Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng sapolo pamarenta’anna Zedekiya rato Yehuda, iya reya taon se kapeng ballu bellas pamarenta’anna Nebukadnezar rato Babil, PANGERAN abu-dhabu ka sengko’.
2 E bakto jareya tantarana rato Babil teppa’na nyerrang Yerusalim. Sengko’ epaambu e palataranna karaton
3 bi’ Rato Zedekiya, polana earane ngomommagi ja’ PANGERAN adhabu kantha reya, "Bi’ Sengko’ rato Babil epannengnga matellok ban ngobasae kottha reya,
4 ban Rato Zedekiya ta’ kera lopot. Bi’ Sengko’ epassra’agiya ka rato Babil; Zedekiya bakal dhep-adhebbana ban rato Babil jareya sarta acaca dibi’ bi’ rato jareya.
5 Saellana jareya Zedekiya bakal eangko’a ka Babil ban ennengnga e jadhiya sampe’ bi’ Sengko’ eokom. Sanajjan Zedekiya merrangana oreng Babil, ta’ kera ahasel. Sengko’, PANGERAN, la ngoca’."
6 PANGERAN adhabu ka sengko’,
7 ja’ Haname’el, ana’ lake’na Salum tang majadhi’, bakal dhatengnga parlo menta’a ka sengko’ sopaja sengko’ melle tanana se badha e Anatot e dhaerana Benyamin.
8 Bendher onggu akantha se edhabuwagi PANGERAN jareya, Haname’el entar ka sengko’ e palataranna karaton, ban menta sopaja sengko’ melle tanana. Daddi sengko’ yakin ja’ PANGERAN la adhabu onggu ka sengko’.
9 Daddi bi’ sengko’ tanana Haname’el jareya ebelli, argana petto bellas pesse salaka. Sengko’ ngolok se-sakse ban e adha’na se-sakse jareya sengko’ neken sorat juwal bellina, se bi’ sengko’ pas epasange segel ban pessena pas etembang.
10 (32:9)
11 Saellana jareya sengko’ ngala’ sorat juwal belli buru se la mare epasange segel ban aesse rat-saradda sarta katantowan-katantowanna. Sengko’ ngala’ keya salenanna sorat jareya se ta’ epasange segel;
12 sorat se dhadhuwa’ jareya bi’ sengko’ ebagi ka Barukh ana’na Neriya kompoyya Mahseya. Sengko’ magi rat-sorat jareya e adha’na Haname’el ban se-sakse se la neken rat-sorat jareya, ban e adha’na reng-oreng se teppa’na toju’ e palataran jareya.
13 E adha’na reng-oreng jareya kabbi, sengko’ ngoca’ ka Barukh,
14 "PANGERAN Se Mahakobasa, Allahna Isra’il, makon sengko’ ngala’ sorat se dhadhuwa’ reya, iya reya sorat juwal belli se asli ban salenanna; sengko’ epakon mamaso’ sorat se dhadhuwa’ reya ka dhalem polo’ tambikar me’ olle abit ta’ duli rosak.
15 PANGERAN Se Mahakobasa, Allahna Isra’il, adhabu ja’ bengko, tana, ban kebbun anggur e nagara reya pagi’ bakal ejuwal-belliya."
16 Saellana rat-sorat juwal belli jareya bi’ sengko’ ebagi ka Barukh, sengko’ adu’a,
17 "Guste PANGERAN Se Mahatenggi, Junandalem se nyepta’agi langnge’ sareng bume kalaban kobasa sareng kakowadan se raja. Tadha’ barang se malarat monggu ka Junandalem.
18 Junandalem noduwagi kataresna’anna se langgeng ka oreng abun-ebun, namong Junandalem jugan ngokom oreng lantaran dusana oreng towana. Junandalem Allah se agung sareng parjuga; asmana Junandalem PANGERAN Se Mahakobasa.
19 Sadaja se ekasajja Junandalem talebat saena, sadajana se elampa’agi Junandalem ajib; Junandalem ngoladi ponapa se elakone manossa, sareng males manossa sabandhing sareng lalakonna.
20 Gi’ jaman dhimen Junandalem alampa’agi kaajiban-kaajiban sareng sabarang se lowar biyasa e Messer, kantos samangken Junandalem gi’ terros alampa’agi gapaneka, e antarana bangsa Isra’il sarengngan jugan e natarana sa-bangsa laenna. Lantaran gapaneka samangken Junandalem kasohor e man-ka’dhimman.
21 Kalaban kobasana sareng kakowadanna Junandalem se raja Junandalem abakta ommat Isra’il kalowar dhari Messer. Junandalem mabadha jat-mo’jijat sareng kaajiban-kaajiban sareng kadaddiyan-kadaddiyan se mabaridhu moso.
22 Nagara se sae sareng landhu ka’dhinto sareng Junandalem eparengngagi ka reng-oreng gapaneka akadi se ampon ejanjiyagi Junandalem ka bangatowana.
23 Namong e bakto reng-oreng gapaneka napa’ ka nagara ka’dhinto sareng ampon bisa ngobasae tana ka’dhinto, reng-oreng gapaneka ta’ poron atoro’ ka papakonna Junandalem, ban ta’ poron odhi’ menorot sadajana pangajarannepon Junandalem. Sadajana papakonna Junandalem tadha’ settonga se ejalannagi. Daddi Junandalem madhateng sadajana balai ka’dhinto ka reng-oreng gapaneka.
24 Reng-oreng Babil ampon maddek geddhung e sakalenglengnga kottha, epangeppong kottha ka’dhinto sopaja ekennenga rebbu’, ban samangken reng-oreng Babil gapaneka nyerrang. Paperrangan, kalaparan, sareng wabah panyaket bakal daddiya lantaranna kottha ka’dhinto gaggar ka tanangnga oreng Babil. Junandalem ngoladi ja’ sadaja se edhabuwagi Junandalem ampon kalakon.
25 Sanare saka’dhinto, Guste PANGERAN Se Mahatenggi, Junandalem se makon abdidalem ngobange tana ka’dhinto e adha’epon para sakse, sanare sakejja’ aggi’ kottha ka’dhinto bakal erebbu’a sareng oreng Babil."
26 Saellana jareya PANGERAN adhabu ka sengko’,
27 "Sengko’ PANGERAN, Allahna sakabbinna oreng. Tadha’ barang se malarat monggu ka Sengko’.
28 Kottha reya bi’ Sengko’ edina’a me’ olle ekobasae Nebukadnezar rato Babil ban pasukanna. Kottha reya bakal erebbu’a
29 ban eobbara sampe’ tadha’ karena ban ko-bengkona; ko-bengko jareya kennengngan se mapeggel Tang ate sabab e attassa ata’na reng-oreng jareya ngobbar dupa ka Ba’al ban nyelen anggur menangka tor-ator ka ba-diba.
30 Molae dhari parmola’anna sajarana, reng-oreng Isra’il ban Yehuda la ta’ masenneng Tang ate; reng-oreng jareya mapeggel Tang ate polana tengkana.
31 Molae bakto kottha reya epaddek, pandhudhu’na la mapeggel Sengko’. Daddi Sengko’ la motossagi, bi’ Sengko’ epatompessa,
32 lantaran sakabbinna kajahadan se elakone oreng Yehuda ban Yerusalim ban para ratona, pangrajana pamarentana, mam-imam ban bi-nabbina.
33 Reng-oreng jareya mongkore Sengko’ ban maske Sengko’ ros-terrosan ngajar reng-oreng jareya, tape reng-oreng jareya ta’ endha’ ngedhingngagi ban ta’ endha’ apangrasa.
34 La’-mala’ padalemman se epaddek kaangguy kennengnganna oreng abakte ka Sengko’ epanajjis polana ekagabay kennengnganna la-brahalana se majitjit.
35 Reng-oreng jareya agabay ba-mezba kaangguy Ba’al e Cora Hinom, ban ngurbannagi na’-ana’na ka Diba Molokh. Mangkana Sengko’ ta’ tao nyoro se kantha jareya, la’-mala’ Sengko’ ta’ tao andhi’ pekkeran ja’ reng-oreng jareya bakal ngalakonana barang se juba’na kantha jareya ban madusa oreng Yehuda."
36 PANGERAN, Allahna Isra’il, adhabu ka sengko’, "Yeremiya, bangsa Isra’il ngoca’ ja’ paperrangan, kalaparan ban wabah panyaket bakal daddiya sababba kottha reya gaggar ka tanangnga oreng Babil. Sateya, edhingngagi apa pole se ekoca’agiya Sengko’.
37 Bangsa reya bi’ Sengko’ epakompola dhari sakabbinna nagara kennengnganna bangsa jareya bi’ Sengko’ epabalessadan polana peggella Tang ate se talebat rajana ka bangsa jareya. Bi’ Sengko’ egiba’a abali ka kennengngan reya ban e dhinna’ epaamana odhi’na.
38 Reng-oreng jareya daddiya Tang ommat ban Sengko’ daddiya Allahna.
39 Bi’ Sengko’ reng-oreng jareya pera’ eberri’ana settong tojjuwan e dhalem odhi’na, iya reya ahormadi Sengko’ salanjangnga; jareya bakal madhatengnga kabecce’an ka reng-oreng jareya dibi’ ban ka toronanna.
40 Sengko’ agabaya parjanjiyan se langgeng ban reng-oreng jareya. Sengko’ ta’ ambuwa aberri’ kabecce’an ka reng-oreng jareya. Bi’ Sengko’ reng-oreng jareya epatako’a ban epahormada ka Sengko’ kalaban saongguna atena sopaja reng-oreng jareya ta’ sampe’a ajauwi Sengko’.
41 Sengko’ bakal sennengnga aberri’ kabecce’an ka reng-oreng jareya ban maneptep reng-oreng jareya e nagara reya salanjangnga.
42 Akantha Sengko’ se la madhateng balai ka bangsa reya, bariya keya Sengko’ aberri’a sabarang se bagus se la ejanjiyagi Sengko’ ka reng-oreng jareya.
43 Ca’na oreng nagara reya la daddi akantha ra-ara se ta’ ekennengnge manossa ban keban, ban nagara reya la gaggar ka tanangnga oreng Babil. Tape pagi’ gal-teggal bakal ejuwal-belliya e nagara reya.
44 Sorat tandha bukte juwal belli jareya bakal etekenna, esegella ban epakowada bi’ se-sakse. Jareya bakal kadaddiyana e dhaerana Benyamin, e sa-disa e sabingkerra Yerusalim, e tha-kottha Yehuda, e tha-kottha e dhaera pagunongan, e dhaera babana gunong ban e Yehuda lao’. Kabadha’anna bangsa reya bi’ Sengko’ epabaliya akantha asalla e nagara reya. Sengko’, PANGERAN, la ngoca’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA