Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca ibegi Raja Hiskia cakap kalak ndai, icaingkenna uisna erkiteken cedana atena. Jenari ipakena uis guni, tanda ate ceda, emaka lawes ia ku Rumah TUHAN.
2 Isuruhna Eliakim, eme pegawai si ngaturken istana raja, Sepna, sekretaris kerajan, ras imam-imam si nggo metua, gelah ndahi Nabi Jesaya anak Amos. Kalak enda pe kerina make uis guni.
3 Enda me berita si itengeskenna man Jesaya, "Sendah me wari kiniseran; kita nggo iukum ras ijuruken. Kita desken sekalak diberu si nandangi mupus, tapi la cukup gegehta petubuhsa.
4 Raja Assur nuruh puanglimana nggombangi Dibata si nggeluh. Mbera-mbera ibegi TUHAN Dibatandu kerina ranan si megombang emaka IukumNa kalak si melaskenca. Emaka ertotolah man Dibata guna bangsanta si tading denga."
5 Kenca ialoken Jesaya berita si itenahken Raja Hiskia,
6 itenahkenna mulihken jabapna nina, "Ikataken TUHAN man bandu maka ula kam mbiar megi cakap kalak Assur e, aminna gia ikatakenna maka TUHAN la ngasup ngkelini kam.
7 Ibahan TUHAN pagi maka raja e megi berita-berita si erbahanca ia mulih ku negerina, janah i jah isuruh TUHAN kalak munuhsa."
8 Ibegi pegawai Assur ndai maka rajana nggo lawes i Lakis nari janah sangana iserangna kota si ndeher rassa, eme kota Lipna. Emaka lawes pegawai e ku je nungkunisa.
9 Lit seh berita man kalak Assur maka tentera Mesir si ipinpin Raja Tirhaka i Sudan nari sangana reh nerang ia. Kenca ibegi raja Assur si enda, ikirimkenna sada surat man Hiskia raja Juda
10 nina, "Dibata inganndu ernalem nggo ngataken man bandu maka labo kam tertaluken aku; tapi ula kam tertipu megi si e.
11 Tentu nggo ibegindu kai si ibahan raja Assur man tiap negeri si nggo iputuskenna gelah ikernepken. Akapndu kin banci kam pulah?
12 Nini-niningku ngeradasken kota Gosan, Haran, ras Resep janah ibunuhina bangsa Bet-Eden si ringan i Telassar, janah la lit sada pe dibata-dibatana si ngasup ngkelinisa.
13 I ja dage genduari raja kota Hamat, Arpad, Separwaim, Hena, ras Iwa?"
14 Ialoken Raja Hiskia surat e i bas persuruhen ndai nari, jenari iogena. Kenca bage lawes ia ku Rumah Pertoton, itamakenna surat e i adep-adepen TUHAN,
15 emaka ertoto ia nina,
16 "O TUHAN si Mada Kuasa, Dibata nu Israel, si kundul i bas kursi KinirajanNdu i babo Kerubim Kam kap ngenca Dibata, si merentah kerina kerajan-kerajan doni. Kam kap si nepa langit ras doni.
17 TUHAN, dengkehkenlah kami, janah tataplah kai si jadi genduari i bas kami. Begikenlah kai si ikataken Sanherip nggombang-nggombangi Kam Dibata si nggeluh.
18 Kerina kami metehsa TUHAN, maka raja-raja Assur nggo ngeradasken melala bangsa, ibahanna negerina terulang.
19 Jenari icilukna dibata-dibatana, sabap si e kerina labo Dibata si tuhu-tuhu, tapi gana-gana kayu ras batu, bekas tan manusia erbahanca.
20 Dage, o TUHAN Dibata, pulahi min kami i bas kalak Assur e nari, gelah kerina bangsa doni enda meteh maka Kam ngenca Dibata."
21 Kenca bage itenahken Jesaya tenah man Raja Hiskia. I bas tenah e ikataken Nabi Jesaya maka guna ngaloi pertoton raja,
22 TUHAN nggo ngataken, "O Sanherip, itawai dingen igombangi kota Jerusalem kam.
23 Ise kin akapndu si ihina ras itokoh-tokohindu e? Dibata si Badia nu Israel kap si ilawanndu e.
24 Isuruhndu suruh-suruhenndu gelah meganjang pengeranana i lebe-lebengKu, nindu, 'Gereta perangku nggo naluken deleng-deleng Libanon si meganjang. I das deleng e nggo kutabah batang kayu ingul si meganjangna ras batang tusam si mejilena, janah nggo aku seh ku tengah kerangen si mbagesna.
25 Nggo kukali sumur-sumur i negeri kalak si deban janah nggo kuinem launa. Nggo iperjaki tenterangku Lau Nil seh kerah.'
26 La kin nggo ibegindu maka kerina si enda ndekah me nggo Kurencanaken? Janah genduari nggo Kulakoken sue ras rencanangKu e. Nggo Kubereken man bandu gegeh lako nalihken kota-kota si erbenteng jadi gun-gunen batu.
27 Kalak si ringan i bas kota-kota e la ergegeh, mbiar dingen jengang kerina. Ia desken rih i bas sada juma tah pe dukut si turah i datas tarum rumah, melus iembusken angin Timur si melas.
28 Tapi Kueteh nge kerinana kerna kam, kai si ilakokenndu ras ku ja perlawesndu. Kueteh nge kuga nembehna atendu ngenehen Aku.
29 Nggo Kualoken berita kerna pernembeh ate ras kiniganjangen ukurndu. Emaka genduari Kukiling igungndu,janah Kusangam babahndu, jenari Kutegu kam mulih arah dalanndu reh mbarenda."
30 Kenca bage nina Jesaya man Raja Hiskia, "Enda me tandana kerna kai si nandangi jadi. I bas tahun enda ras tahun si reh, buah dukut si turah-turah bana ngenca lit man panganndu, tapi i bas tahun si peteluken nggo banci kam man gandum, jenari iperanindu, bage pe nuan anggur jenari man buahna.
31 Kalak si tading si nggeluh denga i Juda turah ka mulihken desken sinuan-sinuan si rurat mbages ku teruh taneh jenari erbuah.
32 Lit nge si tading nggeluh i Jerusalem ras i Deleng Sion, sabap bage ate TUHAN si Mada Kuasa IbahanNa.
33 Enda me si ikataken TUHAN kerna raja Assur e, 'Labo ibengketina kota enda, janah labo ipanahkenna sada anak panah pe ku je, labo lit sekalak pe tentera si rampang-ampang reh ndeheri kota e, janah labo lit taneh ipegun-gun jadi benteng guna ngkepung kota e.
34 Mulih me ia arah dalanna reh mbarenda, dingen labo ia sempat bengket ku bas kota e. Aku, TUHAN, nggo ngatakenca.
35 Aku mpertahanken kota Jerusalem ras ngkawalisa, guna kehamaten man bangKu bage pe erkiteken perpadanen si Kubahan ras suruh-suruhenKu Daud.'"
36 Sekalak malekat TUHAN lawes ku perkemahen kalak Assur. I je ibunuhna 185.000 tenterana. Pepagina, nandangi mbincar matawari teridah amparen i je kerina maitna!
37 Emaka mundur me Sanherip, raja Assur, mulih ku Niniwe.
38 I bas sada wari, asum ia ersembah i bas rumah pertoton dibata-dibatana Nisroh, reh anakna dua kalak. Adramelek ras Sareser, munuh ia alu pedang jenari lompat anakna e ku taneh Ararat. Anakna si deban, eme Esarhaddon, nggantiken ia jadi raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA