Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata na roh bani si Jeremia humbani Jahowa pasapuluh-tahunkon dob marrajai si Sedekia, raja ni Juda, ai ma pasapuluhualuh-tahunkon dob raja si Nebukadnesar.
2 Bani panorang ai ihubu tentara ni Raja Babel do Jerusalem, tapi tartutup do anggo Nabi Jeremia bani ianan ni siparjaga, na ibagas istana ni raja ni Juda.
3 Ai ipatutupkon si Sedekia, raja ni Juda do ia, nini, “Mase ma manjahai ho, nim: Sonon do hata ni Jahowa, ʻTonggor ma, ondoskonon-Ku do huta on hubagas tangan ni Raja Babel, anjaha patundukonni do on;
4 anjaha si Sedekia, raja ni Juda, seng anjai maluah humbagas tangan ni halak Kasdim, maningon ondoskononkon do ia hubagas tangan ni Raja Babel, marsahap do ia padumpar bohi pakonsi anjaha marsikawahan do sidea,
5 anjaha boanonni do si Sedekia hu Babel, lanjar ijai ma ia tading paima roh Ahu marlulu hu bani, nini Jahowa. Age pe manlawan hanima dompak halak Kasdim, seng anjai monang hanima.ʼ
6 Jadi nini si Jeremia ma, ʻRoh do hata ni Jahowa hu bangku:
7 Tonggor ma, na roh ma si Hanamel, anak ni si Salum, bapatuamu marayak ho, hatahononni do bam: Boli ma jumangku na i Anatot ai, ai ho do marhak mamboli ai bahen parbagiananmu.ʼ
8 Dob ai roh ma si Hanamel, anak ni bapatuangku, romban hu bani hata ni Jahowa, marayak ahu hubani ianan ni siparjaga ai, ihatahon ma hu bangku, ʻBoli ham ma jumangku na i Anatot, na i tanoh Benjamin ai, ai ham do na marhak mamboli laho manean ai; boli ham ma ai bamu.ʼ” Jadi hubotoh ma, hata ni Jahowa do ai hape.
9 Jadi huboli ma juma na i Anatot ai humbani si Hanamel, anak ni Bapatuangku, anjaha hutimbang ma pirak bani sapuluh pitu sekel boratni.
10 Hutandatangani ma surat ai anjaha hubahen marlak, hudilo ma saksi anjaha hutimbang pirak bani timbangan.
11 Dob ai hubuat ma surat pambolian ai, na marlak anjaha na marisi aturan ampa sarat-saratni, sonai homa salinan na buha ai.
12 Jadi hubere ma surat pambolian ai bani si Baruk, anak ni si Neriya, niombah ni si Maseya, i lobei na si Hanamel, anak ni bapatuangkai, ampa i lobei ni sagala saksi na dihut martanda tangan bani surat pambolian ai, ampa i lobei ni haganup halak Jahudi na hundul bani ianan panjagaan ai.
13 Anjaha huhatahon do bani si Baruk i lobei ni sidea, sonon,
14 “Sonon do hata ni Jahowa Zebaot, Naibata ni Israel, ʻBuat ma surat pambolian on haduasi, na marlak ampa salinanni na buha ai, nahkon ma ai hubagas gusi, ase tahan dokah ai.ʼ
15 Ai sonon do hata ni Jahowa Zebaot, Naibata ni Israel, ʻManingon bolion do use i tanoh on rumah, juma ampa pohon anggur.ʼ”
16 Dob huberehon surat pambolian ai hubani si Baruk, anak ni si Neriya, martonggo ma ahu hubani Jahowa,
17 “Ham Tuhan Jahowa! Ham do na manjadihon langit ampa tanoh on, marhitei gogoh-Mu na banggal in ampa marhitei tangan-Mu na pinagostong-Mu! Seng dong na so tarbahen Ham.
18 Maidop do uhur-Mu bani halak na marribu-ribu, tapi ibalaskon Ham do hajahaton ni bapa bani anakni i pudi ni sidea, Ham Naibata na banggal anjaha na markuasa, na margoran Jahowa Zebaot.
19 Bagas do pingkiran-Mu anjaha gok kuasa pambahenan-Mu. Ikawahkon panonggor-Mu do sagala dalan ni jolma, laho mambalaskon bani jolma domu hubani parlahouni ampa domu hubani buah ni pambahenanni.
20 Ham do na dob mambahen tanda ampa halongangan i tanoh Masir anjaha ronsi sadari on bani Israel ampa bani haganup jolma, laho mambahen tarambilan goran-Mu songon na bani panorang on.
21 Ibobahon Ham do bangsa-Mu Israel, mandarat hun tanoh Masir marhasoman tanda ampa halongangan marhitei tangan na gogoh ampa botohon na pinagostong ampa marhitei songgot-songgot.
22 Ibere Ham do bani sidea tanoh on, ai ma dob binulawankon-Mu bani ompung ni sidea, laho mamberehon ai bani sidea, ai ma tanoh habaoran ni dadih ampa manisan.
23 Imasuki sidea ma ai laho manean ai, tapi seng itangihon sidea sora-Mu, anjaha seng marparlahou sidea ibagas titah-Mu; seng dong ihorjahon sidea humbani haganup na pinarentahkon-Mu bani sidea. Halani ai do ase ipasogop Ham bani sidea haganup hamagouan on.
24 Tonggor ma, domma das hu huta on hubuan laho patundukkonsi, anjaha domma ondos huta on hubagas tangan ni halak Kasdim sipangkubu in, halani podang, lohei pakon sampar. Saud do sagala nilumbahon-Mu ididah ham sandiri do in.
25 Hape, Ham Tuhan Jahowa, ihatahon Ham do bangku, ʻBoli ma juma in marhitei duit, anjaha bahen marsaksi! Hape domma ondos huta on hubagas tangan ni halak Kasdim.ʼ
26 Dob ai roh ma hata ni Jahowa bani si Jeremia, sonon,
27 ʻTonggor ma, Ahu do Jahowa, Naibata ni sagala na mardaging; ai adong do na maborattu Bangku?ʼ
28 Halani ai, sonon do hata ni Jahowa, ʻHubere ma huta on hubagas tangan ni halak Kasdim ampa hubagas tangan ni si Nebukadnesar, raja ni Babel, anjaha patundukonni do on.ʼ
29 Halak Kasdim, na mangkubu huta on, roh ma mammasuki anjaha manutung huta on; tutungon ni sidea ma rumah-rumah, na ongga tayubni ipakei panutungan dahupa bani Baal, anjaha iuseihon ijai galangan siinumon bani naibata na legan, laho mamuhoi ringis-Ku.
30 Ai ihorjahon halak Israel pakon halak Juda do sogam ni uhur-Hu humbani haposoonni nari; tongon, sai tong do ipuhoi halak Israel ringis-Ku marhitei pambahenan ni tangan ni sidea, nini Jahowa.
31 Tongon, ipuhoi huta on do ringis-Ku ampa gilang-Ku humbani parjongjongni nari ronsi sadari on, gabe maningon ambukkonon-Ku do in hun lobei-Hu,
32 halani haganup hajahaton ni halak Israel pakon Juda, sagala na binahen ni sidea laho mamuhoi ringis-Ku, sidea ampa raja-raja ni sidea, malim-malim pakon nabi-nabi ni sidea, halak Juda ampa pangisi ni Jerusalem.
33 Gurung ni sidea do idompakkon sidea Bangku, sedo bohi ni sidea; age pe marulak-ulak Ahu mangajari sidea, seng dong ra sidea manangihon laho manjalo pangajarion.
34 Ipajongjong sidea do gana-gana sihagigihononkon ai ibagas rumah na targoran bani goran-Ku, laho pabutakkon ai.
35 Ipajongjong sidea do panggalangan bani Baal bani habungan Ben-Hinnom, laho manutung anak pakon boru ni sidea ibagas apuy bani sisombahon Molok, age pe seng ongga Hutonahkon ai bani sidea, atap taringat ibagas uhur-Hu, bahenon ni sidea habutakon na sonai, laho mambahen Juda mardousa.
36 Tapi age pe sonai, sonon do hata ni Jahowa, Naibata ni Israel, pasal huta on, na dob hinatahonnima, ʻIondoskon do ai hubagas tangan ni Raja Babel marhitei podang, lohei pakon sampar:
37 Tonggor ma, patumpuon-Ku do sidea humbani haganup nagori pambuangan-Ku bani sidea, ibagas ringis-Ku ampa gilang-Ku ampa banggal ni marah-Ku; boanon-Ku do sidea mulak bani ianan on, anjaha sonang do bahenon-Ku sidea marianan ijin.ʼ
38 Gabe bangsang-Ku ma sidea, anjaha Ahu gabe Naibata ni sidea.
39 Berehonon-Ku do bani sidea sada paruhuran, sada parlahou, ase marhabiaran sidea lalab Bangku, bahen hatuahon bani sidea ampa bani ginompar ni sidea i pudi ni sidea.
40 Bahenon-Ku do bani sidea padan sisadokah ni dokahni, paboa seng surut be Ahu mambahen na madear bani sidea; anjaha nahkonon-Ku do biar mangidah Ahu hubagas uhur ni sidea, ase ulang be marbalik sidea hun Bangku.
41 Marmalas ni uhur do Ahu mambahen na madear bani sidea, anjaha suanon-Ku do sidea tongon-tongon i tanoh on, humbani gok ni uhur-Hu pakon gok ni tonduy-Hu.
42 Ai sonon do hata ni Jahowa, ʻSongon na dob Huparoh haganup hamagouan banggal on bani bangsa on, sonai do parohon-Ku bani sidea haganup na madear, na dob Huparbagah bani sidea.ʼ
43 Bolion ni halak do use juma i nagori on, na hinatahonnima ai, ʻHalimisan do in, na so marisi jolma barang pinahan; domma ondos in bani tangan ni halak Kasdim.ʼ
44 Bolion do use juma marhitei duit, anjaha ibahen surat pambolian martanda tangan, marlak ampa marsaksi, i tanoh Benjamin, bani tanoh inggot ni Jerusalem, ibagas huta-huta ni Juda, ibagas huta-huta na i pardologan, ibagas huta-huta na i bornoh-bornoh, ampa ibagas huta-huta na i tanoh Dangsina; ai sihol do pasuangon-Ku sidea, nini Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA