Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "Cilakai sikamma pamimpinna tu Yehuda, lanri angngewana ke’nanga ri Nakke. Rancanana ke’nanga naturuki, teai rancanaKu. Annekengi parjanjiang ke’nanga, tenaya nasicoco’ siagang erokKu. Jari attambung-tambummi dosana ke’nanga.
2 A’lampai ke’nanga mange ri Mesir nampa tena nappala’ kaputusang battu ri Nakke. A’la’langi ke’nanga mae ri Mesir siagang anrannuangi pannulung mae ri karaeng Mesir.
3 Mingka lanipala’bai pa’mai’na ke’nanga ri anjo karaenga, anjo panrannuang naminasaia ke’nanga latena na’rupa.
4 Manna pole nabattumo sikamma tunisurona Yehuda mange ri kota-kota Zoan siagang Hanes ri Mesir,
5 kabusu’na taua lasiri’-siri’ ngasengi lanri napattoanna ke’nanga bansa tenaya matu-matunna mae ri ke’nanga. Teai passawallang yareka pannulung nagappa ke’nanga, passangalinna panghinaang."
6 Kammaminne pappasanNa Batara ri passala’na sikamma olo’-olo’ niaka ammantang ri butta bageang timboro’, "Sikamma tunisuroa napilurangngimi keledaina siagang untana ke’nanga rassi hadia, nampa numalo ri daera jaia bahaya lanri napammantangngi singa, ulara’ a’racung, siagang naga akka’nyi’. Sikontu anjo hadiaya napassareangi ke’nanga mae ri bansa tenaya kullena antulungi ke’nanga.
7 Sia-siaji bantuanna Mesir. Lanri kammana anjo nigallara’mi Mesir, ‘Naga tenaya bahayana’."
8 Nasuroa’ Allata’ala ancataki kaja’dallanna umma’Na lalang se’rea kitta’, a’jari pappiu’rangi untu’ satunggu-tungguna.
9 Saba’, anjo ke’nanga bansa nangai angngewaya ri Allata’ala, nangai a’balle-balle siagang tale’bakai ero’ appilangngeri ri pangngajaranNa Batara.
10 Nakana ke’nanga mae ri sikamma na’bia, "Tongkoki bawanu! Teako paui apa annabaya mae ri kambe, mingka ia apa eroka nalangngere’ ikambe. Lappassammi ikambe tuli appikkiri’ takamma-kamma.
11 A’liliko siagang oloang maraeng nuolo. Teako ganggui ikambe siagang Allata’ala matangkasa’na Israel."
12 Lanri kammana anjo Nakanamo Allata’ala matangkasa’na Israel, "Nutollaki kanangKu siagang nupattoang panjallakkanga siagang pannipuanga.
13 Lanri kammana anjo sala ngaseng mako. Rapangko tembo’ tinggi a’lattaya battu rate sa’genna naung; larumbang silalonnako.
14 Laancurukko rapang uring butta tappokaraka na tassiara’, sa’genna anjo reppe’na takkulleami nipake angngalle bara pepe’ battu ri pappalluanga yareka untu’ anynye’ro’ je’ne’ battu lalang ri ba’ je’neka."
15 Nakana Batara Kaminang Tinggia, Allata’ala matangkasa’na Israel mae ri umma’Na, "Toba’ mako siagang sannang mako, nulanipasalama’. Tappa’ mako mae ri Nakke na nupakasannang pa’mai’nu, naKupakajarrekko." Mingka taerokako!
16 Ba’lalo apparekko rancana ero’ lari battu ri musua a’dongko’ jarang gassinga larina. Baji’mi! Memang musti lariko sinampe’! Nupikkiriki angkana gassingi larina anjo jarannu, mingka sitojenna gassingangngangi larina tau angngondangiako.
17 Sisa’bu tau lalari nasitauja musu ambakkai, siagang limaji tau ambakkaiko nulari ngasemmo. Battu ri sikontu pasukannu se’re mami benteng bandera ammenteng rate ri coppo’ bulu’.
18 Mingka manna nakamma, Natayangi Batara wattunna untu’ Napappicinikang pangngamaseanNa mae ri kau ngaseng. Sadiai langkamaseangko. Saba’ Batarami Allata’ala anggaukangi apa kaminang cocoka mae ri KalenNa. Mate’nei tau manrannuanga mae ri Ia.
19 He, ikau niaka ammantang ri Yerusalem, tena nutulusu’ langngarru’. Mangngamaseangi Batara, siagang lalintaki appiali ri kau punna akkiokko appala’ tulung ri Ia.
20 Nasareko Batara wattu paccoba lompo lanri ero’nu Naajara’. Mingka kamma-kamma anne KalenNa anrurungangko, sa’genna lanukasia’ kahaderanNa.
21 Punna ammengkako battu ri oloanga, lanulangngereki battu ri boko sa’ranNa angkana, "Anne oloanga; anne nupinawang."
22 Sikamma patung barhalanu nilapisika pera’ siagang bulaeng, lanupelaki sangkamma loro, nampa nukana, "Bellako battu ri nakke!"
23 Punna appakiorokko bine, laNapaturungi Batara bosia sollanna attimbo anjo binea siagang angngerang wassele’ kattoang alla’bi-la’bia. Untu’ olo’-olo’ piaranu lasadiai parang ruku’ luaraka.
24 Sapi lakia siagang keledai appa’jekoa ri kokonnu langnganrei ruku’ kaminang baji’ le’baka nisa’lakkangi.
25 Ri allo nitammulilina tembo’-tembo’ pattahanganna sikamma musunnu siagang nibuno sikamma taunna, sikamma monconga siagang buluka lappasuluki siapa are jaina kaloro’.
26 Bulanga laccayai sangkamma mataallo, siagang mataalloa la’lappi tujui singara’na ri singara’ biasaya, sanrapang singara’ tuju alloa nipasse’re a’jari se’re. Yangasenna anjo lakajarianga ri wattu Naroko’na Batara sikamma loko’na umma’Na, ia le’baka Napangngajari.
27 KakoasanNa siagang kala’biranNa Batara niciniki battu bella. Pepeka siagang umbuna ampa’nassai kalarroanNa. A’bicarai siagang ke’nanga, siagang kana-kananNa attunui rapang pepe’.
28 Nasuroi anginga a’jappa ri dallekanNa rapang a’ba sa’ge kallong angnganyukkangi sikamma apa-apaya. Naancuruki bansa-bansaya, siagang Napassala-salangi sikamma rancana ja’dala’na ke’nanga.
29 Mingka ikau ngaseng, umma’Na Allata’ala, larannuko siagang lakkelongko sangkamma ri wattu bangngi passua’-suarrang agamaya. Larannuko rapang tau a’jappaya nirurungang ri sa’ra suling mange ri Balla’Na Batara ri Yerusalem, mappatojenna Israel.
30 LaNapappilangngerangi Batara sa’ra mala’biri’Na, nampa tunggala’ taua lanakasiaki koasaNa hebaka. KalarroanNa lappabattui pepe’ appamutunga, bosi lompo, bosi batu siagang anging lompo.
31 La’jari gegereki tu Asyur punna nalangngere’ sa’ranNa Batara siagang nakasia’ hukkungang lompoNa.
32 Lalang napisa’ringinna sikamma pannunrunNa, umma’Na Batara assannang-sannangi appasa’ra musi’ ganrang, siagang kacapi. KalenNa Allata’ala la’bundu’ angngewai tu Asyur.
33 Battu riolo iji nale’ba’mo nipasadia tampa’ pattunuanna karaeng Asyur. Anjo tampaka lantangi naluara’, rassi kayu tunuang attambung-tambung. LaNaparinrai Batara nampa nappasa’Na Napatui’ sangkamma batu a’rinra assulu’ ri nappasa’na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA