Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nalangngere’na Karaeng Hizkia anjo laporanga battu ri anjo tau tallua, nakekke’mi pakeanna siagang ammakemi pakeang karung tanra si’nana pa’mai’na, nampa a’lampa mange ri Balla’Na Batara.
2 Nampa nasuro Elyakim, kapala balla’ lompoa, Sebna juru tulisi’na pa’rasanganga kammayatompa sikamma imang-imang niaka pangka’na untu’ a’lampa angngagangi sicini’ Na’bi Yesaya, ana’na Amos. Ke’nanga ammake kaeng karung ngaseng tongi.
3 Iaminne pasanna Hizkia napabattua ke’nanga mae ri Na’bi Yesaya, "Anne alloa, allo kasusaang; nihukkungki’ siagang nihinaki’. Rapangki’ baine erokamo ammana’, mingka la’busu’mi kagassinganta.
4 Nasuroi karaeng Asyur perwira tantarana untu’ anghinai Allata’ala mattallasaka. Inai angngassengi, gassingka Nalangngereki Karaeng Allata’ala anjo panghinaanga na Nahukkung tau ampasulukai anjo kana kammaya! Lanri kammana anjo appala’ doang laloko mae ri Allata’ala untu’ sikamma tau attallasaka ija."
5 Natarimana anjo pasang battua ri Karaeng Hizkia,
6 nasuromi Na’bi Yesaya sikamma anjo tunisuroa ampabattui pialinna angkanaya, "Nakana Batara, teaki’ mallaki karaeng, allangngereki kana-kana napabattua anjo ata-atanna karaeng Asyur, angkanaya takkulleaki’ Nipata’lappasa’ ri Batara.
7 LaNipa’jari tappaki ri Batara anjo karaeng Asyur ri kabara’ anging, sa’genna ammotere’ mange ri pa’rasangang kalenna, nampa anjoreng lanibunoi."
8 Anggappai kabara’ anjo perwira tantara Asyur angkanaya a’lampami karaenna ambokoi Lakhis na sitabang ambundu’ siagang kota Libna, tena nabella battu ri anjo tampaka. Jari a’lampami mange anjoreng untu’ assicini’ siagang anjo karaenna.
9 Le’ba’mi anggappa kabara’ karaeng Asyur angkanaya nia’mi labattu pasukang Mesir untu’ ambunduki ke’nanga, nipimping ri Tirhaka battu ri Sudan. Lanri kammana anjo akkirimmi sura’ anjo karaeng Asyur mange ri Hizkia,
10 karaeng Yehuda. Kammanne bonena anjo suraka, "Teako eroki nitipu ri janjinNa Allata’ala nupattoanga, angkanaya tena nulatu’guru’ antama’ ri limangku.
11 Nulangngere’mi angkanaya tunggala’ pa’rasangang le’baka nabunduki sikamma karaeng Asyur niancuru’ taba sikali. Teako kapangi angkana akkulleko lata’lappasa’.
12 Ri wattunna naancuru’ boe-boeku kota Gozan, Haran, siagang Rezef, kammayatompa nabuno sikamma tu Eden niaka ammantang ri Telasar, tena manna se’re rewatana ke’nanga ampasalamaki ke’nanga.
13 Kemae ngasengi karaeng kota Hamat, Arpad, Sefarwaim, Hena, siagang Iwa?"
14 Natarimami Hizkia anjo suraka battu ri sikamma tunasuroa nampa nabaca. Le’baki anjo a’lampami mange ri Balla’Na Batara nampa naka’rang anjo suraka ri dallekanNa Batara,
15 nampa appala’ doang nakana,
16 "O, Batara Kaminang Makoasaya, Allata’alana Israel, niaka ri empoang kala’biranTa, tena ruanTa Allata’ala angkoasai sikontu kakaraenganga ri tompo’na buttaya. IKattemi ampa’jari langika na buttaya.
17 O, Batara, Kiparhatikang laloi apa kajarianga mae ri kambe kamma-kamma anne. Pilangngerimi sikamma kana-kana mappakatunana Sanherib mae ri Katte, Allata’ala mattallasaka.
18 Naasseng ngasengi ikambe, o Batara, angkanaya anjo sikamma karaeng Asyur jaimi bansa le’ba’ napanraki siagang naancuru’ sikamma pa’rasanganna ke’nanga.
19 Sikamma rewatana ke’nanga natunu tommi siagang naancuru’ tommi, lanri sikamma anjo rewataya tena sikali koasana. Anjo rewataya poro patung kayuji siagang patung batuji, bate pare’ rupatau.
20 O, Karaeng Allata’alana ikambe, Kilappassang laloi ikambe battu ri anjo tu Asyur, sollanna naasseng sikontu bansaya ri lino angkana iKatteji bawang, tena ruanTa Batara ri lino."
21 Nampa akkiring pasang Na’bi Yesaya mae ri Karaeng Hizkia, angkanaya nipialimi pappala’ doanna karaenga ri Batara.
22 Nakana Batara, "Lanakakkaliko siagang lanacau-cauko kota Yerusalem, ikau Sanherib!
23 Nuassenji angkana inai anjo nupakka-pakkanaia siagang nuhinaya? INakke, Allata’alana Israel, Allata’ala matangkasaka.
24 Akkiringko tau untu’ akkana borro, angkanaya lanri jaina kareta bundu’nu, nupatundu’mi sikamma moncong kaminang tinggia ri Libanon. Nupattampo-tampoangi kalennu angkanaya le’ba’mi nuta’bang sikamma poko’-poko’ camarana kaminang tinggia siagang kaminang ga’gaya, kammayatompa nutarrusu’mi sikamma romang kaminang ka’ba’na.
25 Nupattampoang tongi angkanaya angngekeko bungung siagang angnginung je’ne’ ri sikamma pa’rasangang maraeng, kammayatompa sikamma tantaranu naonjo’-onjokangi Binanga Nil sa’genna kalotoro’.
26 Tale’bakapi nulangngere’ angkanaya yangasenna anjo apa le’baka kajariang apa le’ba’ memammo Kurancana battu riolo? Nampa kamma-kamma anne iNakke anggaukangi. INakke assareko koasa untu’ angngancuruki kota-kota niaka pattahanganna a’jari rumbangang.
27 Sikamma tau niaka ammantang anjoreng tena kullena; ta’bangkai ke’nanga lanri malla’na. Rapangi ke’nanga ruku’ ri parang yareka ruku’ attimboa irate ri pattongko’na ballaka, a’jari kalotoroka punna niiri’ ri anging bambang battu raya.
28 Mingka tena taKuasseng ri passala’ batangkalennu. Kuassengi apa nugaukanga siagang kemae lampanu. Kuassengi angkanaya larro sikaliko mae ri Nakke,
29 siagang Kulangngere’mi ri passala’na anjo kalarroannu siagang katampoannu. Kamma-kamma anne Kusarei pakkai’ ka’murunnu siagang Kusarei sa’mang bawanu, nampa Kubesokko ammotere’ allalo ri oloang nuoloa ri wattunnu battu."
30 Nakiring tongi Yesaya mange ri Hizkia anne pasang angkanaya, "Iaminne la’jari pammatei mae ri kau. Anne taunga siagang taung ri dallekang, langnganrei taua gandung attimboa kalenna. Mingka punna le’baki anjo, akkullei ke’nanga a’lamung gandung siagang anggoro’, nampa nakasia’ wassele’na.
31 Tu Yehuda niaka ija attallasa’ lakala’biangi lalang tallasa’na, rapang lamung-lamung lantang sikalia aka’na, nabaji’ rapponna.
32 Ri Yerusalem siagang irate ri Bulu’ Sion lania’ tau salama’, lanri le’ba’na Napattantu Batara Kaminang Makoasaya angkana lakammai anjo passala’ lakajarianga.
33 Iaminne kananNa Batara ri passala’na karaeng Asyur: ‘Talantamakkai ri Yerusalem yareka talanapatembakai panana mange ri anjo kotaya. Sikamma tantarana ammakea pa’lapa’ barambang tena la’reppese’ mange ri anjo kotaya, siagang tena nalanibangung pattahangngang untu’ antammulili anjo kotaya.
34 Lammotereki karaeng Asyur allalo ri oloang naoloa ri wattunna battu, natenaja napantamakki anjo kotaya. INakke, Batara, anne a’bicara.
35 LaKuallei siagang laKula’langi kota Yerusalem lanri kalompoang KalengKu, siagang lanri parjanjiangKu siagang atangKu Daud.’"
36 Anjo bangngia battumi malaeka’Na Batara ri kemana tu Asyur na nabuno 185.000 jaina tantarana. Ammukona bari’basa’ tassia’-siara’mi anjo maya’na ke’nanga.
37 Ammunduru’mi Karaeng Sanherib, karaeng Asyur, nampa ammotere’ mange ri Niniwe.
38 Ri se’reang allo, ri wattunna sitabang nagaukang ibadana lalang ri balla’ rewata Nisrokh, nibunomi siagang pa’dang ri Adramelekh siagang Sarezer, rua ana’ bura’ne kalenna. Le’baki anjo larimi ke’nanga mange ri Ararat. Jari nisambeammi a’jari karaeng ri ana’ bura’nena maraenga, niarenga Esarhadon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA