Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tonggor ma, palumeion anjaha parsedaon ni Jahowa ma tanoh in; pabalikon-Ni ma sisikni anjaha pamerapon-Ni pangisini.
2 Gabe doskon simbuei ma malim, doskon juakjuak tuan-tuan; doskon jabolon naboru tuan naboru, doskon sipamboli sipanjual; doskon panraih na paraihkon, anjaha na pautangkon dos pakon siparutang.
3 Lungun tumang do tanoh in anjaha bois hona rampas, ai Jahowa do na mangkatahon hata in.
4 Horu anjaha melus do tanoh in; mangeruti anjaha hurleh do dunia on; na banggal-banggal, jolma na i tanoh in lambin galek.
5 Anjaha butak do tanoh in ibahen pangisini, ai ilanggar sidea do titah, iparnalang aturan anjaha iosei padan sisadokah ni dokahni.
6 Halani ai papa do mambondut tanoh in, anjaha pangisini marsitaronon halani panlanggaronni; halani ia imosogkon do pangisi ni tanoh in, anjaha otik mando jolma na tading.
7 Marhoru do anggur, melus hayu anggur, marhoih-koih sagala siparmalas ni uhur.
8 Mangadi do malas ni uhur binahen ni tambur, maronti surak-surak ni siparolob-olob, marsaran megah ni uhur binahen ni husapi.
9 Seng be mandoding-doding sidea sanggah minum anggur, siinuman na koras paet do bani na manginumsi.
10 Domma irumbakkon huta na tarulang in, tutup do sagala rumah gabe seng tarmasuki.
11 Doruh-doruh halani lang dong anggur tarbogei i alaman, sundut do sagala malas ni uhur, anjaha misir olob-olob na i tanoh in.
12 Hasedaon do tading i huta in, marosak do horbanganni itondoli.
13 Ai sonon do sihol masa i tanoh in i tongah-tongah ni bangsa-bangsa, songon hayu jetun na nidugur, songon na marturiang dob salpu pariama buah anggur.
14 Anggo sidea ipagogoh ma sorani marolob-olob, halani hamuliaon ni Jahowa marsurak-surak do sidea hun hasundutan.
15 Halani ai pasangap nasiam ma Jahowa, ale parhapoltakan, nasiam na bani pulou-pulou, puji nasiam ma goran ni Jahowa Naibata ni Israel.
16 Humbani ujung ni tanoh on ibogei hanami do doding puji-pujian: Hasangapon ma bani Parpintor in. Tapi anggo ahu ningku do, “Magou ma ahu, bursik ma ahu!” Halak partahi-tahi mantahihon, tongon mantahihon do halak partahi-tahi.
17 Hagobiron, godung ampa siding do mangonai bam, ale pangisi ni tanoh in!
18 Barang ise na maporus halani sora ni hagobiron, madabuh do hubagas godung, anjaha atap ise na naik humbagas godung hona siding do. Ai domma ibuha jandela ni langit, anjaha idugur onjolan ni tanoh in.
19 Bolah tumang do tanoh in, mangkarigat anjaha dugur.
20 Munjei-unjei do tanoh in songon halak na mabuk, mambal-ambal songon gayang-gayang, ai borat do panlanggaronni ai mardondon bani, gabe dabuh ma ia, anjaha seng tarjongjongkonsi be.
21 Bani panorang ai marlulu ma Jahowa bani bala na i atas ai, na i babou, pakon bani raja-raja ni tanoh on, na i atas tanoh on.
22 Rap do sidea patumpuon songon halak na tartangkap ibagas godung, tutupon do sidea hubagas tutupan, anjaha dob piga-piga dokah uhumon do sidea.
23 Jadi maila ma bulan anjaha bador mata ni ari, ai Jahowa Zebaot do Raja i Dolog Sion ampa i Jerusalem, anjaha patalaron-Ni do hamuliaon-Ni, i lobei ni sintua-sintua-Ni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA