Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara, "LappabattuA’ anging pammanraki, ammirika mae ri Babel siagang mae ri pandudu’na.
2 LappabattuA’ bansa maraeng untu’ angngancuruki Babel, rapang anging anri’bakang awang gandung. Ri anjo allo battuna balaya, lanabunduki ke’nanga anjo pa’rasanganga battu ri kere-keremae, siagang nabarrasaki sa’genna tangkasa’.
3 Teako sarei kasampatang tantarana untu’ ampalio-lioi ana’ panana yareka angkalompoang pa’maiki pakeang bundu’na. Ana’-ana’ rungkana teako lappassangngi attallasa’. Ancuru’ ngasengi sikontu tantarana niaka!
4 Laloko’ sannaki siagang lamatei ke’nanga ri agang-agang kotana ke’nanga.
5 INakke, Batara, iamintu Allata’ala Kaminang Koasaya, Allata’ala Matangkasa’na Israel, tena nalaKubokoi Israel siagang Yehuda, manna pole nadorakamo ke’nanga ri Nakke.
6 Pasalamaki kalennu! Lariko battu ri Babel, gassingka amminawang tongko nibuno lanri dosana ke’nanga! Nasaba’ iaminne wattunna laKubalasa’ kaja’dallanna Babel, siagang laKuhukkung situru’ panggaukanna.
7 Riolo Babel rapangi cangkiri’ bulaeng Kuta’gala’ ampa’jari sikontu linoa nasa’ring. Bansa-bansaya angnginungi anggoro’ battu ri cangkirika, sa’genna a’jari pongoro’ ke’nanga.
8 Mingka ti’ring tu’guruki Babel na reppe’. Karrukimi Babel, siagang pa’boyammi pa’balle loko’-loko’na, gassingka akkulleji ammolle.
9 Tau annompanga ammantang anjoreng massing nakanamo para ia, ‘Niusahaimi antulungi Babel, mingka tala’mi! Bajikangngang nibokoimi anne pa’rasanganga nakimassing ammotere’ mange ri pa’rasanganta. Nahukkummi Batara Babel siagang hukkungang lompo, naancuru’ taba sikalimi.’"
10 Nakana umma’Na Batara, "Napappicinikammi Batara angkana niakki’ ri katojenganga. Umba ki’lampa mange ri Yerusalem nampa nicarita anjoreng apa le’baka Nagaukang Karaeng Allata’alata."
11 Nakompami Batara sikamma karaeng Media, lanri eroki Naancuru’ Babel. Iaminjo caraNa ambalasaki panggaukanna tau le’baka angngancuruki balla’Na. Sikamma komandang pasukang pa’bundukanga naparentakangi nakana, "Ciduki ana’ pananu! Pasadiai pattahannu!
12 Assareko tanra untu’ maju ambunduki tembo’-tembo’na Babel. Pakajarreki pa’jaganga. Appa’niakko pajaga. Apparuruko untu’ maju a’bakka!" Napa’rupami Batara apa le’baka Narancanakang mae ri tu Babel.
13 Anjo pa’rasanganga teai sipato’ kalumanynyanna siagang jai binangana, mingka lala’busu’mi wattu tallasa’na; battumi kala’busang katallassanna.
14 Batara Kaminang Koasaya assumpai lanri areng KalenNa angkanaya lappabattui tau rapang katimbang jaina untu’ ambunduki Babel, siagang akkio’-kioki ke’nanga napakamma rannu lanri ammetana.
15 Batara ampa’jari buttaya lanri koasaNa, Napareki linoa lanri kacara’dekanNa, Naka’rangi langika lanri akkala’ baji’Na.
16 Poro assareji bawang parenta, nammarrummo je’neka battu ri passimbanga. Battu ri cappa’na buttaya Napabattui rammanga, nampa Napare’ kila’ tassioroka lalang ri bosia, na Napabattu anginga battu ri pammolikanna.
17 Nacini’na ngaseng anjo kammaya sadara’mi rupataua, angkanaya kalenna toloi na tena pammahanna. Siri’mi panre bulaenga napakamma, nasaba’ patung barhala napareka sangnging palusu’ na tena nyawana.
18 Anjo barhala-barhalaya tena anggaranna, siratangi nicau-cau siagang nihina. Punna narapi’ sallang wattunna, lapanra’ ngasengi ke’nanga
19 Allata’alana Yakub tena nasangkamma anjo barhalaya; Iami ampareki sikontu apa niaka. Arenna iamintu Batara Kaminang Koasaya; le’baki Napile tu Israel a’jari umma’Na.
20 Nakana Batara, "Babel, ikau rapangko palu-palu, sanjataKu untu’ a’bundu’. Kupakeko antunrungi bansa-bansaya siagang sikamma kakaraenganga.
21 Kupakeko untu’ angngancuruki jaranga siagang pabaena, kammayatompa karetana siagang tau a’dongko’na.
22 Kupakeko untu’ ambunoi bura’nea siagang bainea, tau toaya siagang tau rungkaya, tau loloa siagang rungka tenayapa bainenna.
23 Kupakeko untu’ ampanraki pakalawakia siagang olo’-olo’na, pamarria siagang sapi pa’jekona, pamarentaya siagang perwira-perwira tinggia."
24 Nakana Batara, "Kalennu anciniki kamma-kamma anne antekamma batena Kubalasa’ mae ri Babel siagang pandudu’na sikontu kaja’dallanna ke’nanga, iamintu nagaukanga mae ri Yerusalem.
25 He Babel, ikau rapangko moncong ampanrakiai sikontu linoa. Mingka iNakke, Batara, angngewako. LaKupasintakko siagang Kugulungko nampa Kubalang parekangko nikanre ri pepe’ a’jari au.
26 Tena manna se’re batu battu ri rumbangngannu lakkulle pole nipake untu’ ambangung. La’jariko sangkamma parang lompo sa’genna satunggu-tungguna. INakke, Batara, anne akkana."
27 "He karaeng niaka battu wara’! Assare mako pammatei untu’ maju! Pasa’rai tarompeka sollanna allangngere’ bansa-bansaya! Pagioki sikontu bansa-bansaya untu’ mange a’bundu’ angngewai Babel! Suroi kakaraengang Ararat, Mini, siagang Askenas untu’ maju. Angkaki sitau panglima untu’ ampimpingi anjo pa’bundukanga. Pagioki jaranga sanrapanga katimbanga jaina.
28 Pasadiai bansa-bansaya untu’ a’bundu’ angngewai Babel. Kioki karaeng-karaeng Media siagang pamarenta-pamarentana kammayatompa pamimping-pamimpinna siagang tantarana battu ri sikontu pa’rasangang naparentaya ke’nanga.
29 Annekkereki siagang ta’goccangi buttaya lanri Kugaukangi rancanaKu untu’ ampa’jari Babel tampa’ kalotoro’ tenaya napammantangngi tau.
30 Ammarimi tantara Babel a’bundu’, siagang ammantammi ri sikamma pattahangnganga. Tenami kabaranianna ke’nanga siagang tenamo pakkullena. Sikamma pakke’bu’ lompona kotaya le’ba’ ngasemmi nirumbang, siagang sikamma ballaka le’ba’mi nitunu.
31 A’le’basa’-le’basa’mi lari tunisuroa mange ampauangi karaeng Babel angkanaya nibundukimi kotana battu ri kere-keremae.
32 Tampa’ pa’limbangnganga niallemi ri musua, siagang sikamma tampa’ pattahangnganga nitunumi. Silingu-linguimi tantara Babel.
33 Tasalloami nanibeta ke’nanga siagang nionjo’-onjokang ri musua rapang gandung ri tampa’ panggilinganga. INakke, Batara Kaminang Koasaya, iamintu Allata’alana Israel, anne akkana."
34 Yerusalem niancuruki siagang nikanrei sa’genna la’busu’ ri karaeng Babel; nakosongi anjo kotaya rapang botolo’ nakosongi. Rapang sikayu olo’-olo’ sannaka lompona angnga’luki Yerusalem siagang napantama ri battanna sikontu apa bajika battu ri anjo kotaya, nampa napela’ la’binna.
35 Pandudu’na Sion, paumi angkana, "Dasi-dasi nanituju Babel ri kapallakkang sangkammaya nagaukanga mae ri katte!" Pandudu’na Yerusalem, paumi angkana, "Dasi-dasi nanituju Babel ri kapa’risang sangkammaya napabattua mae ri katte!"
36 Lanri kammana anjo Nakanamo Batara mae ri pandudu’na Yerusalem. "LaKuusahakangi parkaranu siagang Kubalasaki panggaukanna musu-musunnu mae ri kau. LaKupa’jari kalotoroki je’ne’na sikamma timbuseng je’neka siagang sikamma binanga niaka ri Babel.
37 Anne pa’rasanganga la’jari pannambungang loroi, tampa’ paccokkoanna kongkong romanga. Mallaki nasa’ring taua anciniki, siagang manna sitau tania’ ero’ ammantang anjoreng.
38 Ammammuki tu Babel rapang singa, siagang assa’ra kammai ana’ singa.
39 Ri wattu cinna duduna ke’nanga angnganre, laKupasadiangi ke’nanga kanre, siagang laKupa’jari nasa’ringi ke’nanga sa’genna dangngala’ ulunna nampa attinro natambangungamo poleang.
40 LaKuerangi ke’nanga untu’ nisamballe rapang ana’ gimbala’, bembe, siagang gimbala’ laki. INakke, Batara, anne a’bicara."
41 Nakana Batara, "Babel nipalecea ri sikontu lino le’ba’mi nialle siagang niempoi. Tamaka appakamalla’na anjo pa’rasanganga mae ri bansa-bansaya.
42 Je’ne’ tamparanga allumpai nai’ ri Babel; bombanga ammarrungi antujui anjo pa’rasanganga.
43 Kota-kotana a’jari tampa’ appakamalla’-mallaki, rapang parang lompo kalotoroka. Tena tau ero’ ammantang yareka allalo anjoreng.
44 Bel, iamintu rewatana pa’rasangang Babel Kuhukkungi. LaKusuroi ampoterangi sikamma apa-apa le’baka narampasa’. Bansa-bansaya tenamo nalanynyomba mae ri ia. Runtummi tembo’-tembo’na Babel.
45 Lanri kammana anjo, lari mako battu anjoreng, he umma’ Israel! Pasalamaki kalennu battu ri a’rerena larroKu.
46 Teako mallakki yareka teako lussakki lanri sikamma kabara’-kabara’ nulangngereka. Tunggala’ taung tassiaraki kabara’ simmara’-maraenga — nia’ kabara’ kapallakkang ilalang pa’rasangang siagang ri sesena karaeng-karaeng a’bunduka ri se’rea mae ri maraenga.
47 Patappaki, angkanaya lanarapiki wattunna laKuhukkung barhala-barhalana Babel. Sikontu anjo pa’rasanganga lanihinai, siagang sikontu pandudu’na lanibunoi.
48 Sikontu apa niaka ri langi’ siagang ri butta lakkio’ rannui punna tu’guru’ Babel mae ri limanna bansa waraka, ia battua untu’ angngancuruki.
49 Jaimi tau ri sikontu linoa mate nibuno lanri Babel, mingka kamma-kamma anne latu’guru’mi Babel lanri Israel mate nabunoa. INakke, Batara, anne akkana."
50 Nakana Batara mae ri tu Israel ri Babel, "Ta’lappasa’ mako battu ri pammunoang! Jari, a’lampamako kamma-kamma anne! Teako attayangngi! Manna pole bellako battu ri balla’, angngu’rangiko ri Nakke, Bataranu, siagang mae ri Yerusalem.
51 Nukana, ‘Nihinai siagang nipakasiriki ikambe; tappela’mi siri’na ikambe lanri bansa maraenga ampammantangngi kamara’-kamara’ tangkasaka ri Balla’Na Batara.’
52 Jari, parhatikangi anne kanangKu. Lanarapiki sallang wattunna nalaKuhukkung barhala-barhalana Babel. Ri sikontu anjo pa’rasanganga lania’ kalangngerang sa’ra tau akkunrareng lanri loko’ sanna’.
53 Manna pole nakkulle Babel nai’ ri langika siagang ambangung pattahangngang takkullea nirapi’, mingka tuli laKupabattuna taua untu’ ampanraki. INakke, Batara, anne akkana."
54 Nakana Batara, "Pilangngeri! Ri Babel lammarrangi siagang langngarruki taua napakamma si’na lanri kaancurang kajarianga ri anjo pa’rasanganga.
55 Kuancuruki Babel siagang Kupammari sa’ra-sa’ra kasuarranga. Musua battui sangkamma bombang ammarrung, siagang sa’ranna tantarana akkiok-kio’ bunduka tojeng maju.
56 Battui ke’nanga untu’ ampanraki Babel, anjakkalaki tantara-tantarana siagang antepoki sanjatana ke’nanga. INakkemi Batara anghukkungi ke’nanga kaja’dallanna, siagang Babel laKubalasaki situru’ siagang panggaukanna.
57 LaKupa’jari nasa’ringi sikamma pagawena Babel — sikamma tau cara’de’na, sikamma pamimpinna siagang tantarana. Tenamo nalambangung-bangung ke’nanga ammotere’, attinromi sa’genna satunggu-tungguna. INakkemi le’ba’ a’bicara; iNakkemi Karaeng, iNakke Batara Kaminang Koasaya.
58 Tembo’na Babel ia kassaka ngaseng laKuancuruki sa’genna a’jari sallappara’ siagang buttaya. Pakke’bu’ lompoa tinggi-tinggia ngaseng laKutunui sa’genna cappu’. Tena matu-matunna poso bansa-bansaya, nasaba’ sikontu bate pare’na ke’nanga lanikanrei ri pepe’. INakke, Batara Kaminang Koasaya, anne akkana."
59 Pa’lapa’ barambanna Karaeng Zedekia iamintu Seraya ana’na Neria cucunna Mahseya. Ri taung makaappa’ pamarentahanna Zedekia karaeng Yehuda, Seraya amminawangi ri Zedekia mange ri Babel. Jari kusaremi se’re tugasa’.
60 Sikontu bala eroka antujui Babel siagang passala’ maraengannaya mae ri anjo pa’rasanganga le’ba’mi kutulisi’ lalang ri se’re kitta’ nigulunga.
61 Nampa kukana ri Seraya, "Punna battuko sallang mange ri Babel, usahakangi sollanna sikontu apa niaka tattulisi’ lalang ri anne kittaka akkullei nibacakang mae ri tau niaka anjoreng.
62 Punna le’baki anjo, appala’ doang mako kamma anne, ‘O Batara, le’baki Kipau angkanaya anne kotaya laKiancuruki sa’genna sikamma rupataua kammayatompa olo’-oloka lalanynya’ taba sikali, siagang anne tampaka la’jari sangkammai parang lompo satunggu-tungguna.’
63 Jari, punna le’ba’ nubaca bonena anne kittaka mae ri sikamma anjo taua, sikkokangi ri batu anne kittaka, nampa nupasambila antama’ ri tangnga-tangngana Binanga Efrat,
64 nampa nukana, ‘Kammaminne lakajarianga mae ri Babel. Anne pa’rasanganga latallangi siagang talammumbayami ammotere’ lanri bala Napabattua Batara mae ri ia.’" Sa’genna anrinni kana-kananna Yeremia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA