Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN, "Palang para pamimpinna Yehuda polana aberonta’ ka Sengko’. Pin-pamimpin jareya atoro’ ka na-rancana se banne rancanana Sengko’; neken parjanjiyan se tabaligga Tang karep, daddi dusana apo’-tompo’.
2 Pin-pamimpin jareya entar ka Messer ta’ arembak ban Sengko’; nyare pangaoban ka Messer ban menta tolong ka rato Messer.
3 Tape bi’ rato Messer reng-oreng jareya bakal epatacogaga ban pangaoban se earep dhari Messer ta’ kera ekaolle.
4 Maske otosanna Yehuda la napa’ ka tha-kottha Zowan ban Hanes e Messer,
5 reng-oreng jareya bakal todhusa polana ngandellagi bangsa se ta’ aguna ka bangsana. Se ekaolle reng-oreng jareya banne kaontongan ban partolongan, tape la’-mala’ eya-seya."
6 Areya’ dhabuna Pangeran parkara ban-keban se aenggun e tana bagiyan lao’, "Para otosan mowa’e onta ban hemarra bi’ rang-barang se ekagabaya le-olle, pas lebat e dhaera se bannya’ babajana, iya areya kennengnganna macan, olar se badha opassa ban naga se akalembang. Le-olle jareya egabay tor-ator ka bangsa se ta’ bisa nolong aba’na ban bangsana.
7 Bantowanna Messer parcoma. Daddi bi’ Sengko’ Messer ejulugi ‘Naga se ta’ babaja’."
8 Allah makon sengko’ nyathet kajahadanna ommadda e dhalem settong ketab menangka parengeddan kaangguy salanjangnga.
9 Sabab reng-oreng jareya kaetong bangsa se dujan aberonta’ ka Allah, dujan lecegan ban ta’ tao endha’ ngedhingngagi pangajaranna PANGERAN.
10 Ca’na reng-oreng jareya ka para nabbi, "Ambu colo’na! Sengko’ ta’ osa balai barang se bendher, balai bai barang se terro ekataowana sengko’, barang se masenneng. Dina sengko’ mekkerana barang se dha’-tadha’.
11 Kassa’ ondur, nyare jalan laen. Sengko’ ja’ ganggu ban Allahna Isra’il se socce."
12 Daddi Allahna Isra’il se socce adhabu kantha reya, "Ba’na nolak Tang oca’ ban ngandellagi panganeyaja’an ban panepowan.
13 Daddi ba’na reya sala. Ba’na padha ban geddhung se tenggi se tennar dhari attas sampe’ ka baba; ba’na bakal gujura daksakala.
14 Ba’na bakal remmoga akantha polo’ tana se bella atabuyan, sampe’ la’-bella’anna tadha’ se ekennenga angguy epangala’ mardha dhari tomang otabana epanyero’ aeng dhari pennay."
15 GUSTE Allah Se Mahatenggi, Allahna Isra’il se socce, adhabu ka ommadda, "Mara atobat ban pakalem, ba’na epasalamedda bi’ Sengko’. Paparcaja ka Sengko’ kalaban ate se taremtem, ba’na epakowada bi’ Sengko’." Tape ba’na ta’ endha’.
16 La’-mala’ ba’na andhi’ maksod buruwa dhari moso nompa’a jaran se santa’. Nyaman! Pajat ba’na dhaggi’ kodu buru! Pangrasana ba’na jaranna cokop santa’, mangkana reng-oreng se nyerser ba’na asanta’an.
17 Saebu oreng bakal buruwa nangale’e ancamanna moso settong, ban ancamanna oreng kalema se andaddiyagi ba’na kabbi padha buru. Dhari pasukanna ba’na pera’ kare canggana mandhira settong e attassa gunong.
18 Maske kantha jareya, PANGERAN gi’ anante’ sa’adda noduwagiya kabellasanna ka ba’na. Salerana asadhiya noduwagiya kabellasanna ka ba’na. Sabab PANGERAN reya Allah se alampa’agi sabarang se teppa’. Pojur oreng se ngarep ka Salerana.
19 He, reng-oreng se enneng e Yerusalim, ba’na ta’ bakal nangesa ros-terrosan. PANGERAN reya bellas ase, ban ceppet apareng jawaban mon ba’na aserro nyo’on partolongan ka Salerana.
20 Pangeran marenge ba’na bakto coba’an se berra’ kaangguy ngajar ba’na. Tape sateya Salerana dibi’ asarengnge ba’na sampe’ ba’na ngalame kahadiranna.
21 Mon ba’na nyaleyot dhari jalan, e budhiyanna ba’na tanto badha sowarana se adhabu kantha reya, "Reya’ jalanna; toro’ jalan reya."
22 Ca-arca brahalana ba’na se alapes salaka ban emmas bi’ ba’na bakal ebuwanga akantha oreng mowang kotoran, sambi ngoca’, "Ondur!"
23 Mon ba’na nabur ne-bine, PANGERAN bakal madhatengnga ojan sopaja ne-bine jareya tombuwa ban madhateng hasel se ta’ sakera-kera. Kaangguy ebinna ba’na Pangeran bakal nyadhiya’agiya talon se lebar.
24 Sape lake’ ban hemar se nyalaga teggalla ba’na bakal ngakana pakanna ebin se paleng nyaman se esadhiya’agi sacara kusus.
25 E are bakto teng-bintengnga mosona ba’na ekeppong ban reng-orengnga epate’e, e bakto jareya saneyap gunong ban gumo’ bakal nancellagiya aeng se daddi ngay-songay kene’.
26 Bulan bakal tera’a akantha are, ban are bakal makalowara sonar se tera’na pettong kalena se biyasana, akantha tera’na are se abidda pettong are epasettong. Jareya kabbi bakal kadaddiyan e bakto PANGERAN abetbet ban mabaras ka-lokana ommadda se la ebukbuk bi’ Salerana.
27 Kakobasa’an ban kaagunganna PANGERAN katon dhari jauna. Apoy ban okos noduwagi dukana panggaliyanna. Pangeran abu-dhabu, ban dhabuna ngello’ akantha apoy.
28 Salerana makon angen ajangadha’i Salerana akantha banjir se tenggina sale’er se alanyo’ sabarang se badha. Sa-bangsa epatompes, sabarang sajjana se jahat epabuddhu.
29 Tape ba’na, ommadda Allah, bakal peraga ban anyanye akantha e bakto araya’agi paraya’an agama. Ba’na bakal sennengnga akantha reng-oreng se ajalan se eerengngagi soleng entara ka Padalemman Socce, se abillai Isra’il.
30 PANGERAN bakal makalowara sowarana se agung sopaja ekaedhinga oreng, ban saneyap oreng bakal ngarassa’agiya kobasana se talebat rajana. Dukana bakal madhatengnga apoy se ngello’, ojan derres, ojan bato ban kaleng busbus.
31 Oreng Asyur bakal engerra mon ngedhing sowarana PANGERAN ban ngarassa’agi okomanna se berra’.
32 Sabatara reng-oreng jareya ngarassa’agi se ebukbuk PANGERAN li-baliyan, ommadda PANGERAN neng-sennengngan ngangguy mosik terbang ban calempong. Allah dibi’ bakal aperranga ngadhebbi bangsa Asyur.
33 Molae lamba’ la esadhiya’agi kennengnganna pangobbaranna rato Asyur. Kennengngan jareya dhalem tor lebar, aesse kaju atombugan. Kaju jareya bi’ Allah bakal eparabbanga kalaban nyerrobbagi nyabana akantha songay balirang.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA