Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Sengko’ ngerema angense marosagan ka Babil ban ka kennengnganna pandhudhu’na.
2 Sengko’ ngotosa reng-oreng manca se maancora Babil akantha angen se mangabber sekkem. E are padhatengnga balai jareya reng-oreng manca jareya nyerranga nagara jareya dhari man-dhimman ban nagara jareya epatompessa tadha’ karena.
3 Ja’ berri’ kasempadan ka tantarana kaangguy ngaceddagi panana otaba masang kalambi bessena. Ja’ sampe’ badha ngangodhadanna se epaodhi’. Paancor tantarana kabbi!
4 Reng-oreng jareya bakal loka’a sara sarta mateya e rong-lorongnga kotthana.
5 Sengko’, PANGERAN, Allah Se Mahakobasa, Allahna Isra’il Se Socce, ta’ adina’agiya Isra’il ban Yehuda maske la dusa ka Sengko’.
6 Mara buru dhari Babil, ba’na me’ olle salamet! Ja’ sampe’ badha se tanoro’ mate polana dusana Babil! Sabab sateya reya, sa’adda Sengko’ males kajahadanna Babil ban ngokom bangsa jareya satembang ban lalakonna.
7 Dha’-adha’na Babil reya akantha gellas emmas se eteggu’ Sengko’ se mamabu’ oreng sadunnya. Sa-bangsa ngenom anggur dhari gellas jareya sampe’ padha gila.
8 Tape o-tao Babil gaggar ban bella. Mara tangese, nyareyagi tamba, tamba’agi ka ka-lokana pole me’ bisa baras.
9 Oreng manca se badha e dhissa’ padha saleng ngoca’, ‘Sengko’ ban ba’na la padha aehteyar nolonga Babil, tape la kasep! Lebbi becce’ mara ondur dhari dhinna’, mole ka nagarana bang-sebang. PANGERAN ngokom Babil ce’ berra’na, Babil epaancor tadha’ karena.’"
10 Ommadda PANGERAN ngoca’, "PANGERAN la noduwagi ja’ sengko’ ban ba’na reya tamaso’ se bendher. Mara ka Yerusalim, kabala e dhissa’ apa se la elampa’agi PANGERAN ka sengko’ ban ba’na."
11 PANGERAN la nas-manase to-rato Mediya polana Salerana maancora Babil. Kantha jareya carana Salerana males reng-oreng se arosak Padalemmanna. Para parwirana pasukan tempor marenta’agi, "Patajem panana! Sadhiya’agi tamengnga!
12 Berri’i tandha kaangguy nyerrang dhung-geddhungnga Babil. Pakoko panjaga’an. Saba’i pangawal. Pasadhiya se nyerranga!" PANGERAN la alampa’agi apa se daddi kasokanna ka oreng Babil.
13 Nagara jareya ce’ sogina ban bannya’ songayya, tape sateya la napa’ ka ajalla.
14 PANGERAN Se Mahakobasa asompa bit Salerana dibi’ ja’ Salerana makerema oreng se bannya’na akantha balang epanyerranga Babil, ban reng-oreng jareya bakal rag-soragana polana mennang.
15 PANGERAN nyepta’agi bume kalaban kobasana, abadhi dunnya kalaban hekmadda, ban ngampar langnge’ kalaban akkal buddina.
16 Allah pera’ apareng parenta, aeng laju agarudhu’ dhari langnge’; ondhem epadhateng dhari co’-konco’na bume, kelap epangareddhap e dhalem ojan, angen epakalowar dhari panyempennanna.
17 Nangale’e jareya manossa apangrasa, ja’ aba’na budhu ban ta’ andhi’ pangarteyan. Kang-tokang emmas padha katodhusan, sabab ca-arca gabayanna palsu ban ta’ anyaba.
18 La-brahala jareya tadha’ ajina, ban patot eya-seya. Mon la napa’ baktona, tanto epatompes tadha’ karena.
19 Allahna Yakub ta’ akantha la-brahala jareya; Salerana se abadhi sabarang se badha reya. Asmana PANGERAN Se Mahakobasa, se mele Isra’il ebadhi ommadda.
20 PANGERAN adhabu, "Babil, ba’na padha ban tokol, Tang sanjata se eangguy aperrang. Bi’ Sengko’ ba’na eangguy epangantem sa-bangsa ban karaja’an-karaja’an.
21 Bi’ Sengko’ ba’na eangguy epangancor jaran ban orengnga se nompa’, sarta ta-kareta ban sir-kusirra.
22 Bi Sengko’ ba’na eangguy epamate’e lalake’an ban babine’an, towa ban ngodha, paraban ban lanceng.
23 Ba’na bi’ Sengko’ eangguy epamatompes oreng ngowan ban ebinna, oreng tane ban sapena nanggalana, pangraja ban ra-parwira tenggina."
24 PANGERAN adhabu, "Abassagi dibi’ baramma sateya Sengko’ males ka Babil ban pandhudhu’na polana sakabbinna kajahadanna ka Yerusalim.
25 He Babil, ba’na padha ban gunong se maancor dunnya. Tape Sengko’, PANGERAN, sateya mosona ba’na. Bi’ Sengko’ ba’na etaja’a pas epagulu’a sarta edina’a sampe’ katonon daddi abu.
26 Tadha’ bato settonga dhari jur-gujuranna ba’na se ekabaya maddek pa-apa pole. Ba’na bakal daddiya ra-ara salanjangnga. Sengko’, PANGERAN, la ngoca’."
27 He, rato dhari dhaja! Mara berri’ tandha kaangguy nyerrang! Pamonye tarompet e antarana sa-bangsa! Pajaga sa-bangsa soro aperrang ban Babil! Soro karaja’an Ararat, Mini ban Askenas sopaja padha’a nyerrang. Angkat panglima kasorang se mimpina serrangan jareya. Pakalowar jaran se bannya’na padha ban balang.
28 Pasadhiya sa-bangsa se aperranga ban Babil. Olok to-rato Mediya, ja-pangrajana ban pin-pamimpinna sarta sakabbinna tantarana e ra-nagara se badha e baba pamarenta’anna.
29 Bume agaledder ban gundhek polana Sengko’ teppa’na ajalannagi Tang sajja se ngoba’a Babil epadaddiya tana kajal se ta’ ekennengnge manossa.
30 Tantara Babil la ambu se aperrang ban sateya badha e teng-bintengnga. Kabangalanna la elang ban ta’ bisa apa-rapa. Bang-labang sakethengnga kottha la epagujur, ko-bengko padha eobbar.
31 Para otosan saleng sosol ka’-berka’ mator ka rato Babil ja’ kotthana la eserrang dhari man-dhimman.
32 Kennengnganna oreng alengka e songay la ekobasae moso, teng-binteng partahanan la eobbar. Tantara Babil bingong kabbi.
33 Ta’ abit saellana jareya Babil la epakala sarta enyek-enyek bi’ moso epakantha gandum e pagebba’an. Sengko’, PANGERAN Se Mahakobasa, Allahna Isra’il, la ngoca’.
34 Yerusalim la epaancor ban ekakan epatadha’ karena bi’ rato Babil; kottha jareya epakosong epakantha oreng se makosong butol. Akantha keban se talebat rajana Babil ngalodhu’ Yerusalim, ngesse’e tabu’na bi’ sabarang se bagus dhari nagara jareya, re-karena laju ebuwang.
35 Pandhudhu’ Siyon, mara ngoca’, "Moga Babil eteba’ana kakejjemman akantha se eteba’agi dibi’ ka sengko’ ban ba’na!" Pandhudhu’ Yerusalim, mara ngoca’, "Moga Babil kateba’ana kasangsara’an akantha se eteba’agi dibi’ ka sengko’ ban ba’na!"
36 Daddi PANGERAN adhabu ka pandhudhu’ Yerusalim, "Sengko’ nolongana ba’na e dhalem parkarana, malessagiya sabarang se eteba’agi ka ba’na bi’ so-mosona. Ber-somberra aeng ban ngay-songay e Babil bi’ Sengko’ epakerrenga.
37 Nagara jareya bi’ Sengko’ epadaddiya tombuganna jur-gujuran, kennengnganna pangetegganna pate’ alas. Reng-oreng bakal arassa’a marenges nangale’e, ban bakal tadha’a oreng settonga se endha’ enneng e jadhiya.
38 Oreng Babil agaung akantha macan, ban adherreng akantha budhu’na macan.
39 Sabatara napsona se kan-ngakana ce’ rajana, Sengko’ nyadhiya’agiya ka’-angka’ ka reng-oreng jareya, kabbi bi’ Sengko’ epamabu’a ban epapalengngenna sampe’ padha tatedhung ban ta’ jaga pole.
40 Reng-oreng jareya bi’ Sengko’ egiba’a, esambelliya akantha budhu’na dumba, embi’ ban dumba lake’. Sengko’, PANGERAN, la ngoca’."
41 PANGERAN adhabu, "Babil se ealem oreng sadunnya la erebbu’ ban ekobasae moso! Nagara jareya sateya nako’e parana ka sa-bangsa.
42 Aeng tase’ ngalowa ka Babil; omba’na agarudhu’ alanyo’ nagara jareya.
43 Tha-kotthana daddi kennengngan se nako’e, akantha ra-ara se ta’ etombuwi pa-apa. Tadha’ oreng se endha’ enneng otaba lebat e nagara jareya.
44 Bel, dibana Babil, bi’ Sengko’ eokoma. Sabarang se la erampas diba jareya bi’ Sengko’ epaksa’a sopaja epabali. Sa-bangsa bakal ta’ nyemba’a Bel jareya pole. Dhung-geddhungnga Babil la gujur.
45 Daddi mara buru dhari jadhiya, ommat Isra’il! Pasalamet ba’na dibi’ dhari kapeggellanna Sengko’ se la ta’ ekenneng ampet reya.
46 Ja’ tako’ otabana mangmang polana san-rasanna oreng. Sabban taon badha kabar se banneyan — kabar parkara kakejjemman e dhalem nagarana ban parkara to-rato se saleng merrange.
47 Ongguwan, bakal dhapa’a baktona Sengko’ ngokoma la-brahalana Babil. Sanagara bakal eya’-seya’a ban pandhudhu’na bakal epateyana kabbi.
48 Sabarang se bhada e langnge’ ban e bume bakal asoraga kaperagan mon Babil la gaggar ka bangsa dhari dhaja se dhateng ngancora bangsa Babil jareya.
49 Bannya’ oreng sadunnya epate’e polana Babil, tape sateya Babil bakal gaggara polana daddi lantaranna matena oreng Isra’il sabannya’na. Sengko’, PANGERAN, la ngoca’."
50 PANGERAN adhabu ka oreng Isra’il e Babil, "Ba’na la lopot ta’ ekenneng pate’e! Daddi kassa’ ondur sateya! Ja’ anante’ pole! Maske ba’na jau dhari bengkona, kaenga’e Sengko’, PANGERANna, ban kaenga’e Yerusalim.
51 Ba’na ngoca’ kantha reya, ‘Abdidalem padha eya-seya sareng epamalo; abdidalem padha kaelangan mowa lantaran reng-oreng manca ngobasae sadajana kennengngan se socce e dhalem Padalemman Socce.’
52 Daddi edhingngagi Tang oca’ reya. Bakal dhapa’a baktona Sengko’ ngokoma la-brahalana Babil. E sanagara jareya bakal ekaedhinga sowarana oreng ngadhudhu lantaran loka raja.
53 Maskeya Babil bisa ongga ka langnge’ ban agabay partahan se ta’ ekenneng entare oreng, Sengko’ paggun ngerema oreng se epamarosaga bintengnga jareya. Sengko’, PANGERAN, la ngoca’."
54 PANGERAN adhabu, "Edhingngagi cerrengnga ban tangessa oreng e Babil polana nagara jareya se epaancor.
55 Sengko’ parappa’na maancor Babil, sowarana se ramme epaserep. Moso dhateng akantha omba’ se agarudhu’, tantarana nyerbu sambi reng-cerrengan ngoca’agi cerrengnga paperrangan.
56 Moso jareya dhateng arosaga Babil, nangkebba rit-parjuridda ban motella ta-sanjatana. Sengko’, PANGERAN, se ngokom kajahadan, ban Babil bi’ Sengko’ ebalessa sabandhing ban lalakonna.
57 Ja-pangrajana pamarentana Babil, kaom se penter, para pamimpinna ban tantarana bi’ Sengko’ epamabu’a, sampe’ ta’ jaga pole, tatedhung salanjangnga. Sengko’ la ngoca’; Sengko’ rato, Sengko’ PANGERAN Se Mahakobasa.
58 Dhung-geddhungnga Babil se koko bi’ Sengko’ epagujura eparampa’a ban tana. Labang sakethengnga se gi-tenggi eobbara epasampe’a tadha’ karena. Hasella pello konengnga sa-bangsa tadha’ gunana, sabab sakabbinna hasella lalakonna jareya bakal ekello’a apoy. Sengko’, PANGERAN Se Mahakobasa, la ngoca’."
59 Pangawal pribadhina Rato Zedekiya iya reya Seraya ana’na Neriya kompoyya Mahseya. E taon se kapeng empa’ pamarenta’anna Zedekiya rato Yehuda, Seraya ngereng Zedekiya ka Babil. Daddi Sengko’ aberri’ lalakon ka Seraya jareya.
60 Sakabbinna balai se bakal teba’a ka Babil ban sabarang laenna parkara nagara jareya bi’ sengko’ la etoles kabbi e dhalem settong ketab gulungan.
61 Sengko’ laju ngoca’ ka Seraya, "Sanapa’na ba’na ka Babil, ehteyarragi sopaja sabarang se etoles sengko’ e ketab reya bi’ ba’na bisa’a ebaca’agi ka reng-oreng se badha e dhissa’.
62 Saellana jareya pas adu’a kantha reya, ‘Guste PANGERAN, Junandalem adhabu ja’ kottha ka’dhinto sareng Junandalem badhi epaancora kantos manossa sareng ban-keban padha mosna’a sadaja, sareng kennengngan ka’dhinto badhi daddiya akadi ra-ara salanjangnga.’
63 Saellana ketab reya bi’ ba’na ebaca’agi ka reng-oreng jareya, pas teng-kattenge bato, laju ontallangi ka nga’-tengnga’anna Songay Efrat,
64 sambi ngoca’, ‘Babil bakal kantha’a reya; nagara reya bakal nyellemma ban ta’ mo’dul pole polana balai se eteba’agi PANGERAN.’" Dhabuna Yeremiya ambu gan jadhiya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA