakana. Lantaran jareya ba’na ta’ tao parkara jareya, tadha’ oca’ sakeccaba se napa’ ka kopengnga ba’na.
9 Sengko’ ngampet peggella ate sopaja Tang nyama emolja’agiya bi’ Tang ommat. Bi’ Sengko’ peggella Tang ate etahana sopaja ba’na ta’ sampe’a epamate.
10 Bi’ Sengko’ ba’na eoji e dhalem apoy kasangsara’an, akantha salaka se epamorne e dhalem pangobbaranna.
11 Sengko’ ngalakone jareya kaangguy Sengko’ dibi’, sabab Sengko’ ta’ endha’ mon Tang nyama sampe’ epacemmer, Tang kamolja’an ta’ ekenneng bagi bi’ sapa’a bai."
12 PANGERAN adhabu, "Mara edhingngagi Isra’il, ommat se eolok bi’ Sengko’, Sengko’ teptep Allahna ba’na. Sengko’ reya se dha’-adha’ ban Sengko’ keya se dhi-budhi, tadha’ tonggalla.
13 Tang tanang se masang dhasarra bume ban ngampar langnge’. Mon Sengko’ ngolok nyamana, kabbi padha duli nyander dha’ enna’.
14 Mara ba’na padha akompol kabbi, pas edhingngagi! E antarana ba-diba tadha’ se aramallagi ja’ oreng Tang peleyan bakal nyerranga Babil; oreng jareya bakal ajalannagiya sabarang se daddi Tang karep.
15 Sengko’ se ngoca’ ban se ngolok oreng jareya, se nonton oreng jareya sampe’ badha hasella.
16 Mara nyander ka seddi’anna Sengko’, pas edhingngagi, dhari lamba’ Sengko’ acaca rang-terrangan; ban Tang oca’ salanjangnga epadaddi kanyata’an." Sateya GUSTE Allah Se Mahatenggi ngotos sengko’, ban sengko’, eparenge kobasana dibi’.
17 Allahna Isra’il se socce, Panyalamedda ba’na, adhabu kantha reya, "Sengko’ reya PANGERAN Allahna ba’na, se ngajarragi ka ba’na sabarang se aguna, ban nonton ba’na e jalan se kodu elebadi ba’na.
18 Ja’ sakenga ba’na agateyagi Tang ta-parenta, ba’na tanto nyaman ban salamet odhi’na akantha songay se ta’ tao asat, kasennengnganna ba’na tanto tadha’ ambuna akantha omba’ e tase’ se ta’ ambu alung-gulung salanjangnga.
19 Toronanna ba’na bakal bannya’a akantha beddhi, Sengko’ nanggung toronanna ba’na jareya ta’ kera tao sampe’ epamosna."
20 Kassa’ buru dhari Babil, berta’agi kabar reya ka man-dhimman. Berta’agi sambi asorak paperak: "PANGERAN la masalamet Isra’il, abdina!
21 E bakto PANGERAN nonton bangsa Isra’il lebat e teggal se kajal, reng-oreng jareya ta’ tao arjang. PANGERAN nyeba’ gunong bato, epakalowar aeng, dhari bato jareya epanancel aeng kaangguy kaparlowanna reng-oreng jareya.
22 Tadha’ kasalameddan monggu ka oreng jahat,"Â kantha jareya dhabuna PANGERAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA