Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN, "Kubaba angin si engkernepken Babilon ras kalak si ringan i je.
2 Kusuruh me bangsa si deban ngkernepken Babilon desken angin engkabangken segal. Tupung wari pengkernepen e nggo seh, itadingkenna negeri e lume.
3 Ula bereken waktu man tentera-tenterana manahken anak panahna. Ula pediat ia make baju besina. Ula cidahken perkuah ate man anak peranana! Kernepken kerina tenterana!
4 Kerina me ia luka dingen maten i gedang-gedang dalan kota-kotana.
5 Aku, TUHAN Dibata si Mada Kuasa langa nadingken Israel ras Juda, aminna pe ia nggo erdosa man bangKu, Aku si Badia nu Israel.
6 Pedas tadingken Babilon! Lompatken guna engkelini kesahndu! Ula kam mate erkiteken dosa-dosa Babilon. Genduari erbalas ateKu dingen ngukumsa rikutken patutna.
7 Babilon desken calung emas kap i bas tanKu, erbahan kerina belang-belang doni enda mabuk. Bangsa-bangsa doni enda minem anggur taresa, erbahanca kerina nggo mehado.
8 Babilon rempet me guling dingen kernep! Erceda atelah kerna si e! Tambari min lukana, mbera-mbera malem denga ia.
9 Nina kalak pertandang si tading i je, 'Nggo si cubaken nambari Babilon, tapi nggo melawenca. Sitadingkenlah ia genduari, ota kita mulih ku kutanta. Babilon nggo iukum Dibata alu kerina gegehna dingen nggo keri ikernepkenna.'"
10 Nina TUHAN, "Nina bangsangKu, 'Nggo icidahken TUHAN maka kita nge si payo. Ota kita mulih gelah situriken man kalak si ringan i Jerusalem kai si nggo ilakoken TUHAN Dibatanta.'"
11 TUHAN nggo nuruh raja-raja Medi, sabap AteNa engkernepken negeri Babilon. Bagenda me Ia erbalas erkiteken Rumah Pertoton si nggo ceda. Nina puanglima-puanglima tentera, "Telapi anak panahndu!
12 Sikapkenlah ampang-ampangndu! Angkatlah panji-panji nerang benteng-benteng Babilon. Pegegehi penjagan! Tamaken si erjaga-jaga. Suruh kalak si nggempangi!" TUHAN nggo ngelakoken rikutken KataNa nandangi kalak Babilon.
13 I bas negeri enda melala lau mbelin, melala erta-erta si meherga, tapi paksana nggo seh, tinali kegeluhen itek-tek.
14 TUHAN si Mada Kuasa nggo ersumpah i bas dirina jine, maka IsuruhNa me nterem tentera nerang Babilon desken labang si erkemut dingen ersurak ia kerina perban menang.
15 Alu GegehNa, TUHAN nggo njadiken doni enda, alu KepentarenNa nggo ItepaNa pertibi enda, janah alu PengertinNa langit IkimbangkenNa.
16 I bas PerentahNa ergeruhguh lau i datas langit, IbabaNa embun i bas tampuk doni nari. Ibabana kilap i bas udan, isuruhna angin rembus i bas penimpanenna nari.
17 Ngidah si e, kepeken kerina manusia motu kepe, la erpemeteh kalak si mahan gana-gana mela iakapna, sabap gana-gana si ibahanna la tuhu, la lit kegeluhen i bas ia.
18 Kerina ia sia-sia dingen penipu nandangi kernep me ia tupung TUHAN reh ngukumsa.
19 Tapi Dibata nu Jakup la kap seri rassa, Ia kap si nggo njadiken si nasa lit. Dingen Ia kap si nggo milih Israel jadi BangsaNa jine. TUHAN si Mada Kuasa, e kapen GelarNa.
20 Nina TUHAN, "O Babilon, kam ndube pergudamKu, senjatangKu i bas perang. Kupake kam ngeripukken bangsa-bangsa ras kerajan-kerajan,
21 ngeripukken kuda ras si ngersaksa, ngeripukken gereta kuda ras si mabasa,
22 munuhi kerina dilaki ras diberu, munuhi kerina orangtua ras anak si nguda, munuhi anak perana, ras si nguda-nguda,
23 nggelehi permakan ras rarasenna, nggelehi kalak si nenggala ras lembu penenggalana, ngeripukken si erkuasa ras puanglimana."
24 Nina TUHAN, "Idahndu me Aku erbalas man Babilon ras man kalak si ringan i je, erkiteken perbahanenna si jahat nandangi Jerusalem.
25 O Babilon, kam desken deleng si engkernepken doni enda kap, tapi Aku TUHAN jine jadi ImbangNdu. Kutangkap me kam, Kuradasken ku taneh, Kubahan kam jadi abu.
26 Asa ndigan pe lanai lit batu i bas runtuhenndu nari si ipake guna mbangun. Kam tetap jadi gurun pasir seh rasa lalap. Aku TUHAN kap si nggo melasken ranan enda.
27 Pajekken panji guna erperang! Embus terompet gelah kerina bangsa-bangsa doni enda megisa! Sikapken bangsa-bangsa lako erperang ras Babilon! Kataken man raja-raja Ararat. Mini ras Askenas gelah iserangna. Angkat sekalak si minpin perang e. Baba kuda desken labang si erkemut.
28 Sikapken bangsa-bangsa kerina gelah ia erperang ras Babilon. Suruh kalak ngataken ndahi raja-raja Media, peminpin-peminpinna ras pegawai-pegawaina bage pe tentera si lit i teruh kuasana gelah ia ersikap.
29 Enggirgir dingen mundu-undu doni enda erkiteken sura-sura TUHAN mahan Babilon jadi gurun pasir, la lit kalak si enggeluh i je.
30 Tentera-tentera Babilon nggo ngadi erperang janah sinik saja ia i bas bentengna. Nggo bene ukurna dingen nggo bali ia ras pernanden. Pintu gerbang kota nggo meruntuh, rumah-rumah nggo iciluk.
31 Kenca pertenahen nggo kiam ngatakenca man raja Babilon reh ka kiam pertenahen si deban ngatakenca maka arah apai pe Babilon nggo meruntuh.
32 Musuh-musuh nggo engkuasai ingan ngepar lau mbelin. Benteng-benteng nggo iciluk. Nggo bene kal ukur tentera Babilon.
33 Rempet ia itabah musuh jenari idedehi kalak bagi gandum i bas ingan pengeriken. Aku TUHAN si Mada Kuasa Dibata nu Israel, kap si nggo melasken ranan enda."
34 Jerusalem nggo melumat igat-gati raja Babilon jenari ipanganina. Ipelumena kota e desken ngkuseken guci, desken naga galang si nggo nelen kota e. Ibuatna kerina si ngena atena, si debanna isampetkenna.
35 Bagendalah nina kalak Sion, "Babilon la banci la iukum erkiteken perbahanenna man banta!" Bagendalah nina kalak Jerusalem, "Babilon la banci la iukum erkiteken kiniseran si ibahanna banta!"
36 Emaka nina TUHAN kempak kalak Jerusalem, "Aku si ngerunggui perkarandu. Aku erbahanca maka musuh-musuhndu ngaloken ukumen bagi kai si ninggo ilakokenna man bandu. Kupekerah me sumbul lau Babilon Kubahan maka kerah lau belinna.
37 Negeri e jadi runtuh-runtuhen si ergun-gun man ingan rubia-rubia si meliar enggeluh. Jadi mejin me ingan e. La lit sekalak pe si enggeluh i je, janah asa kalak si ngidah enggirgir ia.
38 Kerina kalak Babilon erdengum desken singa, dingen merawa bagi anak singa.
39 Sangkar kin kalak enda? Kusikapken me man bana sada pesta dingen Kubahan maka mabuk dingen ersurak-surak ia. Tunduh me ia jenari asa ndigan pe lanai keke.
40 Kutamaken ia kupenggelehen desken anak lembu, kambing dingen anak biri-biri. Aku TUHAN kap si nggo melasken ranan enda."
41 Nina TUHAN kerna Babilon, "Negeri si ipuji kerina doni enda nggo italuken! Andiko, mejin kal Babilon iakap bangsa-bangsa doni enda kerina!
42 Lawit ergulung i babo Babilon, Babilon nggo itutupi galumbang-galumbang si ergeruhguh.
43 Kota-kotana nggo seh kal mejinna, dingen nggo bali ras gurun pasir si kerah. La lit sekalak pe si enggeluh entah mentas arah e.
44 Bel, dewa Babilon la banci la Kuukum. Kubahan maka iutahkenna barang-barang si itangkona. Asa ndigan pe ia lanai isembah bangsa-bangsa doni enda. Tembok-tembok Babilon nggo runtuh.
45 Kalak Israel kiam i jenari! Kelinilah bandu i bas rawangKu si gara nari.
46 Ula bene ukurndu, ula mbiar erkiteken berita-berita si ibegindu. Tep-tep tahun mbar erbage-bage berita -- berita-berita kalak jahat i negeri enda, dingen berita-berita kerna raja siperangen.
47 Emaka nggo me seh paksana Aku ngukum gana-gana Babilon. Belang-belang negeri e mela iakapna. Kerina si ringan i je la banci la ibunuh.
48 Kerina si lit i bas doni ras datas langit ersurak-surak tupung Babilon ndabuh ku teruh kuasa bangsa si reh i Utara nari lako engkernepkenca.
49 Babilon si erbahanca mate kerina kalak i belang-belang doni enda. Emaka genduari Babilon la banci la mate erkiteken kematen nterem kalak Israel. Aku TUHAN kap si nggo melasken ranan enda."
50 Nina TUHAN man bangsa Babilon, "Kam nggo pulah i bas kematen nari! Genduari laweskenlah! Ulanai timai! Aminna pe kam ndauh i bas Aku nari, ingetlah Aku, TUHANndu, inget Jerusalem.
51 Nindulah, 'Nggo juru dingen mela kal iakap kami. Nggo tuhu medungu kal kita erkiteken kalak asing si nggo muat ingan-ingan si badia i bas Rumah Pertoton.'
52 Dage Kukataken maka nggo seh me paksana Aku ngukum gana-gana Babilon. Kalak si luka ndehereng i belang-belang doni enda.
53 Aminna Babilon banci nangkih ku langit dingen majekken benteng-benteng si paguh i jah, Kusuruh nge kalak ngerontaskenca. Aku TUHAN kap si nggo melasken ranan enda."
54 Nina TUHAN, "Dengkehkenlah sora serko i Babilon, ceda ate erkiteken negeri e nggo kernep.
55 Kukernepken ateKu Babilon, Kupesip ateKu ia. Tentera si nerangsa bali ras galumbang si ergeruhguh, alu sora si gejek.
56 Nggo reh ia ngkernepken Babilon tentera Babilon nggo talu panahna nggo penggel. Aku Dibata si ngukum kalak jahat. Kubalas me man bana bagi patutna.
57 Kubahan maka mabuk penguasana, kalak pentar, peminpin-peminpin ras tenterana. Tunduh me ia, asa ndigan pe lanai keke. Aku, Raja kap si ngerana enda, Aku kap TUHAN si Mada Kuasa.
58 Tembok-tembok Babilon si enteguh la banci la radas ras taneh, janah menara pintu-pintu gerbang si meganjang pe meseng. Kerina pendahin bangsa-bangsa la kap lit ertina, kerina kelatihenna kempak api kap perlawesna. Aku kap TUHAN si Mada Kuasa si ngerana enda."
59 Suruh-suruhen Raja Sedekia eme Seraya anak si Neria kempu si Mahsea. I bas tahun peempatken Sedekia jadi raja Juda, lawes Seraya rassa ku Babilon, dingen kubereken man bana piga-piga perentah.
60 Kusuratken i bas sada buku kerina cilaka si nandangi engkenai Babilon, subuk kerna kerina perkara-perkara si deban kerna Babilon.
61 Ningku kempak Seraya, "Kenca kam seh i Babilon, alu megang ogekenlah kerina si tersurat i jenda man bangsa e.
62 Kenca bage ertotolah kam nindu, 'O TUHAN, nggo IkatakenNdu maka IkernepkenNdu AteNdu negeri enda, gelah lanai lit i je si enggeluh, subuk manusia bage pe rubia-rubia, dingen jadi taneh si melungen me negeri e seh rasa lalap.'
63 O Seraya, kenca nggo dung iogekenndu surat enda man bangsa e, iketken ku bas sada batu jenari ambekken ku Lau Eprat,
64 jenari nindulah, 'Bagenda me jadina man Babilon, gedap me ia dingen asa ndigan pe lanai keke, erkiteken cilaka si nandangi idabuhken TUHAN ku je.'" Sibar enda kedungen ranan si Jeremia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA